ചൂതാട്ട പരസ്യ പരിഷ്കാരങ്ങൾക്കെതിരെ ഡേവിഡ് പോക്കോക്ക്

കാൻബറ: വിവാദ ചൂതാട്ട പരിഷ്കാരങ്ങളുമായി മുന്നോട്ടുപോകുന്ന ലേബർ സർക്കാരിനെ വിമർശിച്ച് സ്വതന്ത്ര സെനറ്റർ ഡേവിഡ് പോക്കോക്ക്. നിയമനിർമാണം സെനറ്റിലേക്ക് കടക്കാനിരിക്കെ, പ്രതിപക്ഷമായ കോയലിഷന്റെ പിന്തുണയോടെ ബിൽ പാസാകുമെന്ന് ഉറപ്പായ സാഹചര്യത്തിലാണ് പോക്കോക്കിന്റെ വിമർശനം. Interactive Gambling Amendment (Gambling Reform) Bill 2026 ചൊവ്വാഴ്ച പ്രതിനിധിസഭയിൽ 103-14 വോട്ടുകൾക്ക് പാസായി. ചൂതാട്ട പരസ്യങ്ങൾക്ക് ഭാഗിക നിയന്ത്രണം ഏർപ്പെടുത്തുക, ഉപഭോക്താക്കളുടെ ചൂതാട്ട പ്രവർത്തനത്തെ അടിസ്ഥാനമാക്കി കമ്മീഷൻ നൽകുന്നത് നിയന്ത്രിക്കുക, കൂടാതെ ഓൺലൈൻ ചൂതാട്ട പരസ്യങ്ങളിൽ നിന്ന് ഒഴിവാകാൻ പുതിയ രജിസ്റ്റർ സംവിധാനം ഏർപ്പെടുത്തുക എന്നിവയാണ് പ്രധാന മാറ്റങ്ങൾ.

ഓൺലൈൻ ചൂതാട്ട കമ്പനികൾക്ക് ചുമത്തുന്ന ലെവിയിലൂടെയായിരിക്കും പുതിയ opt-out രജിസ്റ്റർ സംവിധാനത്തിന് ധനസഹായം നൽകുക. പരിഷ്കാരങ്ങൾ ഓസ്‌ട്രേലിയക്കാരെ “വലിയ രീതിയിൽ നിരാശരാക്കുമെന്ന്” പോക്കോക്ക് പറഞ്ഞു. അന്തരിച്ച ലേബർ എംപി പെറ്റ മർഫിയുടെ നേതൃത്വത്തിൽ തയ്യാറാക്കിയ ‘You Win Some, You Lose More’ റിപ്പോർട്ട് സർക്കാർ അവഗണിച്ചതായും അദ്ദേഹം ആരോപിച്ചു. ഓൺലൈൻ ചൂതാട്ട പരസ്യങ്ങൾക്ക് പൂർണ നിരോധനം വേണമെന്നതായിരുന്നു മർഫി റിപ്പോർട്ടിലെ പ്രധാന ശുപാർശകളിലൊന്ന്. എന്നാൽ 1000 ദിവസത്തിലേറെ വൈകി മേയിൽ പുറത്തിറക്കിയ ഔദ്യോഗിക പ്രതികരണത്തിൽ സർക്കാർ ഈ നിർദേശം തള്ളുകയായിരുന്നു. “ടിവിയിൽ മണിക്കൂറിൽ മൂന്ന് പരസ്യങ്ങൾ അനുവദിക്കുകയും ഓൺലൈനിൽ പ്രായോഗികമായി നടപ്പാക്കാൻ ബുദ്ധിമുട്ടുള്ള opt-out സംവിധാനം കൊണ്ടുവരികയും ചെയ്തിട്ട് ‘സന്തുലിതാവസ്ഥ കണ്ടെത്തുകയാണ്’ എന്നാണ് സർക്കാർ പറയുന്നത്,” പോക്കോക്ക് ABC News Breakfast-നോട് പറഞ്ഞു. ചൂതാട്ട കമ്പനികളുടെ സ്വാധീനം കാരണം രാജ്യത്ത് തെളിവുകളെ അടിസ്ഥാനമാക്കിയുള്ള നയരൂപീകരണം നടക്കാത്തത് ദുഃഖകരമാണെന്നും കുട്ടികളെയും സാധാരണ ഓസ്‌ട്രേലിയക്കാരെയും ചൂതാട്ട കമ്പനികളേക്കാൾ മുൻഗണന നൽകേണ്ടതുണ്ടെന്നും അദ്ദേഹം പറഞ്ഞു. ദേശീയ ചൂതാട്ട റെഗുലേറ്റർ രൂപീകരിക്കണമെന്നതും ചൂതാട്ടവുമായി ബന്ധപ്പെട്ട inducements പൂർണമായും ഉടൻ നിരോധിക്കണമെന്നതുമടക്കമുള്ള മർഫി റിപ്പോർട്ടിലെ മറ്റ് ശുപാർശകളും സർക്കാർ അവഗണിച്ചതായി പോക്കോക്ക് ആരോപിച്ചു.

