കാൻബറ: ഓസ്ട്രേലിയയിലെ ഡിജിറ്റൽ അസറ്റ് പ്ലാറ്റ്ഫോമുകളെയും ക്രിപ്റ്റോ എക്സ്ചേഞ്ചുകളെയും രാജ്യത്തെ സാമ്പത്തിക നിയമങ്ങളുടെ പരിധിയിൽ കൊണ്ടുവരുന്ന നിർണ്ണായക നിയമം പാർലമെന്റ് പാസാക്കി. 'കോർപ്പറേഷൻസ് അമൻഡ്മെന്റ് (ഡിജിറ്റൽ അസറ്റ് ഫ്രെയിംവർക്ക്) ബിൽ 2025' ഓസ്ട്രേലിയൻ പാർലമെന്റിന്റെ ഇരുസഭകളും കടന്നതോടെ, ക്രിപ്റ്റോ മേഖലയിൽ വ്യക്തമായ നിയന്ത്രണങ്ങൾ കൊണ്ടുവരുന്ന ലോകത്തെ പ്രധാന രാജ്യങ്ങളിലൊന്നായി ഓസ്ട്രേലിയ മാറി. ഉപഭോക്താക്കളുടെ സുരക്ഷ ഉറപ്പാക്കുന്നതിനും വിപണിയിലെ സുതാര്യത വർദ്ധിപ്പിക്കുന്നതിനുമാണ് ഈ നീക്കം.
പുതിയ നിയമപ്രകാരം, ഓസ്ട്രേലിയയിൽ പ്രവർത്തിക്കുന്ന ക്രിപ്റ്റോ എക്സ്ചേഞ്ചുകളും ഡിജിറ്റൽ അസറ്റ് പ്ലാറ്റ്ഫോമുകളും ഓസ്ട്രേലിയൻ സെക്യൂരിറ്റീസ് ആൻഡ് ഇൻവെസ്റ്റ്മെന്റ് കമ്മീഷനിൽ (ASIC) നിന്ന് 'ഓസ്ട്രേലിയൻ ഫിനാൻഷ്യൽ സർവീസസ് ലൈസൻസ്' (AFSL) സ്വന്തമാക്കണം. ഗവർണർ ജനറലിന്റെ ഔദ്യോഗിക അംഗീകാരം (Royal Assent) ലഭിക്കുന്നതോടെ ബിൽ നിയമമായി മാറും. നിയമം നിലവിൽ വന്ന് 12 മാസത്തിന് ശേഷമായിരിക്കും ഇത് പൂർണ്ണമായും നടപ്പിലാക്കുക. സ്ഥാപനങ്ങൾക്ക് പുതിയ നിബന്ധനകളുമായി പൊരുത്തപ്പെടാൻ പ്രത്യേക സമയപരിധിയും അനുവദിക്കും.
ഡിജിറ്റൽ ഇക്കണോമി കൗൺസിൽ ഓഫ് ഓസ്ട്രേലിയ (DECA) ഈ തീരുമാനത്തെ സ്വാഗതം ചെയ്തു. നിക്ഷേപകർക്കും ബിസിനസ്സുകൾക്കും ഈ മേഖലയിൽ കൂടുതൽ വ്യക്തത നൽകാൻ പുതിയ നിയമം സഹായിക്കുമെന്ന് സംഘടന വ്യക്തമാക്കി. കൂടാതെ, മൾട്ടി-പാർട്ടി കമ്പ്യൂട്ടേഷൻ (MPC) പോലുള്ള അത്യാധുനിക സാങ്കേതികവിദ്യകൾ ഉപയോഗിക്കുന്ന വാലറ്റുകളുടെ കാര്യത്തിലും ബില്ലിൽ വ്യക്തത വരുത്തിയിട്ടുണ്ട്. ഉപഭോക്താക്കളുടെ ക്രിപ്റ്റോ കറൻസികൾ നേരിട്ട് കൈവശം വയ്ക്കുന്ന പ്ലാറ്റ്ഫോമുകൾക്ക് മാത്രമായിരിക്കും ലൈസൻസ് നിർബന്ധമാക്കുക.