കാൻബറ: ഓസ്‌ട്രേലിയൻ തലസ്ഥാന പ്രദേശത്തെ (ACT) പൊതുജനാരോഗ്യ മേഖലയെ ഞെട്ടിച്ച് വൻ വെയിറ്റിംഗ് ലിസ്റ്റ് പ്രതിസന്ധി. കാൻബറയിലെ സർക്കാർ ആശുപത്രികളിൽ സ്പെഷ്യലിസ്റ്റ് ഡോക്ടർമാരുടെ അപ്പോയിന്റ്മെന്റിനായി നിലവിൽ 65,000-ത്തിലധികം രോഗികളാണ് കാത്തിരിക്കുന്നത്. കാൻബറയിലെ ആകെ ജനസംഖ്യയുടെ പത്ത് ശതമാനത്തിലധികം വരുന്ന ഈ കണക്ക് ആദ്യമായാണ് കാൻബറ ഹെൽത്ത് സർവീസസ് (CHS) ഔദ്യോഗികമായി പുറത്തുവിടുന്നത്.
കടുത്ത ക്ഷീണം കാരണം സ്കൂളിൽ ശ്രദ്ധ കേന്ദ്രീകരിക്കാൻ കഴിയാത്ത അഞ്ച് വയസ്സുകാരിക്ക് സ്പെഷ്യലിസ്റ്റ് ഡോക്ടറുടെ പരിശോധനയ്ക്കായി മൂന്ന് വർഷത്തിലേറെ കാത്തിരിക്കേണ്ടി വരുമെന്ന് അറിയിച്ചതോടെ കുട്ടിയുടെ കുടുംബം സ്വകാര്യ ആശുപത്രിയെ ആശ്രയിക്കാൻ നിർബന്ധിതരായി. കൈകളിലെ ജനിതക തകരാറിന് ചികിത്സ തേടുന്ന മറ്റൊരു രോഗിക്ക് നാല് വർഷത്തെ കാത്തിരിപ്പിന് ശേഷവും രണ്ടര വർഷം കൂടി കാത്തിരിക്കേണ്ടി വരുമെന്ന് അധികൃതർ അറിയിച്ച സംഭവവും പൊതുജനാരോഗ്യ സംവിധാനത്തിന്റെ തകർച്ച വ്യക്തമാക്കുന്നു. രോഗവിവരങ്ങൾ മുൻകൂട്ടി കൃത്യമായി അറിയിക്കാത്തതിനാൽ സ്വകാര്യ ചികിത്സ തിരഞ്ഞെടുക്കാനുള്ള അവസരം പോലും രോഗികൾക്ക് നഷ്ടപ്പെടുന്നുവെന്ന പരാതി ശക്തമാണ്.
കഴിഞ്ഞ സാമ്പത്തിക വർഷം തലസ്ഥാനത്ത് പതിനെട്ടായിരത്തോളം ഇലക്ടീവ് ശസ്ത്രക്രിയകൾ വിജയകരമായി പൂർത്തിയാക്കിയിട്ടും ഔട്ട്പേഷ്യന്റ് സ്പെഷ്യലിസ്റ്റ് സേവനങ്ങളിലെ കാലതാമസം വലിയ വെല്ലുവിളിയായി തുടരുകയാണ്. ഇതിനെത്തുടർന്ന് സമഗ്രമായ സ്വതന്ത്ര അന്വേഷണ കമ്മീഷൻ സമർപ്പിച്ച 49 ശുപാർശകളുടെ അടിസ്ഥാനത്തിൽ സ്പെഷ്യലിസ്റ്റ് വിഭാഗങ്ങളുടെ പ്രവർത്തനം പുനരവലോകനം ചെയ്യാൻ സിഎച്ച്എസ് തീരുമാനിച്ചു. രോഗികൾക്ക് ഇത്രയും നീണ്ട കാത്തിരിപ്പ് അനുവദിക്കാനാവില്ലെന്നും റെഫറൽ സംവിധാനങ്ങൾ മെച്ചപ്പെടുത്താൻ മാസങ്ങളോളം നീളുന്ന നടപടികൾ ആരംഭിച്ചതായും സിഎച്ച്എസ് ചീഫ് ഓപ്പറേറ്റിംഗ് ഓഫീസർ ആലിസൺ ഡെറിറ്റ് വ്യക്തമാക്കി. വരും മാസങ്ങളിൽ രോഗികളെ നേരിട്ട് ബന്ധപ്പെട്ട് അപ്പോയിന്റ്മെന്റുകളുടെ മുൻഗണന പുനർനിർണ്ണയിക്കുമെന്നും അധികൃതർ അറിയിച്ചു.
