സിഡ്നിയിലെ കൂജി ബീച്ചിൽ ഷാർക്ക് ആക്രമണത്തിൽ ഗുരുതരമായി പരിക്കേറ്റ 35-കാരിയെ തിരിച്ചറിഞ്ഞു. രണ്ട് ചെറിയ കുട്ടികളുടെ അമ്മയായ ലിയ സ്റ്റുവർട്ടാണ് അപകടത്തിൽപ്പെട്ടത്. ശനിയാഴ്ച രാവിലെ തീരത്ത് നിന്ന് ഏകദേശം 20 മുതൽ 30 മീറ്റർ വരെ അകലെയായി നീന്തുന്നതിനിടെയാണ് ആക്രമണത്തിനിരയായത്. മൂന്ന് മുതൽ നാല് മീറ്റർ വരെ നീളമുള്ള ഗ്രേറ്റ് വൈറ്റ് ഷാർക്കാണ് ആക്രമണം നടത്തിയതെന്നാണ് അധികൃതരുടെ സംശയം. ആക്രമണത്തിൽ ലിയയുടെ വലതുകാലിന് ഗുരുതര പരിക്കേറ്റതിനെ തുടർന്ന് രക്ഷാപ്രവർത്തകർ സ്ഥലത്ത് പ്രാഥമിക ചികിത്സ നൽകി ആശുപത്രിയിലേക്ക് മാറ്റി.
സംഭവസമയത്ത് ബീച്ചിലുണ്ടായിരുന്ന ലൈഫ്സേവർമാരും പൊതുജനങ്ങളും ചേർന്നാണ് ലിയയെ കരയ്ക്കെത്തിച്ചത്. ഗുരുതര രക്തസ്രാവമുണ്ടായിരുന്നെങ്കിലും അതിവേഗ ചികിത്സ ലഭിച്ചതാണ് ജീവൻ രക്ഷിക്കാൻ സഹായിച്ചതെന്ന് റിപ്പോർട്ടുകൾ സൂചിപ്പിക്കുന്നു. ആക്രമണത്തെ തുടർന്ന് കൂജി ഉൾപ്പെടെയുള്ള സമീപ ബീച്ചുകൾ താൽക്കാലികമായി അടച്ചിരുന്നു. പിന്നീട് സുരക്ഷാ പരിശോധനകൾ പൂർത്തിയാക്കിയ ശേഷം ബീച്ചുകൾ വീണ്ടും തുറന്നു. എന്നാൽ ലൈഫ്സേവർ പട്രോളിംഗും ഡ്രോൺ നിരീക്ഷണവും ഗണ്യമായി വർധിപ്പിച്ചിട്ടുണ്ട്.
അതേസമയം ലിയയുടെ കുടുംബത്തിനും ചികിത്സാ ചെലവുകൾക്കുമായി സുഹൃത്തുക്കളും സമൂഹാംഗങ്ങളും ചേർന്ന് ധനസമാഹരണ പ്രവർത്തനങ്ങൾ ആരംഭിച്ചിട്ടുണ്ട്. പേജ് ആരംഭിച്ച് വെറും 15 മണിക്കൂറിനുള്ളിൽ തന്നെ 250,000 ഡോളർ ലക്ഷ്യത്തിൽ 226,000 ഡോളറിലധികം സമാഹരിച്ചതായി റിപ്പോർട്ട് ചെയ്യപ്പെട്ടു. ധനശേഖരണ പേജിൽ ലിയയുടെ ഭർത്താവായ ജോഷ് സ്റ്റുവർട്ട്, “ഈ ഫണ്ട് ലിയയുടെ പുനരധിവാസത്തിനും കൃത്രിമ അവയവങ്ങൾ (prosthetics) ലഭ്യമാക്കുന്നതിനും തുടർചികിത്സയ്ക്കും ജീവിതത്തിലേക്കുള്ള തിരിച്ചുവരവിനാവശ്യമായ മാറ്റങ്ങൾക്കും സഹായകമാകും. തന്റെ കുഞ്ഞുമകളുടെ മികച്ച അമ്മയായി വീണ്ടും ജീവിതത്തിലേക്ക് മടങ്ങിവരാൻ ഇത് പിന്തുണ നൽകും,” എന്ന് കുറിച്ചു. യുവ അമ്മയുടെ ആരോഗ്യനിലയിൽ പുരോഗതിയുണ്ടാകട്ടെയെന്ന് ആശംസിച്ച് നിരവധി പേർ സാമൂഹിക മാധ്യമങ്ങളിലൂടെ പിന്തുണ അറിയിച്ചിട്ടുണ്ട്. എന്നാൽ സമീപ വർഷങ്ങളിലെ സിഡ്നിയിലെ ഏറ്റവും ഗുരുതരമായ ഷാർക്ക് ആക്രമണങ്ങളിലൊന്നായാണ് ഈ സംഭവം വിലയിരുത്തപ്പെടുന്നത്. അധികൃതർ ബീച്ച് സന്ദർശകരോട് ജാഗ്രത പാലിക്കാനും മുന്നറിയിപ്പുകൾ കർശനമായി അനുസരിക്കാനും നിർദേശിച്ചിട്ടുണ്ട്.