നികുതി റിട്ടേൺ സമർപ്പിക്കുന്ന സമയത്ത് വലിയ പിഴവുകൾ വരുത്തരുതെന്ന് ഓസ്ട്രേലിയൻ ടാക്സേഷൻ ഓഫീസ് (ATO) ദശലക്ഷക്കണക്കിന് നികുതിദായകർക്ക് മുന്നറിയിപ്പ് നൽകി. തൊഴിലുടമകൾ, ബാങ്കുകൾ, ഇൻഷുറൻസ് കമ്പനികൾ തുടങ്ങിയ വിവിധ സ്ഥാപനങ്ങളിൽ നിന്ന് ലഭിച്ച 10 കോടിയിലധികം പ്രീ-ഫിൽഡ് വിവരങ്ങൾ ഉപയോഗിച്ച് വ്യക്തിഗത നികുതി റിട്ടേണുകൾ സമർപ്പിക്കാൻ ഓസ്ട്രേലിയക്കാർക്ക് ഇപ്പോൾ സാധിക്കും. നികുതി റിട്ടേൺ സ്വയം തയ്യാറാക്കുമ്പോൾ ഉണ്ടാകുന്ന പിഴവുകൾ കുറയ്ക്കാനും നടപടികൾ വേഗത്തിലാക്കാനും ഈ പ്രീ-ഫിൽഡ് വിവരങ്ങൾ സഹായിക്കും.
എന്നാൽ, പ്രീ-ഫിൽഡ് വിവരങ്ങൾ ലഭ്യമാണെന്ന കാരണത്താൽ എല്ലാം പരിശോധിക്കാതെ റിട്ടേൺ സമർപ്പിക്കരുതെന്ന് ATO മുന്നറിയിപ്പ് നൽകി. ഇതിനിടെ, അടുത്തിടെ പ്രഖ്യാപിച്ച 1,000 ഓസ്ട്രേലിയൻ ഡോളർ വരെ നികുതി ഇളവ് ഈ വർഷത്തെ നികുതി റിട്ടേണിൽ ഉൾപ്പെടുത്തി ക്ലെയിം ചെയ്യാൻ ശ്രമിക്കരുതെന്നും ATO വ്യക്തമാക്കി. ട്രഷറർ ജിം ചാൽമേഴ്സ് ഏപ്രിലിൽ പ്രഖ്യാപിച്ച പുതിയ നികുതി ഇളവ് 2027ലെ നികുതി സീസൺ മുതലാണ് പ്രാബല്യത്തിൽ വരുന്നത്. അതിനാൽ 2025-26 സാമ്പത്തിക വർഷത്തേക്കുള്ള ഈ വർഷത്തെ നികുതി റിട്ടേണിൽ ഇത് ക്ലെയിം ചെയ്യാൻ കഴിയില്ല. അടുത്ത വർഷം ഏകദേശം 62 ലക്ഷം ഓസ്ട്രേലിയക്കാർക്ക് ഈ ഇളവിന് അർഹതയുണ്ടാകുമെന്നാണ് പ്രതീക്ഷ. ഒരാൾക്ക് ശരാശരി 205 ഓസ്ട്രേലിയൻ ഡോളർ വരെ ലാഭിക്കാനാകും.
അതേസമയം, നികുതി റിട്ടേൺ തയ്യാറാക്കുമ്പോൾ AI പ്ലാറ്റ്ഫോമുകളെയോ സാമ്പത്തിക ഉപദേശങ്ങൾ നൽകുന്ന സോഷ്യൽ മീഡിയ ഇൻഫ്ലുവൻസർമാരെയോ ('finfluencers') അന്ധമായി ആശ്രയിക്കരുതെന്നും ATO മുന്നറിയിപ്പ് നൽകി.
“നിങ്ങളുടെ പ്രീ-ഫിൽഡ് വിവരങ്ങൾ കൃത്യമാണെന്ന് ഉറപ്പാക്കുക. എല്ലാ വരുമാനവും പ്രഖ്യാപിക്കുകയും നിങ്ങൾക്ക് നിയമപരമായി അർഹതയുള്ള നികുതി ഇളവുകൾ മാത്രം ക്ലെയിം ചെയ്യുകയും ചെയ്യുക,” ATO അസിസ്റ്റന്റ് കമ്മീഷണർ അനിത ചാലൻ പറഞ്ഞു. നികുതി റിട്ടേണിലെ വിവരങ്ങൾ ശരിയും സത്യവുമാണെന്ന് പ്രഖ്യാപിക്കുന്ന നിയമപരമായ ഉത്തരവാദിത്തമാണ് നികുതിദായകർക്കുള്ളതെന്നും അവർ ഓർമിപ്പിച്ചു. അനുവദനീയമായതിലധികം നികുതി ഇളവുകൾ ക്ലെയിം ചെയ്യുക, ചെലവുകൾ കൃത്രിമമായി വർധിപ്പിച്ച് കാണിക്കുക, സൈഡ് ജോലികളിൽ നിന്നുള്ള വരുമാനമോ കാഷ് ജോലികളിൽ നിന്നുള്ള വരുമാനമോ റിപ്പോർട്ട് ചെയ്യാതിരിക്കുക തുടങ്ങിയവയാണ് നികുതിദായകർ ഒഴിവാക്കേണ്ട മറ്റ് പിഴവുകൾ.
നികുതി റിട്ടേൺ സമർപ്പിക്കുന്നതിന് മുമ്പ് ATOയുടെ ഔദ്യോഗിക മാർഗനിർദേശങ്ങൾ പരിശോധിക്കാനും വിവരങ്ങൾ ശ്രദ്ധാപൂർവം വിലയിരുത്താനും തട്ടിപ്പുകളിൽ ജാഗ്രത പാലിക്കാനും ATO നിർദേശിച്ചു. സ്വയം നികുതി റിട്ടേൺ സമർപ്പിക്കുന്നവർക്ക് ഒക്ടോബർ 31 വരെ സമയമുണ്ട്. ടാക്സ് ഏജന്റിന്റെ സഹായം തേടുന്നവർക്ക് കൂടുതൽ സമയം ലഭിച്ചേക്കാം. എന്നാൽ ഒക്ടോബർ 31നകം ടാക്സ് ഏജന്റുമായി രജിസ്റ്റർ ചെയ്തിരിക്കണം.