സസ്‌പെൻഡ് ചെയ്യപ്പെട്ട സിഡ്നി സ്വാൻസ് താരം ഐസക് ഹീനീ 2026ലെ ക്ലബ്ബിന്റെ മികച്ച താരത്തിനുള്ള ബോബ് സ്കിൽട്ടൺ മെഡൽ തുടർച്ചയായ മൂന്നാം തവണ നേടി. പുരസ്‌കാരച്ചടങ്ങിൽ പങ്കെടുക്കാതെയാണ് ഹീനീ നേട്ടം സ്വന്തമാക്കിയത്. ക്ലബ് മാനദണ്ഡങ്ങൾ ലംഘിച്ചതിനെ തുടർന്ന് സീസണിന്റെ ശേഷിക്കുന്ന മത്സരങ്ങളിൽ നിന്ന് ഹീനീയെയും സഹതാരങ്ങളായ ചാഡ് വാർണർ, നിക്ക് ബ്ലേക്കി, ജെയിംസ് ജോർഡൻ, റൈലി ബൈസിനെയും സസ്‌പെൻഡ് ചെയ്തിരുന്നു. ഓഗസ്റ്റിൽ എസൻഡണിനെതിരായ വിജയത്തിന് പിന്നാലെ മെൽബണിൽ പുലർച്ചെ വരെ പാർട്ടിയിൽ പങ്കെടുത്തതിനെ തുടർന്നായിരുന്നു ക്ലബ്ബിന്റെ നടപടി.
അതേസമയം, താരങ്ങൾക്കെതിരായ സസ്‌പെൻഷൻ ഹോട്ടൽ മുറിയിൽ നടന്നതായി ആരോപിക്കപ്പെടുന്ന ലൈംഗികാതിക്രമവുമായി ബന്ധപ്പെട്ട പൊലീസ് അന്വേഷണത്തിൽ നിന്ന് വേറിട്ട നടപടിയാണ്. റൈലി ബൈസിനെ വിക്ടോറിയ പൊലീസ് കുറ്റമൊന്നുമില്ലെന്ന് കണ്ടെത്തിയിട്ടുണ്ട്. മറ്റ് നാല് താരങ്ങൾക്കെതിരെയും ഇതുവരെ കുറ്റം ചുമത്തിയിട്ടില്ല. ആരോപണങ്ങൾ നിഷേധിച്ചിട്ടുമുണ്ട്. പുരസ്‌കാരം സ്വീകരിക്കുന്നതിനായി ഹീനീ വീഡിയോ സന്ദേശം അയച്ചു. സഹതാരങ്ങളോടും സിഡ്നി സ്വാൻസ് സമൂഹത്തോടും ക്ഷമാപണം നടത്തിയ അദ്ദേഹം, പുരസ്‌കാരം ലഭിച്ച വിവരം ഏറെക്കാലത്തിന് ശേഷം ആദ്യമായി തനിക്ക് സന്തോഷവും ഭാവിയെക്കുറിച്ച് പ്രതീക്ഷയും നൽകിയെന്ന് പറഞ്ഞു.
ക്ലബ്ബിൽ നിന്ന് അകന്നു നിൽക്കേണ്ടിവന്ന ഓരോ ദിവസവും വേദനാജനകമായിരുന്നെന്നും ടീമിനൊപ്പം വീണ്ടും പരിശീലനത്തിന് ഇറങ്ങി അടുത്ത സീസണിനായി ഒരുമിച്ച് മുന്നേറാൻ കാത്തിരിക്കുകയാണെന്നും ഹീനീ വ്യക്തമാക്കി.
പുരസ്‌കാരച്ചടങ്ങിൽ സിഡ്നി സ്വാൻസ് ചെയർമാൻ ആൻഡ്രൂ പ്രിഡ്ഹാം, ആരോപണവിധേയരായ അഞ്ച് താരങ്ങളും ആരോപണങ്ങൾ ശക്തമായി നിഷേധിച്ചിട്ടുണ്ടെന്നും കുറ്റം തെളിയുന്നതുവരെ നിരപരാധിത്വത്തിന്റെ അടിസ്ഥാന അവകാശം അവർക്ക് ലഭിക്കണമെന്നും പറഞ്ഞു. സീസണിലെ അവസാന മൂന്ന് മത്സരങ്ങൾ നഷ്ടമായെങ്കിലും ഹീനീ 431 വോട്ടുകൾ നേടി ഒന്നാമതെത്തി. ബ്രോഡി ഗ്രണ്ടി 400 വോട്ടുമായി ആദം ഗുഡ്സ് ട്രോഫിയും ചാർലി കർണോ 398 വോട്ടുമായി പീറ്റർ ബെഡ്ഫോർഡ് ട്രോഫിയും നേടി.