സിഡ്നി: ഫ്രാൻസിലും സ്പെയിനിലും വ്യാപക നാശം വിതയ്ക്കുന്ന കാട്ടുതീയുടെ പശ്ചാത്തലത്തിൽ, വരാനിരിക്കുന്ന വേനൽക്കാലത്ത് ഓസ്ട്രേലിയയും സമാനമായ ബുഷ്ഫയർ ഭീഷണി നേരിടാൻ സാധ്യതയുണ്ടെന്ന് വിദഗ്ധർ മുന്നറിയിപ്പ് നൽകി. അടുത്തിടെ രാജ്യത്തിന്റെ പുതിയ അടിയന്തര മുന്നറിയിപ്പ് സംവിധാനമായ AusAlert വിജയകരമായി പരീക്ഷിച്ചതിന് പിന്നാലെയാണ് മുന്നറിയിപ്പ്. ഫ്രാൻസ്, സ്പെയിൻ എന്നിവിടങ്ങളിൽ ആയിരക്കണക്കിന് ആളുകളെ ഒഴിപ്പിക്കേണ്ടി വന്ന സാഹചര്യത്തിൽ, ഉത്തരാർദ്ധഗോളത്തിൽ പടരുന്ന കാട്ടുതീ ഓസ്ട്രേലിയയും ഗൗരവമായി കാണണമെന്ന് ന്യൂ സൗത്ത് വെയിൽസ് സർവകലാശാലയിലെ ബുഷ്ഫയർ വിദഗ്ധൻ പ്രൊഫസർ ജേസൺ ഷാർപ്ലസ് പറഞ്ഞു. "യൂറോപ്പ് മാത്രമല്ല, ഉത്തരാർദ്ധഗോളത്തിന്റെ പല ഭാഗങ്ങളും കാട്ടുതീയുടെ പിടിയിലാണ്. ദീർഘകാല വരൾച്ച, അതിശക്തമായ ചൂട്, ഉണങ്ങിയ സസ്യങ്ങൾ, ശക്തമായ കാറ്റ് എന്നിവ ചേർന്നതാണ് തീ അതിവേഗം പടരാൻ കാരണമാകുന്നത്," അദ്ദേഹം പറഞ്ഞു. ഈ വർഷം ഓസ്ട്രേലിയയിൽ ശരാശരിയേക്കാൾ കുറഞ്ഞ മഴയും ഉയർന്ന താപനിലയും പ്രതീക്ഷിക്കുന്നതിനാൽ ബുഷ്ഫയർ സാധ്യത വർധിക്കുമെന്ന് അദ്ദേഹം ചൂണ്ടിക്കാട്ടി. നിലവിൽ തെക്കുകിഴക്കൻ ഓസ്ട്രേലിയയിലെ മണ്ണിൽ ഈർപ്പം നിലനിൽക്കുന്നുണ്ടെങ്കിലും അത് വേഗത്തിൽ കുറഞ്ഞ് വലിയ തീപിടിത്തത്തിന് അനുകൂല സാഹചര്യം രൂപപ്പെടാമെന്നും അദ്ദേഹം മുന്നറിയിപ്പ് നൽകി.
NRMA Insurance കാലാവസ്ഥാ വിദഗ്ധ കാത്രിൻ ടർണറും യൂറോപ്പിലെയും വടക്കേ അമേരിക്കയിലെയും കാട്ടുതീ ഓസ്ട്രേലിയക്കാർക്ക് മുന്നറിയിപ്പാണെന്ന് പറഞ്ഞു. കടുത്ത ചൂടും കുറഞ്ഞ മഴയും ചേർന്നാൽ തീ എളുപ്പത്തിൽ പടരുന്ന സാഹചര്യം സൃഷ്ടിക്കുമെന്നും, ശക്തമായ എൽ നിനോ പ്രതിഭാസം രാജ്യത്തിന്റെ പല ഭാഗങ്ങളിലും കൂടുതൽ ചൂടും വരണ്ട കാലാവസ്ഥയും ഉണ്ടാക്കുമെന്നുമാണ് വിലയിരുത്തൽ. വരൾച്ച, ഉയർന്ന താപനില, കുറഞ്ഞ ആർദ്രത, ശക്തമായ കാറ്റ്, ഉണങ്ങിയ ഇലകളും പുല്ലുകളും ഉൾപ്പെടെയുള്ള കത്താൻ സാധ്യതയുള്ള വസ്തുക്കളുടെ സാന്നിധ്യം എന്നിവ ഒരുമിക്കുമ്പോഴാണ് ഏറ്റവും അപകടകരമായ ബുഷ്ഫയറുകൾ ഉണ്ടാകുന്നതെന്ന് വിദഗ്ധർ പറയുന്നു. ചില തീപിടിത്തങ്ങൾ അത്രയും തീവ്രമാകുമ്പോൾ സ്വന്തം കാലാവസ്ഥാ സംവിധാനങ്ങൾ തന്നെ സൃഷ്ടിക്കാറുണ്ടെന്നും, ഫ്രാൻസിലെ ബോർഡോയ്ക്ക് സമീപം ആദ്യമായി രേഖപ്പെടുത്തിയ പൈറോക്യുമുലോണിംബസ് (Fire Thunderstorm) അതിന്റെ ഉദാഹരണമാണെന്നും പ്രൊഫസർ ഷാർപ്ലസ് പറഞ്ഞു. ഇത്തരം തീപിടിത്തങ്ങൾ പ്രവചിക്കാനും നിയന്ത്രിക്കാനും അതീവ ബുദ്ധിമുട്ടാണെന്നും അദ്ദേഹം വ്യക്തമാക്കി.
