പെർത്ത്: ഓസ്ട്രേലിയയിലെ വന്യജീവി മേഖലയ്ക്കും വളർത്തുപക്ഷി വ്യവസായത്തിനും കനത്ത ഭീഷണിയുയർത്തിക്കൊണ്ട് മാരകമായ എച്ച്5 (H5) ബേർഡ് ഫ്ലൂ (പക്ഷിപ്പനി) വൈറസ് കൂടുതൽ പ്രദേശങ്ങളിലേക്ക് വ്യാപിക്കുന്നു. ന്യൂ സൗത്ത് വെയ്ൽസിലും വെസ്റ്റേൺ ഓസ്ട്രേലിയയുടെ തലസ്ഥാനമായ പെർത്ത് നഗരപരിധിയിലും ഇതാദ്യമായി എച്ച്5 വൈറസിന്റെ സാന്നിധ്യം സംശയിക്കുന്ന കേസുകൾ കണ്ടെത്തി. വിദേശങ്ങളിൽ നിന്നും പറന്നെത്തിയ ദേശാടന പക്ഷികളിലാണ് രോഗബാധ സ്ഥിരീകരിച്ചിട്ടുള്ളത്.
ന്യൂ സൗത്ത് വെയ്ൽസിന്റെ മിഡ് നോർത്ത് കോസ്റ്റിലുള്ള ഹോക്സ് നെസ്റ്റിന് സമീപം ബെനറ്റ്സ് ബീച്ചിൽ രോഗബാധിതനായി കണ്ടെത്തിയ 'ജയന്റ് പെട്രൽ' എന്ന കടൽപക്ഷിയിലാണ് പ്രാഥമിക പരിശോധനയിൽ എച്ച്5 വൈറസ് കണ്ടെത്തിയതെന്ന് എൻഎസ്ഡബ്ല്യു കൃഷി മന്ത്രി താരാ മൊറിയാർട്ടി സ്ഥിരീകരിച്ചു. ഇതേസമയം തന്നെ വെസ്റ്റേൺ ഓസ്ട്രേലിയയിലെ പെർത്ത് നഗരത്തിന്റെ വടക്കൻ തീരമായ മുള്ളാലുവിൽ ചത്ത നിലയിൽ കണ്ടെത്തിയ മറ്റൊരു ജയന്റ് പെട്രൽ പക്ഷിയും എച്ച്5 പോസിറ്റീവായി. പെർത്ത് മെട്രോപൊളിറ്റൻ മേഖലയിൽ ഇതാദ്യമായാണ് ഈ വൈറസ് എത്തുന്നത്. രണ്ട് പക്ഷികളുടെയും സാമ്പിളുകൾ വൈറസിന്റെ തീവ്രത കൂടിയ ജനിതക വകഭേദമാണോ (Highly Pathogenic Avian Influenza - HPAI) എന്ന് സ്ഥിരീകരിക്കാൻ മെൽബണിലെ സിഎസ്ഐആർഒ ലബോറട്ടറിയിലേക്ക് അയച്ചിരിക്കുകയാണ്.
ലോകത്തെ വിറപ്പിച്ച വകഭേദം; ഓസ്ട്രേലിയയിൽ കനത്ത പ്രതിരോധം:
ആഗോളതലത്തിൽ ദശലക്ഷക്കണക്കിന് പക്ഷികളുടെയും അമ്പതിലധികം സസ്തനികളുടെയും കൂട്ടമരണത്തിന് കാരണമായ 'H5N1 2.3.4.4b' എന്ന അപകടകാരിയായ വൈറസ് വകഭേദമാണ് ലോകമെമ്പാടും പടരുന്നത്. ഇതുവരെ ഈ വകഭേദം ബാധിക്കാത്ത ഏക ഭൂഖണ്ഡമായിരുന്നു ഓസ്ട്രേലിയ. നിലവിൽ വെസ്റ്റേൺ ഓസ്ട്രേലിയയിൽ നാലും സൗത്ത് ഓസ്ട്രേലിയയിൽ ഒന്നും ഉൾപ്പെടെ അഞ്ച് കേസുകൾ രാജ്യത്ത് ഇതിനകം സ്ഥിരീകരിച്ചിട്ടുണ്ട്. വൈറസ് പ്രതിരോധത്തിനായി ഫെഡറൽ സർക്കാർ 113 മില്യൺ ഡോളറിന്റെ അടിയന്തര ഫണ്ട് അനുവദിച്ചതായി ഫെഡറൽ കൃഷി മന്ത്രി ജൂലി കോളിൻസ് അറിയിച്ചു.
പക്ഷികൾ അലസമായിരിക്കുക, കണ്ണുകളിൽ നിന്നും വെള്ളമൊഴുക്കുക, ശ്വാസതടസ്സം, പക്ഷാഘാതം എന്നിവയാണ് രോഗലക്ഷണങ്ങൾ. ഈ വൈറസ് മനുഷ്യരിലേക്ക് പകരാൻ വളരെ കുറഞ്ഞ സാധ്യതയേ ഉള്ളൂ എന്നും സാധാരണ ജലദോഷ ലക്ഷണങ്ങൾ മാത്രമേ ഉണ്ടാകൂ എന്നും ചീഫ് വെറ്ററിനറി ഓഫീസർ ജോ കൂംബെ വ്യക്തമാക്കി. ചിക്കൻ, മുട്ട എന്നിവ കഴിക്കുന്നതിൽ നിലവിൽ യാതൊരു ഭയവും വേണ്ടെന്നും പൗൾട്രി ഫാമുകളിലേക്ക് രോഗം പടർന്നിട്ടില്ലെന്നും അധികൃതർ അറിയിച്ചു. പൊതുജനങ്ങൾ ആരെങ്കിലും ചത്തതോ രോഗബാധിതരോ ആയ പക്ഷികളെ കണ്ടാൽ തൊടരുതെന്നും, ഉടൻ തന്നെ ഫോട്ടോയോ വീഡിയോയോ എടുത്ത് അടിയന്തര മൃഗരോഗ ഹെൽപ്പ് ലൈൻ നമ്പറായ 1800 675 888-ൽ അറിയിക്കണമെന്നും കർശന നിർദ്ദേശമുണ്ട്.
