കാൻബറ: ജീവിതച്ചെലവുകൾ കുതിച്ചുയർന്നതോടെ ഓസ്‌ട്രേലിയയിൽ പട്ടിണിയും ഭക്ഷ്യ അരക്ഷിതാവസ്ഥയും നേരിടുന്നവരുടെ എണ്ണത്തിൽ വൻ വർദ്ധനവെന്ന് ഫുഡ്ബാങ്ക് ഓസ്‌ട്രേലിയയുടെ (Foodbank Australia) വാർഷിക റിപ്പോർട്ട്. കഴിഞ്ഞ ഒരു വർഷത്തിനിടെ ഒരു ലക്ഷം കുടുംബങ്ങൾ കൂടി പട്ടിണിയിലേക്ക് തള്ളിവിടപ്പെട്ടതോടെ രാജ്യത്ത് ഭക്ഷ്യക്ഷാമം നേരിടുന്ന വീടുകളുടെ എണ്ണം 3.6 ദശലക്ഷമായി (36 ലക്ഷം) ഉയർന്നു. രാജ്യത്തെ മൂന്നിലൊന്ന് കുടുംബങ്ങളും കഴിഞ്ഞ 12 മാസത്തിനിടെ ഏതെങ്കിലും ഘട്ടത്തിൽ പട്ടിണി നേരിട്ടതായാണ് ഏറ്റവും പുതിയ വിശകലനം വ്യക്തമാക്കുന്നത്.
ഭക്ഷ്യ അരക്ഷിതാവസ്ഥ നേരിട്ടവരിൽ 69 ശതമാനം കുടുംബങ്ങളും തങ്ങളുടെ ജീവിതത്തിൽ ആദ്യമായാണ് ഇത്തരമൊരു ദുരവസ്ഥ അഭിമുഖീകരിക്കുന്നത്. പലിശ നിരക്കുകളിലെ വർദ്ധനവും ജീവിതച്ചെലവിലെ കുതിച്ചുചാട്ടവുമാണ് ജനങ്ങളെ ബാധിക്കുന്നത്. വരുമാനം കുറയുമ്പോൾ വാടക, വൈദ്യുതി, യാത്രാ ചെലവ് എന്നിവയ്ക്ക് മുൻഗണന നൽകുന്ന സാധാരണക്കാർ ഭക്ഷണച്ചെലവുകൾ ആദ്യം വെട്ടിച്ചുരുക്കുന്നതാണ് സ്ഥിതി വഷളാക്കുന്നതെന്ന് ഫുഡ്ബാങ്ക് സിഇഒ കൈലിയ ടിങ്ക് വ്യക്തമാക്കി. 18 മുതൽ 34 വയസ്സ് വരെയുള്ള യുവാക്കളെയും നഗരങ്ങളെ അപേക്ഷിച്ച് ഗ്രാമീണ മേഖലയിലുള്ളവരെയുമാണ് ഈ പ്രതിസന്ധി രൂക്ഷമായി ബാധിച്ചത്. തദ്ദേശീയ (First Nations) ജനവിഭാഗങ്ങളിൽ പകുതിയിലധികം കുടുംബങ്ങളും പട്ടിണിയിലാണെന്നും റിപ്പോർട്ട് ചൂണ്ടിക്കാട്ടുന്നു.
മുഴുവൻ സമയ ജോലിയുള്ളവർ പോലും പലചരക്ക് സാധനങ്ങൾക്കും ബില്ലുകൾ അടയ്ക്കാനും ബുദ്ധിമുട്ടി സൗജന്യ ഭക്ഷണ വിതരണ കേന്ദ്രങ്ങളെ (Food Pantries) ആശ്രയിക്കുന്ന സ്ഥിതിയാണെന്ന് സന്നദ്ധപ്രവർത്തകർ വ്യക്തമാക്കുന്നു. പ്രതിസന്ധി ലഘൂകരിക്കുന്നതിനായി ഫെഡറൽ സർക്കാർ നൽകിയ 700,000 ഡോളറിന്റെ അടിയന്തര ധനസഹായത്തെ ഫുഡ്ബാങ്ക് സ്വാഗതം ചെയ്തു. എന്നിരുന്നാലും പ്രശ്നത്തിന് ശാശ്വത പരിഹാരം കാണാൻ കൃഷി, ആരോഗ്യം, വിദ്യാഭ്യാസം എന്നീ മേഖലകളെ ഏകോപിപ്പിച്ചുള്ള സമഗ്ര പദ്ധതി വേണമെന്ന് സംഘടന ആവശ്യപ്പെട്ടു. 2030-ഓടെ രാജ്യത്തെ എല്ലാ സ്കൂൾ കുട്ടികൾക്കും പ്രാതൽ ഉറപ്പാക്കുന്ന 'ദേശീയ സ്കൂൾ ബ്രേക്ക്ഫാസ്റ്റ് പ്രോഗ്രാം' നടപ്പിലാക്കണമെന്നും ഫുഡ്ബാങ്ക് സർക്കാരിനോട് ശുപാർശ ചെയ്തു.
