ഓസ്ട്രേലിയയിൽ പണപ്പെരുപ്പ നിരക്ക് (Inflation) പ്രതീക്ഷിച്ചതിലും കുറഞ്ഞ് മേയ് മാസത്തിൽ 4 ശതമാനത്തിലെത്തി. ബുധനാഴ്ച Australian Bureau of Statistics (ABS) പുറത്തുവിട്ട കണക്കുകൾ പ്രകാരം, കഴിഞ്ഞ 12 മാസത്തെ Consumer Price Index (CPI) ഏപ്രിലിലെ 4.2 ശതമാനത്തിൽ നിന്ന് മേയിൽ 4 ശതമാനമായി കുറഞ്ഞു. സാമ്പത്തിക വിദഗ്ധർ പണപ്പെരുപ്പം 4.3 ശതമാനമായി ഉയരുമെന്നാണ് പ്രവചിച്ചിരുന്നത്. എന്നാൽ അതിന് വിപരീതമായി നിരക്ക് താഴ്ന്നത് സാമ്പത്തിക വിപണികൾക്ക് ആശ്വാസം നൽകുന്ന വാർത്തയായി മാറി.
പണപ്പെരുപ്പം ഇപ്പോഴും Reserve Bank of Australia (RBA) ലക്ഷ്യമിടുന്ന 2 മുതൽ 3 ശതമാനം വരെയുള്ള പരിധിക്ക് മുകളിലാണെങ്കിലും, കഴിഞ്ഞ ഏതാനും മാസങ്ങളിലെ ഏറ്റവും താഴ്ന്ന നിരക്കാണിത്. അതേസമയം, ആർബിഎ പ്രത്യേകമായി നിരീക്ഷിക്കുന്ന ‘Trimmed Mean Inflation’ എന്ന കോർ ഇൻഫ്ലേഷൻ സൂചികയിൽ വർധന രേഖപ്പെടുത്തി. ഈ നിരക്ക് ഏപ്രിലിലെ 3.4 ശതമാനത്തിൽ നിന്ന് മേയിൽ 3.6 ശതമാനമായി ഉയർന്നു. ഭക്ഷ്യവസ്തുക്കളുടേയും ഇന്ധനത്തിന്റേയും വിലകളിലെ വലിയ ചാഞ്ചാട്ടങ്ങൾ ഒഴിവാക്കി കണക്കാക്കുന്ന ഈ സൂചികയാണ് ആർബിഎ പലിശനിരക്ക് സംബന്ധിച്ച തീരുമാനങ്ങളിൽ പ്രധാനമായി പരിഗണിക്കുന്നത്.
പുതിയ കണക്കുകൾ പുറത്തുവന്നതോടെ ആർബിഎയുടെ അടുത്ത പലിശനിരക്ക് തീരുമാനത്തെക്കുറിച്ചുള്ള ചർച്ചകൾ ശക്തമായിട്ടുണ്ട്. പ്രധാന പണപ്പെരുപ്പ നിരക്ക് കുറഞ്ഞെങ്കിലും, കോർ ഇൻഫ്ലേഷൻ ഉയർന്ന നിലയിൽ തുടരുന്നത് ആർബിഎയ്ക്ക് വെല്ലുവിളിയാകുമെന്നാണ് സാമ്പത്തിക വിദഗ്ധരുടെ വിലയിരുത്തൽ. ജൂലൈ, ഓഗസ്റ്റ് മാസങ്ങളിലെ സാമ്പത്തിക വിവരങ്ങളും തൊഴിൽ വിപണി കണക്കുകളും വിലയിരുത്തിയ ശേഷമായിരിക്കും ആർബിഎ അടുത്ത പലിശനിരക്ക് തീരുമാനമെടുക്കുക.