AusAlert ഒക്ടോബറിൽ പ്രവർത്തനം ആരംഭിക്കും
ഓസ്ട്രേലിയയുടെ പുതിയ ദേശീയ അടിയന്തര മുന്നറിയിപ്പ് സംവിധാനമായ AusAlert അടുത്തിടെ വിജയകരമായി പരീക്ഷിച്ചതായി അടിയന്തര മാനേജ്മെന്റ് മന്ത്രി ക്രിസ്റ്റി മക്ബെയ്ൻ അറിയിച്ചു. ഒക്ടോബർ മുതൽ സംവിധാനം രാജ്യത്ത് നടപ്പാക്കാനാണ് സർക്കാർ ലക്ഷ്യമിടുന്നത്. അതേസമയം, AusAlert മാത്രം മതിയാകില്ലെന്നും അടിയന്തര സാഹചര്യങ്ങളിൽ ഔദ്യോഗിക വെബ്സൈറ്റുകൾ, റേഡിയോ, സോഷ്യൽ മീഡിയ, പ്രാദേശിക സമൂഹ ശൃംഖലകൾ തുടങ്ങിയ വിവിധ മാർഗങ്ങളിലൂടെ വിവരങ്ങൾ പിന്തുടരണമെന്നും വിദഗ്ധർ നിർദേശിച്ചു.
പലരും ഇപ്പോഴും തയ്യാറല്ല
NRMA ഇൻഷുറൻസിന്റെ പഠനമനുസരിച്ച്, ഓസ്ട്രേലിയയിലെ 26 ശതമാനം ആളുകൾ ബുഷ്ഫയർ അല്ലെങ്കിൽ പുല്ലുതീ ഭീഷണിയുള്ള പ്രദേശങ്ങളിലാണ് താമസിക്കുന്നത്. എന്നാൽ ഇവരിൽ 42 ശതമാനം പേർ ഇത്തരം ദുരന്തങ്ങളെ നേരിടാൻ തങ്ങൾ തയ്യാറല്ലെന്ന് വ്യക്തമാക്കിയിട്ടുണ്ട്. വീടിന് ചുറ്റുമുള്ള ഉണങ്ങിയ ഇലകളും മാലിന്യങ്ങളും നീക്കം ചെയ്യുക, മരങ്ങൾ വെട്ടിനിർത്തുക, ജനലുകളുടെയും വാതിലുകളുടെയും വിടവുകൾ അടയ്ക്കുക, വീടിന് സമീപത്ത് വിറകുകളും എളുപ്പത്തിൽ തീപിടിക്കുന്ന വസ്തുക്കളും സൂക്ഷിക്കാതിരിക്കുക തുടങ്ങിയ ലളിതമായ മുൻകരുതലുകൾ അപകടസാധ്യത കുറയ്ക്കുമെന്ന് വിദഗ്ധർ നിർദേശിക്കുന്നു. വേനൽക്കാലം ആരംഭിക്കുന്നതിന് മുമ്പ് കുടുംബങ്ങളുടെ ബുഷ്ഫയർ അടിയന്തര പദ്ധതികൾ പുതുക്കുകയും, പ്രാദേശിക അപകടസാധ്യതകൾ മനസ്സിലാക്കുകയും, ഔദ്യോഗിക മുന്നറിയിപ്പുകൾ നിരന്തരം ശ്രദ്ധിക്കുകയും ചെയ്യണമെന്ന് വിദഗ്ധർ ഓർമ്മിപ്പിച്ചു.