കാൻബെറ: നിർമ്മാണ ജോലികൾ നടക്കാത്ത സമയങ്ങളിൽ റോഡ് സൈഡിലെ താൽക്കാലിക വേഗപരിധി നിയന്ത്രണങ്ങൾ ഒഴിവാക്കിക്കൊണ്ടുള്ള ന്യൂ സൗത്ത് വെയ്ൽസ് (NSW) സർക്കാരിന്റെ പുതിയ പരിഷ്കാരം ഓസ്ട്രേലിയൻ കാപിറ്റൽ ടെറിട്ടറിയും (ACT) മാതൃകയാക്കണമെന്ന് എൻആർഎംഎ (NRMA). സുരക്ഷയെ ബാധിക്കാത്ത പക്ഷം, കർഷകർക്കും ദീർഘദൂര യാത്രികർക്കും ഏറെ ഉപകാരപ്പെടുന്ന പ്രായോഗികമായ ഈ സമീപനം മറ്റ് സംസ്ഥാനങ്ങളും നടപ്പിലാക്കണമെന്ന് എൻആർഎംഎ വക്താവ് പീറ്റർ ഖൗറി ആവശ്യപ്പെട്ടു. എൻഎസ്ഡബ്ല്യുവിൽ പ്രാബല്യത്തിൽ വന്ന പുതിയ നിയമപ്രകാരം ജീവനക്കാർ ജോലിയിലില്ലാത്ത സമയങ്ങളിൽ റോഡ് സുരക്ഷിതമാണെങ്കിൽ വേഗപരിധി കാണിക്കുന്ന ബോർഡുകൾ മാറ്റേണ്ടതുണ്ട്.
എന്നാൽ എസിടിയിൽ നിലവിൽ റോഡ് ജോലികൾ നടക്കുന്ന മേഖലകളിൽ 24 മണിക്കൂറും കുറഞ്ഞ വേഗപരിധിയാണ് നിശ്ചയിച്ചിരിക്കുന്നത്. വാരാന്ത്യങ്ങളിലും മറ്റും നിർമ്മാണ പ്രവർത്തനങ്ങൾ നിർത്തിവെക്കുമ്പോഴും കിലോമീറ്ററുകളോളം വേഗത കുറച്ച് ഓടിക്കേണ്ടി വരുന്നത് കൻബെറയിലെ ഡ്രൈവർമാരിൽ വലിയ അമർഷത്തിന് കാരണമാകുന്നുണ്ട്. അതേസമയം, കൻബെറയിലെ വില്യം ഹോവൽ ഡ്രൈവ് (William Hovell Drive) ഇരട്ടിപ്പിക്കുന്നതുമായി ബന്ധപ്പെട്ട വലിയ നിർമ്മാണ മേഖലകളിൽ വേഗത ലംഘിക്കുന്നവരെ കണ്ടെത്താൻ കർശന പരിശോധന ആരംഭിച്ചതായി എസിടി ട്രാഫിക് വിഭാഗം അറിയിച്ചു. ഇവിടെ വേഗപരിധി 90 കിലോമീറ്ററിൽ നിന്നും 60 ആയി കുറച്ചിട്ടുണ്ട്. നിർമ്മാണ ജോലികൾ നടക്കാത്ത സമയങ്ങളിൽ പോലും റോഡരികിൽ കനത്ത യന്ത്രസാമഗ്രികൾ ഉണ്ടാകാമെന്നും റോഡിന്റെ അവസ്ഥ പൂർണ്ണതോതിൽ ആയിരിക്കില്ലെന്നും അതുകൊണ്ട് വേഗത കുറയ്ക്കുന്നത് യാത്രക്കാരുടെ സുരക്ഷയ്ക്ക് കൂടിയാണെന്നും എസിടി പോലീസ് വ്യക്തമാക്കി. എങ്കിലും എൻഎസ്ഡബ്ല്യു നടപ്പിലാക്കിയ പുതിയ രീതിയുടെ പുരോഗതി നിരീക്ഷിച്ച ശേഷം എസിടിയിലും മാറ്റങ്ങൾ വരുത്തുന്ന കാര്യം ആലോചിക്കുമെന്ന് ട്രാഫിക് അധികൃതർ സൂചിപ്പിച്ചു.
