മെത്താംഫെറ്റാമൈൻ ക്രിമിനൽ കുറ്റമാക്കാൻ ലിബറൽസ്;തെളിവുകൾ അവഗണിക്കുന്നുവെന്ന് ആരോഗ്യവിദഗ്ദ്ധർ

കാൻബറ: കാൻബറയിൽ മെത്താംഫെറ്റാമൈൻ (ഐസ്) പോലുള്ള മാരക ലഹരിമരുന്നുകളുടെ ഉപയോഗം അനിയന്ത്രിതമായി വർദ്ധിച്ചുവരികയാണെന്നും, തങ്ങൾ അധികാരത്തിൽ വന്നാൽ ഇവ കൈവശം വെക്കുന്നതും ഉപയോഗിക്കുന്നതും വീണ്ടും കടുത്ത ക്രിമിനൽ കുറ്റമാക്കുമെന്നും പ്രതിപക്ഷ പാർട്ടിയായ കാൻബറ ലിബറൽസ് പ്രഖ്യാപിച്ചു. കഴിഞ്ഞ ആഴ്ച സമർപ്പിച്ച ബജറ്റ് മറുപടി പ്രസംഗത്തിലാണ് പ്രതിപക്ഷ നേതാവ് മാർക്ക് പാർട്ടിൻ ഈ വിവാദ നയം വ്യക്തമാക്കിയത്. 2023 ഒക്ടോബറിലാണ് എ.സി.ടി. നിയമസഭ ചെറിയ അളവിൽ ലഹരിമരുന്നുകൾ കൈവശം വെക്കുന്നത് ക്രിമിനൽ കുറ്റമല്ലാതാക്കി (Decriminalised) നിയമം പാസാക്കിയത്. എന്നാൽ ഈ നിയമം മൂലം നഗരത്തിൽ ലഹരി ഉപയോഗം റെക്കോർഡ് നിരക്കിലെത്തിയെന്നും സമൂഹത്തിന്റെ സുരക്ഷ മുൻനിർത്തി ഇത് നിരോധിക്കണമെന്നുമാണ് ലിബറൽസിന്റെ വാദം.

എന്നാൽ, പ്രതിപക്ഷത്തിന്റെ ഈ നീക്കം ശാസ്ത്രീയ തെളിവുകളെ പൂർണ്ണമായി അവഗണിക്കുന്നതാണെന്നും ലഹരിക്ക് അടിമപ്പെട്ടവരെ കൂടുതൽ ഒറ്റപ്പെടുത്താൻ മാത്രമേ ഇത് സഹായിക്കൂ എന്നും ആരോഗ്യവിദഗ്ദ്ധരും ഡ്രഗ് ഹാം റിഡക്ഷൻ (Drug harm reduction) പ്രവർത്തകരും മുന്നറിയിപ്പ് നൽകുന്നു. ഓസ്‌ട്രേലിയയിലെ മലിനജല പരിശോധനാ കണക്കുകൾ പ്രകാരം കാൻബറയിൽ ലഹരി ഉപയോഗം വർദ്ധിച്ചിട്ടുണ്ടെങ്കിലും, അത് ലഹരി നിരോധനം നിലനിൽക്കുന്ന ടാസ്മാനിയ (38%), നോർത്തേൺ ടെറിട്ടറി (36%) തുടങ്ങിയ സംസ്ഥാനങ്ങളിലെ ദേശീയ നിരക്കുകളുമായി ഒത്തുപോകുന്നതാണെന്ന് കാൻബറ അലയൻസ് ഫോർ ഹാം മിനിമൈസേഷൻ (CAHMA) എക്സിക്യൂട്ടീവ് ഡയറക്ടർ ക്രിസ് ഗോഫ് ചൂണ്ടിക്കാട്ടി. ലഹരി ഉപയോഗം കൂടുന്നത് നിയമം മൂലമല്ലെന്നും, മറിച്ച് ഇവർക്ക് ആവശ്യമായ ചികിത്സാ-പുനരധിവാസ കേന്ദ്രങ്ങളുടെ കുറവ് കൊണ്ടാണെന്നും അദ്ദേഹം വ്യക്തമാക്കി.

ക്രിമിനൽ കുറ്റമാക്കുന്നത് മരണനിരക്ക് വർദ്ധിപ്പിക്കുമെന്ന് മുന്നറിയിപ്പ്:

ലഹരിമരുന്ന് ഉപയോഗിക്കുന്നവരെ വീണ്ടും ക്രിമിനലുകളായി ചിത്രീകരിക്കുന്നത് വഴി അവർ ചികിത്സ തേടാൻ ഭയപ്പെടുകയും ഒളിച്ചോടാൻ ശ്രമിക്കുകയും ചെയ്യുമെന്ന് പ്രമുഖ ഡ്രഗ് ടെസ്റ്റിങ് കേന്ദ്രമായ 'കാൻടെസ്റ്റിന്റെ' (CanTEST) ക്ലിനിക്കൽ മേധാവി ഡോ. ഡേവിഡ് കാൽഡിക്കോട്ട് പറഞ്ഞു. "ലഹരി ഉപയോഗം കുറ്റമാക്കുന്നത് വഴി അവരുടെ ആരോഗ്യനില മെച്ചപ്പെടുമെന്നതിന് ലോകത്ത് എവിടെയും ഒരു തെളിവുമില്ല. ഇത് മരണനിരക്ക് വർദ്ധിപ്പിക്കാൻ മാത്രമേ ഉപകരിക്കൂ," അദ്ദേഹം വ്യക്തമാക്കി. എന്നാൽ, ഓസ്‌ട്രേലിയൻ ഫെഡറൽ പോലീസ് അസോസിയേഷൻ പ്രതിപക്ഷത്തിന്റെ തീരുമാനത്തെ അനുകൂലിച്ചു. ലഹരിമാഫിയയും ഇതിനോടനുബന്ധിച്ചുള്ള അക്രമങ്ങളും തടയാൻ നിയമപരമായ ശിക്ഷകൾ ആവശ്യമാണെന്നും, ഒപ്പം തന്നെ ശക്തമായ പുനരധിവാസ പാതകൾ ഉറപ്പാക്കണമെന്നും എ.എഫ്.പി.എ പ്രസിഡന്റ് അലക്സ് കരുണ ആവശ്യപ്പെട്ടു.