സിഡ്നി: ഓസ്ട്രേലിയയിലെ സൂപ്പർ ആനുവേഷൻ നിയമത്തിലെ അപാകതകൾ കാരണം 18 വയസ്സിൽ താഴെയുള്ള ലക്ഷക്കണക്കിന് കൗമാരക്കാർക്ക് കോടിക്കണക്കിന് ഡോളർ നഷ്ടമാകുന്നതായി റിപ്പോർട്ട്. നിലവിലെ നിയമപ്രകാരം, ഒരു തൊഴിലുടമയ്ക്ക് കീഴിൽ ആഴ്ചയിൽ 30 മണിക്കൂറിൽ കൂടുതൽ ജോലി ചെയ്താൽ മാത്രമേ 18 വയസ്സിൽ താഴെയുള്ളവർക്ക് സൂപ്പർ ആനുവേഷൻ നൽകേണ്ടതുള്ളൂ. എന്നാൽ പഠനത്തോടൊപ്പം പാർട്ട് ടൈം ജോലി ചെയ്യുന്ന ഭൂരിഭാഗം കൗമാരക്കാർക്കും ഇത്രയും സമയം ജോലി ചെയ്യാൻ സാധിക്കില്ല. ഇത് ഏകദേശം 5 ലക്ഷത്തിലധികം യുവാക്കളുടെ ഭാവി സമ്പാദ്യത്തെ ബാധിക്കുന്നതായാണ് കണ്ടെത്തൽ.
15 വയസ്സുമുതൽ ജോലി ചെയ്തിട്ടും തന്റെ സൂപ്പർ ഫണ്ടിൽ അർഹമായ തുക ലഭിച്ചില്ലെന്ന് 21-കാരിയായ ഗാബി കോളോഫ് പറഞ്ഞു. റീട്ടെയിൽ, ഫാസ്റ്റ് ഫുഡ് മേഖലകളിൽ ജോലി ചെയ്യുന്നവരിൽ ഭൂരിഭാഗവും പെൺകുട്ടികളാണ്. ഇവർക്ക് സൂപ്പർ ആനുവേഷൻ ലഭിക്കാത്തത് രാജ്യത്തെ സ്ത്രീ-പുരുഷ സൂപ്പർ ആനുവേഷൻ വിടവ് (Gender Super Gap) വർദ്ധിപ്പിക്കാൻ കാരണമാകുന്നു. നിലവിൽ വിരമിക്കുന്ന പുരുഷന്മാരേക്കാൾ 25 ശതമാനം കുറഞ്ഞ തുക മാത്രമാണ് സ്ത്രീകൾക്ക് ലഭിക്കുന്നത്. ഈ നിയമം എത്രയും വേഗം പിൻവലിക്കണമെന്ന് സൂപ്പർ മെമ്പേഴ്സ് കൗൺസിൽ സർക്കാരിനോട് ആവശ്യപ്പെട്ടു.
ഈ നിയമം മാറ്റുന്നത് വഴി കമ്പനികൾക്കുണ്ടാകുന്ന അധിക ചിലവ് വളരെ കുറവാണെന്നും എന്നാൽ യുവാക്കളുടെ റിട്ടയർമെന്റ് കാലത്ത് വലിയൊരു തുക സമ്പാദ്യമായി ലഭിക്കാൻ ഇത് സഹായിക്കുമെന്നും വിദഗ്ധർ ചൂണ്ടിക്കാട്ടുന്നു. 1992-ൽ സൂപ്പർ ആനുവേഷൻ ആരംഭിച്ചപ്പോൾ ചെറിയ ബാലൻസുള്ള അക്കൗണ്ടുകളിൽ നിന്ന് സർവീസ് ചാർജ് ഈടാക്കുന്നത് ഒഴിവാക്കാനാണ് 30 മണിക്കൂർ നിയമം കൊണ്ടുവന്നത്. എന്നാൽ ഇന്ന് അത്തരം ഫീസ് ഈടാക്കുന്നതിന് നിയന്ത്രണങ്ങളുള്ളതിനാൽ ഈ നിയമം കാലഹരണപ്പെട്ടതാണെന്ന് ഇവർ വാദിക്കുന്നു. അതേസമയം, ചെറുകിട വ്യാപാരികൾക്ക് ഇത് അധിക സാമ്പത്തിക ബാധ്യതയുണ്ടാക്കുമെന്നും യുവാക്കളുടെ തൊഴിലവസരങ്ങൾ കുറയാൻ ഇടയാക്കുമെന്നും റീട്ടെയിൽ അസോസിയേഷനുകൾ ആശങ്ക പ്രകടിപ്പിച്ചു.