റേഡിയോ അവതാരകരായ Kyle Sandilandsയും Jackie “O” Henderson യും തമ്മിലുള്ള തർക്കത്തെ തുടർന്നുണ്ടായ നിയമപോരാട്ടം ARN Mediaയ്ക്ക് $17 മില്യണിലധികം നിയമച്ചെലവ് വരുത്തിയതായി കമ്പനി പുറത്തുവിട്ട സാമ്പത്തിക റിപ്പോർട്ടിൽ വ്യക്തമാക്കി. വെള്ളിയാഴ്ച പ്രസിദ്ധീകരിച്ച അർധവാർഷിക സാമ്പത്തിക ഫലങ്ങൾ പ്രകാരം ARN Mediaയുടെ വരുമാനം 14 ശതമാനം കുറഞ്ഞ് $128 മില്യണായി. കമ്പനിക്ക് $28 മില്യൺ നഷ്ടവും രേഖപ്പെടുത്തി.
Kyle and Jackie O Show തകർന്നതിനെ തുടർന്നുണ്ടായ “ബ്രാൻഡ് സേഫ്റ്റി പ്രശ്നങ്ങളുടെ അവശിഷ്ടങ്ങളും” മുൻ ഫെഡറൽ തിരഞ്ഞെടുപ്പിനെ തുടർന്നുണ്ടായ പരസ്യവരുമാനത്തിലെ ഇടിവുമാണ് വരുമാനത്തെ ബാധിച്ചതെന്ന് ARN ചീഫ് എക്സിക്യൂട്ടീവ് Michael Stephenson പറഞ്ഞു. KIIS Breakfast പരിപാടിയുമായി ബന്ധപ്പെട്ട പ്രശ്നങ്ങൾ ഉണ്ടായിരുന്നെങ്കിലും ARNയുടെ പ്രേക്ഷക അടിത്തറ ശക്തമാണെന്നും, മെത്രോ റേഡിയോ പരസ്യവരുമാനത്തിലെ വിഹിതം തിരിച്ചുപിടിക്കുകയാണ് അടിയന്തര ലക്ഷ്യമെന്നും Stephenson വ്യക്തമാക്കി.
ARNയുടെ $17 മില്യണിലധികം വരുന്ന നിയമച്ചെലവിൽ Kyle Sandilandsനുമായുള്ള അന്യായ പിരിച്ചുവിടൽ തർക്കം പരിഹരിക്കാൻ നൽകിയ $12 മില്യൺ സെറ്റിൽമെന്റും ഉൾപ്പെടുന്നു. എന്നാൽ കമ്പനിയുടെ നിയമപോരാട്ടം ഇതോടെ അവസാനിക്കുന്നില്ല. Jackie O Henderson ഉന്നയിച്ച $80 മില്യൺ കരാർ അവകാശവാദം സംബന്ധിച്ച കേസ് ഒക്ടോബറിൽ Federal Courtൽ ARN നേരിടാനിരിക്കുകയാണ്. നിലവിലെ നിയമനടപടികൾ പൂർത്തിയാകുന്നതുവരെ ഡിവിഡന്റ് വിതരണം നിർത്തിവയ്ക്കുമെന്നും കമ്പനി അറിയിച്ചു. അർധവാർഷിക സാമ്പത്തിക ഫലങ്ങൾ പ്രതീക്ഷിച്ച നിലവാരത്തിലെത്തിയില്ലെന്ന് ARN ചെയർമാൻ Hamish McLennan സമ്മതിച്ചു. സാമ്പത്തിക സ്ഥിതി മെച്ചപ്പെടുത്തുന്നതിനായി Sandilandsുമായുള്ള നിയമതർക്കം ഒത്തുതീർപ്പാക്കുകയും ഹോങ്കോങ് ആസ്ഥാനമായുള്ള പരസ്യ ബിസിനസ് Cody വിൽക്കാൻ തീരുമാനിക്കുകയും ചെയ്തിട്ടുണ്ട്. പോർട്ട്ഫോളിയോ ലളിതമാക്കുക, കമ്പനിയുടെ സാമ്പത്തിക അടിത്തറ ശക്തിപ്പെടുത്തുക, ചെലവ് ഘടന പുനഃക്രമീകരിക്കുക, സ്ഥിരതയാർന്ന വളർച്ച സാധ്യമാക്കുന്ന ബിസിനസുകളിൽ കൂടുതൽ ശ്രദ്ധ കേന്ദ്രീകരിക്കുക എന്നിവയാണ് ലക്ഷ്യമെന്ന് McLennan പറഞ്ഞു.
Kyle and Jackie O Showയുടെ തകർച്ച ഫെബ്രുവരിയിൽ ഇരുവരും തമ്മിലുണ്ടായ ഓൺ-എയർ തർക്കത്തിന് പിന്നാലെയായിരുന്നു. Henderson പരിപാടിയിൽ നിന്ന് ഇറങ്ങിപ്പോയതിനു പിന്നാലെ തിരിച്ചെത്താൻ വിസമ്മതിക്കുകയും Sandilandsനൊപ്പം ഇനി പ്രവർത്തിക്കില്ലെന്ന് ARNനെ അറിയിക്കുകയും ചെയ്തു. Sandilands തന്നെ ഭീഷണിപ്പെടുത്തുകയും മാനസികമായി പീഡിപ്പിക്കുകയും ചെയ്തതായി Henderson ആരോപിച്ചിരുന്നെങ്കിലും അദ്ദേഹം ആരോപണം നിഷേധിച്ചു. 2023ൽ ഇരുവരുടെയും പരിപാടിക്കായി 10 വർഷത്തേക്ക് $200 മില്യൺ മൂല്യമുള്ള കരാറിന് അംഗീകാരം നൽകിയ ARN പിന്നീട് Sandilandsന്റെയും Hendersonന്റെയും കരാറുകൾ റദ്ദാക്കുകയായിരുന്നു. ഇതോടെയാണ് ഇരുവരും കമ്പനിക്കെതിരെ നിയമനടപടികൾ ആരംഭിച്ചത്. Kyle and Jackie O Show അവസാനിപ്പിച്ചതിനെ തുടർന്ന് സിഡ്നിയിലും മെൽബണിലും പുതിയ രണ്ട് പ്രഭാത റേഡിയോ പരിപാടികൾ ഈ വർഷം അവസാനം ഔദ്യോഗികമായി ആരംഭിക്കാനാണ് ARN പദ്ധതിയിടുന്നത്.