സിഡ്നി: വൺ നേഷൻ നേതാവ് പോളിൻ ഹാൻസന്റെ നിലപാടുകളെക്കുറിച്ചുള്ള ചോദ്യങ്ങൾക്ക് മറുപടി നൽകുന്നതിനിടെ അഭിമുഖത്തിനിടയിൽ നായയോട് ഉറക്കെ അലറുന്ന എംപി ബാർണബി ജോയ്സിന്റെ വീഡിയോ സമൂഹമാധ്യമങ്ങളിൽ വൈറലായി. എബിസിയുടെ 7.30 പരിപാടിയിൽ അവതാരക സാറാ ഫെർഗ്യൂസനുമായുള്ള തത്സമയ അഭിമുഖത്തിനിടെയായിരുന്നു സംഭവം. ഗ്രാമപ്രദേശത്തെ ഒരു വീട്ടിൽ നിന്നാണ് ജോയ്സ് അഭിമുഖത്തിൽ പങ്കെടുത്തത്.
ബ്രിട്ടനിലെ തീവ്ര വലതുപക്ഷ പ്രവർത്തകനും കുറ്റവാളിയുമായ ടോമി റോബിൻസണുമായി പോളിൻ ഹാൻസൻ നടത്തിയ കൂടിക്കാഴ്ചയെക്കുറിച്ച് ചോദിച്ചപ്പോൾ, മറുപടി പറയുന്നതിനിടെ ജോയ്സ് പെട്ടെന്ന് ക്യാമറയ്ക്ക് പുറത്തുണ്ടായിരുന്ന നായയോട് "Sit down!" (ഇരിക്കൂ!) എന്ന് ഉറക്കെ വിളിച്ചു. പിന്നാലെ "ക്ഷമിക്കണം, അത് ഒരു നായയാണ്" എന്നും അദ്ദേഹം പറഞ്ഞു. അഭിമുഖത്തിൽ പോളിൻ ഹാൻസൻ 'വൈറ്റ് ഓസ്ട്രേലിയ' നയം തിരിച്ചുകൊണ്ടുവരണമെന്ന് ആവശ്യപ്പെട്ടിട്ടില്ലെന്നും, അവർ അത്തരം നിലപാട് പിന്തുണയ്ക്കുന്നില്ലെന്നും ജോയ്സ് അവകാശപ്പെട്ടു.
അതേസമയം, ഹാൻസൻ മുമ്പ് ടോമി റോബിൻസണുമായുള്ള പോഡ്കാസ്റ്റിൽ മുൻ പ്രധാനമന്ത്രി ഗഫ് വിറ്റ്ലം 1973-ൽ വൈറ്റ് ഓസ്ട്രേലിയ നയം അവസാനിപ്പിച്ചതിന് ശേഷമാണ് രാജ്യത്ത് കുടിയേറ്റവുമായി ബന്ധപ്പെട്ട പ്രശ്നങ്ങൾ വർധിച്ചതെന്ന് പറഞ്ഞിരുന്നു. ഇതേ തുടർന്ന് അവരുടെ പരാമർശങ്ങൾ വ്യാപക വിമർശനത്തിന് വഴിവെച്ചിരുന്നു.
അഭിമുഖത്തിൽ ഓസ്ട്രേലിയയിലെ മുസ്ലിം സമൂഹത്തെക്കുറിച്ചും ജോയ്സ് പ്രതികരിച്ചു. സമൂഹങ്ങൾ മുഖ്യധാരയുമായി ഇഴചേരാതെ വേറിട്ട സംസ്കാരമായി മാറുന്നത് രാജ്യത്തിന് പ്രശ്നങ്ങൾ സൃഷ്ടിക്കാമെന്നും, അതിന്റെ ഉദാഹരണമാണ് ബോണ്ടി ആക്രമണമെന്നുമാണ് അദ്ദേഹം പറഞ്ഞത്. രാഷ്ട്രീയ ചർച്ചയ്ക്കിടയിലെ അപ്രതീക്ഷിത നായവിളി സമൂഹമാധ്യമങ്ങളിൽ വ്യാപകമായി പ്രചരിക്കുമ്പോൾ, അഭിമുഖത്തിന്റെ ഉള്ളടക്കത്തേക്കാൾ ആ നിമിഷമാണ് കൂടുതൽ ശ്രദ്ധ നേടിയത്.