സിഡ്നി: ഓസ്ട്രേലിയൻ ചരിത്രത്തിൽ ഇതേവരെ ഉണ്ടാകാത്ത വിധം ആട്, ചെമ്മരിയാട് (Mutton and Lamb) വില കുത്തനെ ഉയരുന്നു. രാജ്യത്തെ ഔദ്യോഗിക വിപണി സൂചികയായ 'നാഷണൽ മട്ടൻ ഇൻഡിക്കേറ്റർ'ചരിത്രത്തിലാദ്യമായി കിലോഗ്രാമിന് 900 സെന്റ് (9.14 ഓസ്ട്രേലിയൻ ഡോളർ) എന്ന റെക്കോർഡ് പരിധി ഭേദിച്ചു. കഴിഞ്ഞ വ്യാഴാഴ്ച വാഗ്ഗ വാഗ്ഗ കന്നുകാലി ചന്തയിൽ നടന്ന ലേലത്തിൽ കിലോഗ്രാമിന് 1,000 സെന്റിലധികം (10 ഓസ്ട്രേലിയൻ ഡോളർ) നിരക്കിലാണ് പലയിടത്തും വ്യാപാരം നടന്നത്. ഒരു വലിയ ആടിന് വിപണിയിൽ 255 ഡോളർ മുതൽ 396 ഡോളർ (ഏകദേശം 22,000 ഇന്ത്യൻ രൂപ) വരെയാണ് വില ലഭിക്കുന്നത്.
വെറും മൂന്ന് വർഷം മുൻപ് ഇതേ വിപണിയിൽ ആടുവില കിലോഗ്രാമിന് 100 സെന്റിലേക്ക് കൂപ്പുകുത്തിയിരുന്ന സ്ഥാനത്താണ് ഈ അവിശ്വസനീയമായ കുതിച്ചുചാട്ടം. അന്ന് വിപണിയിലെ നഷ്ടം ഭയന്ന് പല കർഷകരും തങ്ങളുടെ ആടുകളെ കൊന്നൊടുക്കുന്ന അവസ്ഥയായിരുന്നു. എന്നാൽ നിലവിൽ മെയ്, ജൂൺ മാസങ്ങളിൽ ലഭിച്ച അനുകൂലമായ കാലാവസ്ഥയും കനത്ത മഴയും കർഷകർക്ക് വലിയ ആത്മവിശ്വാസം നൽകിയിട്ടുണ്ട്. ഇതിനൊപ്പം വിപണിയിൽ അനുഭവപ്പെടുന്ന കടുത്ത സ്റ്റോക്ക് കുറവാണ് വില റെക്കോർഡുകളിലേക്ക് ഉയരാൻ പ്രധാന കാരണം. ടാസ്മാനിയയിലെ രോമം കത്രിക്കുന്ന പല കേന്ദ്രങ്ങളിലും നിലവിൽ ആവശ്യത്തിന് ആടുകളില്ലാത്ത അവസ്ഥ കഴിഞ്ഞ ഒരു പതിറ്റാണ്ടിനിടയിൽ ആദ്യമായി റിപ്പോർട്ട് ചെയ്യപ്പെട്ടിട്ടുണ്ട്.
ഉത്പാദനം കുറയുന്നു; കോടികളുടെ നേട്ടവുമായി കമ്പിളി വിപണി:
മീറ്റ് ആൻഡ് ലൈവ്സ്റ്റോക്ക് ഓസ്ട്രേലിയയുടെ പുതിയ പ്രവചനമനുസരിച്ച്, രാജ്യത്തെ ആകെ ആടുകളുടെ എണ്ണം വരും വർഷങ്ങളിൽ വീണ്ടും കുറഞ്ഞ് 64 ദശലക്ഷത്തിലേക്ക് ചുരുങ്ങും. നിലവിൽ ഉയർന്ന ലാഭം പ്രതീക്ഷിക്കുന്നതിനാൽ കൂടുതൽ കർഷകർ ആടുകളെ ഫാമുകളിൽ തന്നെ നിലനിർത്താനാണ് താല്പര്യപ്പെടുന്നത്. ആടുവിലയിലെ ഈ കുതിപ്പ് കമ്പിളി വിപണിക്കും വലിയ നേട്ടമുണ്ടാക്കിയിട്ടുണ്ട്. കഴിഞ്ഞ സാമ്പത്തിക വർഷത്തെ അപേക്ഷിച്ച് ഈ സീസണിൽ ലേലത്തിലൂടെ വിറ്റഴിക്കപ്പെട്ട കമ്പിളിയുടെ ആകെ മൂല്യം 675 മില്യൺ ഡോളർ വർദ്ധിച്ച് 2.6 ബില്യൺ ഡോളറിലെത്തി. കഴിഞ്ഞ 100 വർഷത്തിനിടയിലെ ഏറ്റവും കുറഞ്ഞ ഉത്പാദന നിരക്കിലാണ് ഓസ്ട്രേലിയൻ കമ്പിളി വ്യവസായം കടന്നുപോകുന്നതെങ്കിലും വിപണിയിലെ ഉയർന്ന വില കർഷകർക്ക് മികച്ച ലാഭമാണ് ഉറപ്പാക്കുന്നത്.
