ക്യാൻബറ: ഡേറ്റിംഗ് ആപ്പിലൂടെ പരിചയപ്പെട്ട യുവതിയെ ലൈംഗികമായി ഉപദ്രവിച്ച കേസിൽ ശിക്ഷിക്കപ്പെട്ട 36-കാരനായ സ്റ്റീവൻ മുറെയ്ക്ക് ജയിൽ ശിക്ഷ ഒഴിവാക്കി കോടതി ഉത്തരവ്. 2024 ഫെബ്രുവരിയിൽ ടിൻഡർ (Tinder) വഴി പരിചയപ്പെട്ട യുവതിയെയാണ് ഇയാൾ സ്വന്തം വീട്ടിൽ വെച്ച് ഉപദ്രവിച്ചത്. നേരിട്ട് കാണുന്നതിന് മുൻപ് തന്നെ ആദ്യ കൂടിക്കാഴ്ചയിൽ ലൈംഗിക താത്പര്യങ്ങൾ ഇല്ലെന്ന് യുവതി വ്യക്തമാക്കിയിരുന്നെങ്കിലും മുറെ ഇത് അവഗണിച്ച് അതിക്രമം നടത്തുകയായിരുന്നുവെന്ന് കോടതി കണ്ടെത്തി.
യുവതി ആവർത്തിച്ച് "മതി, നിർത്തൂ" എന്ന് പറയുകയും തള്ളിമാറ്റാൻ ശ്രമിക്കുകയും ചെയ്തിട്ടും മുറെ ഉപദ്രവം തുടർന്നതായി ജസ്റ്റിസ് ബെലിൻഡ ബേക്കർ നിരീക്ഷിച്ചു. യുവതി അവിടെനിന്നും രക്ഷപെടാൻ ശ്രമിച്ചപ്പോൾ വാതിലിനോട് ചേർത്ത് നിർത്തി കഴുത്തിന് പിടിക്കുകയും ബലമായി ചുംബിക്കുകയും ചെയ്തതായും കോടതി രേഖപ്പെടുത്തി. മുറെ സ്വന്തം ലൈംഗിക സംതൃപ്തിക്ക് മാത്രമാണ് മുൻഗണന നൽകിയതെന്നും യുവതിയുടെ തീരുമാനങ്ങളെ മാനിച്ചില്ലെന്നും കോടതി ചൂണ്ടിക്കാട്ടി. ഈ അതിക്രമം തന്നെ മാനസികമായി തകർത്തുവെന്ന് ഇരയാക്കപ്പെട്ട യുവതി കോടതിയിൽ വികാരാധീനയായി മൊഴി നൽകി.
18 മാസത്തെ തടവ് ശിക്ഷയാണ് കോടതി വിധിച്ചതെങ്കിലും പ്രതിക്ക് ജയിലിൽ കഴിയേണ്ടി വരില്ല. പകരം കമ്മ്യൂണിറ്റിയിൽ കഴിഞ്ഞുകൊണ്ട് ശിക്ഷ പൂർത്തിയാക്കാനുള്ള 'ഇന്റൻസീവ് കറക്ഷൻസ് ഓർഡർ' (Intensive Corrections Order) ആണ് കോടതി നൽകിയത്. ശിക്ഷാ കാലാവധിയിൽ ലൈംഗിക കുറ്റവാളികൾക്കായുള്ള പ്രത്യേക ചികിത്സയ്ക്കും മാനസികാരോഗ്യ സേവനങ്ങൾക്കും പ്രതി വിധേയനാകണമെന്നും കോടതി ഉത്തരവിട്ടു.
