കാൻബറ: ഓസ്ട്രേലിയയിലെ പലിശനിരക്ക് 15 വർഷത്തെ ഏറ്റവും ഉയർന്ന നിരക്കായ 4.6 ശതമാനത്തിലേക്ക് ഉയർന്നതിന് കാരണം സർക്കാരിന്റെ ധൂർത്ത് മാത്രമാണെന്ന പ്രതിപക്ഷ വാദങ്ങളെ തള്ളി റിസർവ് ബാങ്ക് ഓഫ് ഓസ്ട്രേലിയ (RBA) ഗവർണർ മിഷേൽ ബുള്ളോക്ക്. പശ്ചിമേഷ്യൻ യുദ്ധം സൃഷ്ടിച്ച കഴിഞ്ഞ അരനൂറ്റാണ്ടിലെ ഏറ്റവും വലിയ ഊർജ്ജ പ്രതിസന്ധി, കുതിച്ചുയരുന്ന സാങ്കേതിക നിക്ഷേപങ്ങൾ, പാർപ്പിട മേഖലയിലെ സമ്മർദ്ദം, വിപണിയിലെ അധിക ചോദനം (Excess demand) എന്നിവയെല്ലാം ഒരേസമയം പണപ്പെരുപ്പത്തിന് ആക്കം കൂട്ടിയതായി ആർബിഐ വ്യക്തമാക്കി.
ഇന്ധന ഇറക്കുമതിച്ചെലവ് ഉയർന്നതോടെ ഉത്പാദനച്ചെലവ് വ്യാപാരികൾ ഉപഭോക്താക്കളിലേക്ക് മാറ്റിവെക്കാൻ നിർബന്ധിതരാകുന്നതാണ് പണപ്പെരുപ്പം കുറയാതിരിക്കാൻ പ്രധാന കാരണം. അതേസമയം, പലിശഭാരം മുഴുവൻ ഭവനവായ്പക്കാരിലേക്ക് അടിച്ചേൽപ്പിക്കുന്ന സാമ്പത്തിക നയമാണ് നിലവിലുള്ളതെന്ന് പ്രമുഖ സാമ്പത്തിക വിദഗ്ദ്ധൻ ക്രിസ് റിച്ചാർഡ്സൺ ചൂണ്ടിക്കാട്ടി. ആൽബനീസ് സർക്കാരിന്റെ അമിത ചെലവഴിക്കലാണ് ഉയർന്ന പലിശനിരക്കിന് കാരണമെന്ന് പ്രതിപക്ഷ നേതാവ് ആംഗസ് ടെയ്ലർ ആരോപിച്ചപ്പോൾ, ഒന്നര പതിറ്റാണ്ടിനിടയിലെ ആദ്യത്തെ ബജറ്റ് മിച്ചം (Budget surplus) ഉണ്ടാക്കിയത് തങ്ങളാണെന്നും മുൻ സർക്കാരുകളേക്കാൾ കുറഞ്ഞ ചെലവഴിക്കൽ വളർച്ചയാണ് ഇപ്പോൾ ഉള്ളതെന്നും ട്രഷറർ ജിം ചാൽമേഴ്സ് തിരിച്ചടിച്ചു. ഒഇസിഡി (OECD) രാജ്യങ്ങളുമായി താരതമ്യം ചെയ്യുമ്പോൾ ഓസ്ട്രേലിയയുടെ ധനക്കമ്മി മിതമായ നിലയിലാണെങ്കിലും, ആഗോള ഘടകങ്ങളും ആഭ്യന്തര ചോദനവും ചേർന്ന് സാധാരണക്കാരന്റെ കുടുംബ ബജറ്റ് കൂടുതൽ ദുസ്സഹമാക്കുകയാണ്.
