മെൽബൺ: ഓസ്ട്രേലിയൻ റിയൽ എസ്റ്റേറ്റ് വിപണിയിൽ വീടുകളുടെ പ്രാരംഭ ചോദ്യാവിലയിൽ വൻ ഇടിവ് വരുത്തി വിൽപനക്കാർ. പ്രോപ്പർട്ടി റിസർച്ച് സ്ഥാപനമായ 'ഗ്ലാസ്ഹൗസ്' (Glasshouse) പുറത്തുവിട്ട ഏറ്റവും പുതിയ റിപ്പോർട്ട് പ്രകാരം, രാജ്യത്തുടനീളമുള്ള 15,851 വീടുകളുടെ പ്രാരംഭ ചോദ്യാവിലയിൽ നിന്നായി ആകെ 1.64 ബില്യൺ ഓസ്ട്രേലിയൻ ഡോളറിന്റെ കുറവാണ് രേഖപ്പെടുത്തിയത്. പ്രീമിയം ലക്ഷ്വറി ഭവന വിപണിയിലാണ് ഏറ്റവും വലിയ വിലക്കുറവ് പ്രതിഫലിക്കുന്നത്.
വിക്ടോറിയയിലെ മോർണിംഗ്ടൺ പെനിൻസുലയിലുള്ള മൗണ്ട് മാർത്തയിലെ പ്രോപ്പർട്ടിയാണ് ഇതിൽ മുൻപന്തിയിൽ. 14.95 ദശലക്ഷം ഡോളർ ചോദിച്ചിരുന്ന ഈ വീടിന്റെ വിലയിൽ 5.95 ദശലക്ഷം ഡോളർ വെട്ടിക്കുറച്ച് ഇപ്പോൾ 9 ദശലക്ഷം ഡോളറാക്കി. ന്യൂ സൗത്ത് വെയിൽസിലെ സെന്റ് ഐവ്സിലുള്ള വീടിന്റെ വിലയിൽ 3.95 ദശലക്ഷം ഡോളറും ബൈറോൺ ബേയിലെ പ്രോപ്പർട്ടിയിൽ 3 ദശലക്ഷം ഡോളറും കുറവ് വരുത്തിയിട്ടുണ്ട്. വിപണിയിൽ ആവശ്യക്കാരേക്കാൾ കൂടുതൽ വീടുകൾ വിൽപ്പനയ്ക്ക് എത്തുന്നതും ഉയർന്ന പലിശനിരക്കുകൾ കാരണം വാങ്ങലുകാരുടെ ഭാഗത്തുനിന്നുള്ള തണുപ്പൻ പ്രതികരണവുമാണ് വില വലിയ തോതിൽ കുറയ്ക്കാൻ ഉടമകളെ നിർബന്ധിതരാക്കുന്നത്.
