സിഡ്നി: 2026 ൽ റിക്കി പോണ്ടിംഗിനെ ഹണ്ട്രഡ് പരിശീലകനായി നിയമിക്കാൻ ആഗ്രഹിച്ച് വെൽഷ് ഫയർ. അടുത്ത വർഷത്തെ ദി ഹണ്ട്രഡ് പതിപ്പിൽ പുരുഷ ടീമിന്റെ മുഖ്യ പരിശീലകനായി റിക്കി പോണ്ടിങ്ങിനെ തിരഞ്ഞെടുക്കാനുള്ള ചർച്ചകൾ പുരോഗമിക്കുകയാണ്. യുകെയിലെ കാർഡിഫ് നഗരത്തിൽ പ്രവർത്തിക്കുന്ന ഒരു ഫ്രാഞ്ചൈസി 100-ബോൾ ക്രിക്കറ്റ് ടീമാണ് വെൽഷ് ഫയർ.
മുൻ ഓസീസ് ക്യാപ്റ്റനായ റിക്കി പോണ്ടിങ് 1995 നും 2012 നും ഇടയിൽ ഓസ്‌ട്രേലിയയ്‌ക്കായി 560 തവണ ക്രീസിൽ ഇറങ്ങിയ പോണ്ടിംഗ്, ടെലിവിഷൻ വിഖ്യാതാവ്, ഫ്രാഞ്ചസി പരിശീലകൻ എന്നീ നിലകളിലാണ് ഇപ്പോൾ തിളങ്ങുന്നത്. 50-കാരനായ ഇദ്ദേഹം നിലവിൽ ഇന്ത്യൻ പ്രീമിയർ ലീഗ് ടീമായ പഞ്ചാബ് കിംഗ്സിന്റെയും യുഎസ്എയിലെ മേജർ ലീഗ് ക്രിക്കറ്റിലെ (എംഎൽസി) വാഷിംഗ്ടൺ ഫ്രീഡത്തിന്റെയും മുഖ്യ പരിശീലകനാണ്.
ഈ വർഷം ദി ഹണ്ടഡ് ഫ്രാഞ്ചൈസികളുടെ വിൽപ്പനയ്ക്കിടെ ഫ്രീഡം ഉടമകൾ വെൽഷ് ഫയറിന്റെ 50% ഓഹരിക്കായി 40 മില്യൺ പൗണ്ട് നൽകിയിരുന്നു.
100-ബോൾ മത്സരത്തിൽ വൻ നിക്ഷേപത്തിന് ശേഷം ദി ഹണ്ടഡ് ഒരു പുതിയ യുഗത്തിലേക്ക് കടക്കുമ്പോൾ, ടീമിനെ ഉത്തേജിപ്പിക്കാൻ വ്യക്തിത്വം, പ്രശസ്തി, പരിശീലന വൈദഗ്ധ്യം എന്നിവയുള്ള വ്യക്തിയായാണ് പോണ്ടിംഗിനെ കാണുന്നത്.
2015-ൽ മുംബൈ ഇന്ത്യൻസിനെ ഐപിഎൽ കിരീടത്തിലേക്ക് നയിച്ച പോണ്ടിംഗ്, പിന്നീട് ഏഴ് വർഷം ഡൽഹി ക്യാപിറ്റൽസിന്റെ പരിശീലകനായിരുന്നു, അവിടെ അവർ മൂന്ന് തവണ പ്ലേ-ഓഫുകളിൽ എത്തി.
യുണൈറ്റഡ് സ്റ്റേറ്റ്സിൽ, 2024-ൽ അദ്ദേഹം ഫ്രീഡത്തിന്റെ ആദ്യ എംഎൽസി കിരീടത്തിലേക്ക് നയിച്ചു. ഈ വർഷത്തെ ഫൈനലിൽ എംഐ ന്യൂയോർക്കിനോട് നേരിയ തോൽവിയോടെ തുടർച്ചയായ രണ്ടാം കിരീടം നഷ്ടപ്പെട്ടു.
2019-ൽ ഇംഗ്ലണ്ട് ആൻഡ് വെയിൽസ് ക്രിക്കറ്റ് ബോർഡ് (ഇസിബി) പോണ്ടിംഗിനെ ഹണ്ടഡ് പരിശീലക സ്ഥാനത്തേക്ക് പരിഗണിച്ചിരുന്നെങ്കിലും പിന്നീടത് മുടങ്ങി.
2024-ൽ മാത്യു മോട്ടിനെ പകരം ഇംഗ്ലണ്ടിന്റെ വൈറ്റ്-ബോൾ പരിശീലകനായി പോണ്ടിംഗിന്റെ പേര് ഉയർന്നുവെങ്കിലും സമയ പ്രതിസന്ധിമൂലം അദ്ദേഹം അത് നിരസിച്ചു.