കോയലിഷനിലും എതിർപ്പ്

ലേബർ സർക്കാർ അംഗീകരിച്ച 16 ഭേദഗതികളുടെ അടിസ്ഥാനത്തിലാണ് കോയലിഷൻ ബില്ലിന് പിന്തുണ നൽകിയത്. എന്നാൽ ആറ് കോയലിഷൻ അംഗങ്ങൾ ബിൽ കൂടുതൽ ശക്തമാകേണ്ടതുണ്ടെന്ന് നിലപാടെടുത്തു. നാഷണൽസ് എംപി പാറ്റ് കോനഗനും ലിബറൽ എംപി ആൻഡ്രൂ വാലസും പാർട്ടി നിലപാടിന് വിരുദ്ധമായി പ്രതിനിധിസഭയിൽ വോട്ട് ചെയ്തു. “എന്റെ കരിയറിൽ ഒരിക്കൽ മാത്രം ലഭിക്കുന്ന തരത്തിലുള്ള അവസരമാണിത്. ഈ ബിൽ മതിയായ പരിഷ്കാരം കൊണ്ടുവരുന്നില്ല,” വാലസ് ABC Radio National-നോട് പറഞ്ഞു. ചൂതാട്ട കമ്പനികളെയാണ് പ്രശ്നചൂതാട്ടക്കാരെ തിരിച്ചറിയുന്ന ചുമതല ഏൽപ്പിക്കുന്നതെന്നും അവരെ വിശ്വസിക്കാൻ കഴിയില്ലെന്നും അദ്ദേഹം വിമർശിച്ചു. ലേബർ അംഗീകരിച്ച ഭേദഗതികളിൽ തത്സമയ കായിക മത്സരങ്ങൾക്ക് മുമ്പുള്ള ചൂതാട്ട പരസ്യങ്ങളുടെ ബ്ലാക്ക്ഔട്ട് കാലയളവ് അഞ്ച് മിനിറ്റിൽ നിന്ന് 15 മിനിറ്റാക്കുന്നതും, ടിവി-റേഡിയോ പരസ്യ നിയന്ത്രണങ്ങളുടെ ആരംഭ സമയം രാവിലെ ആറുമണിയിൽ നിന്ന് അഞ്ചുമണിയാക്കുന്നതും ഉൾപ്പെടുന്നു. ഉപഭോക്താവിന്റെ പ്രവർത്തനത്തെ അടിസ്ഥാനമാക്കി ചൂതാട്ട കമ്പനികൾ കമ്മീഷൻ നൽകുന്നതും നിരോധിക്കും. BetStop-ൽ നിന്ന് deregister ചെയ്തതിന് ശേഷമുള്ള മൂന്ന് മാസത്തേക്ക് inducements നിരോധിക്കാനും opt-out ഓപ്ഷനുകൾ പ്രദർശിപ്പിക്കാത്ത കമ്പനികൾക്കെതിരെ ശക്തമായ പിഴ ചുമത്താനും വ്യവസ്ഥയുണ്ട്.