ഓസ്ട്രേലിയയിൽ H5N1 പക്ഷിപ്പനി കൂടുതൽ വ്യാപിക്കാൻ സാധ്യതയുണ്ടെന്ന് അധികൃതരുടെ മുന്നറിയിപ്പ്. അഡ്ലെയ്ഡിന് തെക്കൻ തീരത്ത് ഏകദേശം 50 ഗ്രേറ്റർ ക്രെസ്റ്റഡ് ടെൺസ് കടൽപ്പക്ഷികൾ ചത്തതോടെയാണ് ആശങ്ക ശക്തമായത്. രാജ്യത്ത് കടൽപ്പക്ഷികൾക്കിടയിൽ H5N1 മൂലമുണ്ടായ ആദ്യത്തെ വലിയ കൂട്ടമരണം കൂടിയാണിത്. കേപ് ജാഫയ്ക്ക് സമീപം പാറക്കൂട്ടങ്ങളിൽ കണ്ടെത്തിയ 49 ചത്ത പക്ഷികളിലും 35 രോഗബാധിത പക്ഷികളിലും H5N1 വൈറസ് സ്ഥിരീകരിച്ചതായി കൃഷിമന്ത്രി ജൂലി കോളിൻസ് തിങ്കളാഴ്ച അറിയിച്ചു. അഡ്ലെയ്ഡിൽ നിന്ന് ഏകദേശം 250 കിലോമീറ്റർ അകലെയാണ് സംഭവം. വന്യജീവികൾക്കിടയിൽ വൈറസ് കൂടുതൽ വ്യാപിക്കാനും വലിയ തോതിലുള്ള കൂട്ടമരണങ്ങൾ ഉണ്ടാകാനും സാധ്യതയുണ്ടെന്ന് മന്ത്രി മുന്നറിയിപ്പ് നൽകി.
“വന്യജീവികളിൽ വൈറസ് കൂടുതൽ വ്യാപിക്കുന്നതും കൂടുതൽ എണ്ണത്തിൽ ജീവികൾ രോഗബാധിതരാകുന്നതും ഓസ്ട്രേലിയക്കാർ പ്രതീക്ഷിക്കണം,” കാൻബറയിൽ മാധ്യമങ്ങളോട് കോളിൻസ് പറഞ്ഞു. വന്യപക്ഷികളും മറ്റ് വന്യജീവികളും സ്വതന്ത്രമായി സഞ്ചരിക്കുന്നത് തടയാനാകാത്തതിനാൽ വൈറസിന്റെ വ്യാപനം പൂർണമായി നിയന്ത്രിക്കുക ബുദ്ധിമുട്ടാണെന്ന് ഫെഡറൽ പരിസ്ഥിതി മന്ത്രി മുറേ വാട്ടും വ്യക്തമാക്കി. ഇതിന്റെ ഭാഗമായി കൂടുതൽ കൂട്ടമരണങ്ങൾ ഉണ്ടാകാൻ സാധ്യതയുണ്ടെന്നും അദ്ദേഹം പറഞ്ഞു.
അതേസമയം, ഓസ്ട്രേലിയയിലെ ഫാമുകളിൽ ഇതുവരെ H5N1 വൈറസ് കണ്ടെത്തിയിട്ടില്ല. ജൂണിൽ രാജ്യത്ത് വൈറസ് ആദ്യമായി സ്ഥിരീകരിച്ചതിന് പിന്നാലെ നിരവധി കോഴിഫാമുകൾ ജൈവസുരക്ഷാ നടപടികൾ ശക്തമാക്കിയിട്ടുണ്ട്. ലോകത്തിന്റെ വിവിധ ഭാഗങ്ങളിൽ H5N1 വൈറസ് കോടിക്കണക്കിന് പക്ഷികളുടെയും മറ്റ് ജീവികളുടെയും മരണത്തിന് കാരണമായിട്ടുണ്ട്. കോഴി വളർത്തൽ മേഖലയിലും വൻ സാമ്പത്തിക നഷ്ടമുണ്ടാക്കിയ വൈറസ് അമേരിക്കയിൽ കന്നുകാലികളിലേക്കും പടർന്നിരുന്നു.
രോഗബാധിത മൃഗങ്ങളുമായി അടുത്ത സമ്പർക്കം പുലർത്തുന്ന മനുഷ്യരിലേക്കും H5N1 പകരാൻ സാധ്യതയുണ്ടെങ്കിലും ആഗോളതലത്തിൽ മനുഷ്യരിലെ കേസുകളുടെ എണ്ണം കുറവാണെന്നും മനുഷ്യർക്ക് നിലവിലെ അപകടസാധ്യത കുറഞ്ഞതാണെന്നും അധികൃതർ അറിയിച്ചു. H5N1 പക്ഷിപ്പനി സ്ഥിരീകരിച്ച ലോകത്തിലെ അവസാന ഭൂഖണ്ഡമായിരുന്നു ഓസ്ട്രേലിയ. കഴിഞ്ഞ മാസമാണ് ന്യൂസിലൻഡിലും ആദ്യമായി വൈറസ് സ്ഥിരീകരിച്ചത്.