സിഡ്നി: രണ്ട് പതിറ്റാണ്ടുകാലം കൊണ്ട് കെട്ടിപ്പടുത്ത മികച്ച കരിയറും ഉയർന്ന വരുമാനമുള്ള ജോലിയും ഓസ്ട്രേലിയയിലെ സുഖസൗകര്യങ്ങളും ഉപേക്ഷിച്ച് ഇന്ത്യയിലേക്ക് സ്ഥിരതാമസമാക്കാൻ മടങ്ങുന്ന പ്രവാസി ദമ്പതികളുടെ തീരുമാനം ആഗോള പ്രവാസി സമൂഹത്തിൽ വലിയ ചർച്ചയാകുന്നു. ഓസ്ട്രേലിയൻ സ്വദേശിയായ കോർട്ട്നിയെ (Courtney) വിവാഹം ചെയ്ത ലവ്ലീൻ വത്സാണ് (Loveleen Vats) തങ്ങളുടെ ജീവിതം മാറ്റിമറിച്ച ഈ റിവേഴ്സ് മൈഗ്രേഷൻ (Reverse Migration) തീരുമാനം ഇൻസ്റ്റാഗ്രാം വീഡിയോയിലൂടെ പങ്കുവെച്ചത്.
നാട്ടിലുള്ള പ്രായമായ മാതാപിതാക്കൾക്കൊപ്പം ജീവിക്കുക എന്ന അതിതീവ്രമായ ആഗ്രഹമാണ് മടങ്ങാനുള്ള പ്രധാന കാരണമെന്ന് ലവ്ലീൻ വ്യക്തമാക്കുന്നു. ആയിരക്കണക്കിന് കിലോമീറ്ററുകൾ അകലെ നിന്ന് മാതാപിതാക്കളുടെ വാർദ്ധക്യകാലം നഷ്ടപ്പെടുത്താൻ ആഗ്രഹിക്കുന്നില്ലെന്നും, ഓസ്ട്രേലിയയിൽ ജനിച്ചുവളർന്ന മക്കൾക്ക് ഇന്ത്യൻ സംസ്കാരവും മൂല്യങ്ങളും നേരിട്ട് അനുഭവിച്ചറിയാൻ അവസരമൊരുക്കുകയാണ് മറ്റൊരു ലക്ഷ്യമെന്നും ദമ്പതികൾ പറയുന്നു. ഇന്ത്യയിലെ ജീവിതച്ചെലവ്, കുട്ടികളുടെ വിദ്യാഭ്യാസം, ജീവിതരീതിയിലെ മാറ്റങ്ങൾ എന്നിവ മുൻനിർത്തി പലരും ആശങ്കകൾ പങ്കുവെക്കുന്നുണ്ടെങ്കിലും, തിരികെപ്പോക്കിന് തയ്യാറായി ബാഗുകൾ പാക്ക് ചെയ്തുകഴിഞ്ഞതായി ഇവർ വീഡിയോയിലൂടെ വ്യക്തമാക്കി.
