മെൽബൺ: ക്രിക്കറ്റ് ലോകത്തെ ആവേശം കൊള്ളിച്ചുകൊണ്ട് ഇന്ത്യൻ പ്രീമിയർ ലീഗ് (IPL) മത്സരങ്ങൾ ഓസ്ട്രേലിയൻ മണ്ണിലേക്ക് മാറാൻ ഒരുങ്ങുന്നതായി സൂചന. ടൂർണമെന്റിന്റെ ചരിത്രത്തിലാദ്യമായി ഒരു ഐപിഎൽ പോരാട്ടത്തിന് ആതിഥേയത്വം വഹിക്കാൻ അനുമതി നൽകണമെന്ന് അഭ്യർത്ഥിച്ച് ക്രിക്കറ്റ് ഓസ്ട്രേലിയ (CA) ഭാരതീയ ക്രിക്കറ്റ് കൺട്രോൾ ബോർഡിനെ (BCCI) ഔദ്യോഗികമായി ക്ഷണിച്ചതായി 'ദി സിഡ്നി മോണിംഗ് ഹെറാൾഡ്' റിപ്പോർട്ട് ചെയ്യുന്നു. ഓസ്ട്രേലിയയുടെ ആഭ്യന്തര ടി20 ലീഗായ ബിഗ് ബാഷ് ലീഗിന്റെ (BBL) പുതിയ സീസൺ ചെന്നൈയിൽ വെച്ച് ആരംഭിക്കാൻ ക്രിക്കറ്റ് ഓസ്ട്രേലിയ തീരുമാനിച്ചതിന് തൊട്ടുപിന്നാലെയാണ് ഈ ഐപിഎൽ നിർദ്ദേശവും മുന്നോട്ട് വെച്ചിരിക്കുന്നത്. ഇരു രാജ്യങ്ങളിലെയും ക്രിക്കറ്റ് ബോർഡുകൾ തമ്മിൽ ഇതുസംബന്ധിച്ച പ്രാഥമിക ചർച്ചകൾ ആരംഭിച്ചതായും പ്ലാനുകൾക്ക് അനുകൂലമായ പ്രതികരണമാണ് ലഭിക്കുന്നതെന്നുമാണ് പുറത്തുവരുന്ന വിവരങ്ങൾ.
ഇന്ത്യൻ പ്രധാനമന്ത്രി നരേന്ദ്ര മോദിയും ഓസ്ട്രേലിയൻ പ്രധാനമന്ത്രി ആന്റണി അൽബനീസും മെൽബൺ ക്രിക്കറ്റ് ഗ്രൗണ്ടിൽ വെച്ച് നടത്തിയ ചരിത്രപ്രഖ്യാപനങ്ങളുടെ തുടർച്ചയായാണ് കായികരംഗത്തെ ഈ പുതിയ മാറ്റങ്ങൾ. പുതിയ ഇന്ത്യ-ഓസ്ട്രേലിയ കായിക സഹകരണ റോഡ്മാപ്പിന്റെ (Sports Cooperation Roadmap) ഭാഗമായി വരുന്ന ഡിസംബർ 12-ന് ചെന്നൈയിലെ എം.എ ചിദംബരം സ്റ്റേഡിയത്തിൽ വെച്ച് മെൽബൺ റെനഗേഡ്സും നിലവിലെ ചാമ്പ്യന്മാരായ പെർത്ത് സ്കോർച്ചേഴ്സും തമ്മിൽ ബിബിഎൽ ഉദ്ഘാടന മത്സരത്തിൽ ഏറ്റുമുട്ടും. ഒരു വിദേശ ടി20 ഫ്രാഞ്ചൈസി ലീഗ് മത്സരം ഇന്ത്യയിൽ നടക്കുന്നത് ഇതാദ്യമായാണ്. ഇന്ത്യയിലുടനീളം ഓസ്ട്രേലിയൻ കായികരംഗവും സംസ്കാരവും ബിസിനസും പ്രദർശിപ്പിക്കുന്നതിനായി സംഘടിപ്പിക്കുന്ന 'ഗുഡ് ഡേ നമസ്തേ' ഫെസ്റ്റിവലിന്റെ പ്രധാന ആകർഷണം കൂടിയായിരിക്കും ഈ ബിബിഎൽ മത്സരം. ഇത്തരത്തിലുള്ള പങ്കാളിത്തം വഴി എല്ലാ വർഷവും ബിബിഎൽ ഉദ്ഘാടന മത്സരം ചെന്നൈയിൽ ഒരു സ്ഥിരം പരിപാടിയാക്കാൻ ക്രിക്കറ്റ് ഓസ്ട്രേലിയ ആഗ്രഹിക്കുന്നുണ്ടെങ്കിലും, ഐപിഎൽ ഓസ്ട്രേലിയയിലേക്ക് കൊണ്ടുപോകുന്നതുൾപ്പെടെയുള്ള പുതിയ മാധ്യമ റിപ്പോർട്ടുകളോട് ബിസിസിഐയോ ക്രിക്കറ്റ് ഓസ്ട്രേലിയയോ ഇതുവരെ ഔദ്യോഗികമായി പ്രതികരിച്ചിട്ടില്ല.
