സിഡ്നി: ഉയർന്ന പലിശനിരക്ക്, ഉപഭോക്താക്കൾക്കിടയിലെ കുറഞ്ഞ ആത്മവിശ്വാസം, പുതിയ പ്രോപ്പർട്ടി നികുതി പരിഷ്കാരങ്ങൾ എന്നിവയെത്തുടർന്ന് ഓസ്ട്രേലിയയിലെ ദേശീയ ഭവന മൂല്യങ്ങളിൽ മെയ് മാസത്തിൽ മാറ്റമില്ലാതെ തുടരുന്നു. മുൻവർഷങ്ങളെ അപേക്ഷിച്ച് വിപണിയിലെ വളർച്ചാ നിരക്ക് പൂർണ്ണമായും നിലച്ച മെയ് മാസത്തിൽ സിഡ്നി, മെൽബൺ എന്നീ പ്രമുഖ നഗരങ്ങളാണ് മുന്നിൽ. സിഡ്നിയിൽ വീടുകളുടെ വിലയിൽ 0.9 ശതമാനവും മെൽബണിൽ 0.8 ശതമാനവും ഇടിവ് രേഖപ്പെടുത്തി. കടുത്ത സാമ്പത്തിക പ്രതിസന്ധികൾ, 75 ബേസിസ് പോയിന്റിന്റെ പലിശനിരക്ക് വർദ്ധനവ്, ആഗോള എണ്ണപ്രതിസന്ധി എന്നിവ വിപണിയെ ദോഷകരമായി ബാധിച്ചതായി കോട്ടാലിറ്റി റിസർച്ച് ഡയറക്ടർ ടിം ലോലെസ്സ് വ്യക്തമാക്കി.
ദേശീയതലത്തിൽ ശരാശരി ഭവന മൂല്യം 941,864 ഡോളറായി തുടരുമ്പോഴും വിപണിയിൽ പ്രാദേശികമായ വ്യത്യാസങ്ങൾ പ്രകടമാണ്. പെർത്തും ഡാർവിനും 1.5 ശതമാനം വളർച്ചയോടെ യഥാക്രമം 1.05 മില്യൺ ഡോളർ, 634,368 ഡോളർ എന്നിങ്ങനെ ഉയർന്ന ശരാശരി മൂല്യം നിലനിർത്തി. ബ്രിസ്ബെയ്ൻ, അഡ്ലെയ്ഡ്, ഹോബാർട്ട് തുടങ്ങിയ നഗരങ്ങളിൽ 1 ശതമാനത്തിൽ താഴെ മാത്രമാണ് വളർച്ച രേഖപ്പെടുത്തിയത്. വിപണിയിലെ ഈ മന്ദഗതി താൽക്കാലിക പ്രതിഭാസമാണെന്നും പെട്ടെന്നുള്ള തകർച്ചയ്ക്ക് സാധ്യതയില്ലെന്നുമാണ് സാമ്പത്തിക വിദഗ്ദ്ധരുടെ വിലയിരുത്തൽ. എന്നാൽ, നിക്ഷേപകരെ നിരാശപ്പെടുത്തുന്ന പുതിയ നികുതി വ്യവസ്ഥകൾ വരുന്നതോടെ വരും മാസങ്ങളിൽ വിപണിയിൽ ആവശ്യക്കാരുടെ എണ്ണം ഇനിയും കുറഞ്ഞേക്കുമെന്ന് പ്രവചനങ്ങളുണ്ട്.
