കാൻബറ: ഓസ്ട്രേലിയയിലെ തന്ത്രപ്രധാനമായ അപൂർവ്വ ധാതു ഖനന കമ്പനിയായ 'നോർത്തേൺ മിനറൽസിന്റെ' (Northern Minerals) നിയന്ത്രണം ചൈനീസ് അനുകൂല നിക്ഷേപകർ കൈക്കലാക്കാൻ ശ്രമിക്കുന്നുവെന്ന ആശങ്കയെത്തുടർന്ന് കടുത്ത നടപടിയുമായി ഫെഡറൽ സർക്കാർ. ഹോങ്കോങ് ഇങ് തക് ലിമിറ്റഡ് (Hong Kong Ying Tak Ltd) ഉൾപ്പെടെയുള്ള ആറ് ചൈനീസ് ബന്ധമുള്ള കമ്പനികളോടും വ്യക്തികളോടും തങ്ങളുടെ കൈവശമുള്ള 15 മുതൽ 20 ശതമാനം വരെയുള്ള ഓഹരികൾ രണ്ട് ആഴ്ചയ്ക്കകം വിറ്റഴിക്കാൻ ഫെഡറൽ ട്രഷറർ ജിം ചാൽമേഴ്സ് ഉത്തരവിട്ടു. രാജ്യതാത്പര്യവും വിദേശ നിക്ഷേപ ചട്ടങ്ങളും സംരക്ഷിക്കുന്നതിനാണ് ഈ അടിയന്തിര നടപടിയെന്ന് ട്രഷറി വിഭാഗം വ്യക്തമാക്കി.
സൈനിക ആവശ്യങ്ങൾക്കും കമ്പ്യൂട്ടറുകൾക്കും ക്ലീൻ എനർജി സാങ്കേതികവിദ്യകൾക്കും അത്യന്താപേക്ഷിതമായ ഡിസ്പ്രോസിയം (Dysprosium), ടെർബിയം (Terbium) എന്നീ അമൂല്യ ധാതുക്കൾ ഉത്പാദിപ്പിക്കുന്ന ബ്രൗൺസ് റേഞ്ച് പ്രൊജക്റ്റാണ് നോർത്തേൺ മിനറൽസ് വികസിപ്പിക്കുന്നത്. അപൂർവ്വ ധാതുക്കളുടെ വിപണിയിലെ ചൈനയുടെ ആധിപത്യം തകർക്കാൻ അമേരിക്കയും ഓസ്ട്രേലിയയും സംയുക്തമായി നടത്തുന്ന ശ്രമങ്ങളിൽ ഈ കമ്പനി നിർണ്ണായക പങ്കുവഹിക്കുന്നുണ്ട്. ഇതിന്റെ ഭാഗമായി യു.എസ് എക്സിം ബാങ്കിൽ നിന്ന് 500 മില്യൺ ഡോളറിന്റെ ധനസഹായവും കമ്പനിക്ക് ലഭിക്കുന്നുണ്ട്. അതുകൊണ്ടുതന്നെ കമ്പനിയുടെ വാണിജ്യപരമായ സുരക്ഷ ഓസ്ട്രേലിയയ്ക്ക് ഏറെ പ്രധാനപ്പെട്ടതാണ്.
കമ്പനിയെ ലക്ഷ്യമിട്ടുള്ള ചൈനീസ് ഗ്രൂപ്പുകളുടെ നീക്കങ്ങൾക്കെതിരെ ഓസ്ട്രേലിയൻ സർക്കാർ മുൻപും ഇടപെടലുകൾ നടത്തിയിട്ടുണ്ട്. കഴിഞ്ഞ വർഷങ്ങളിൽ ചൈനീസ് ഫണ്ടുകൾ ഓഹരി പങ്കാളിത്തം കൂട്ടുന്നത് സർക്കാർ തടയുകയും ചില കമ്പനികളോട് ഓഹരികൾ ഒഴിഞ്ഞുമാറാൻ ആവശ്യപ്പെടുകയും ചെയ്തിരുന്നു. എന്നാൽ മുൻ ഉത്തരവുകൾ ലംഘിച്ച് ചൈനീസ് നിക്ഷേപകർ മറ്റ് കമ്പനികളുടെ പേരിൽ ഓഹരികൾ കൈമാറ്റം ചെയ്തതായി വിദേശ നിക്ഷേപ അവലോകന ബോർഡ് കണ്ടെത്തിയതിനെത്തുടർന്നാണ് ഇപ്പോൾ വീണ്ടും കർശന നടപടിയുണ്ടായിരിക്കുന്നത്. ധാതു വിപണി കേവലം ഒരു വാണിജ്യ വിഷയം മാത്രമല്ലെന്നും അത് രാജ്യത്തിന്റെ സാമ്പത്തിക സുരക്ഷയുമായി നേരിട്ട് ബന്ധപ്പെട്ടിരിക്കുന്നതാണെന്നുമുള്ള ശക്തമായ സന്ദേശമാണ് ഓസ്ട്രേലിയ ഇതിലൂടെ നൽകുന്നതെന്ന് തന്ത്രപ്രധാന നിരീക്ഷകർ വിലയിരുത്തുന്നു.
