കീവ്: റഷ്യ 60 ദിവസത്തെ വെടിനിർത്തലിന് സമ്മതിച്ചാൽ മാത്രമേ യുക്രെയ്‌നിൽ തിരഞ്ഞെടുപ്പ് നടത്താനാകൂവെന്ന് പ്രസിഡന്റ് വൊളോഡിമിർ സെലൻസ്കി. യുക്രെയ്ൻ പ്രസിഡന്റ് സ്ഥാനത്തുനിന്ന് മാറി പുതിയ നേതാവിനെ തിരഞ്ഞെടുക്കണമെന്ന അമേരിക്കൻ പ്രസിഡന്റ് ഡൊണാൾഡ് ട്രംപിന്റെ ആഹ്വാനവും അദ്ദേഹം തള്ളി. യുക്രെയ്ൻ റഷ്യൻ എണ്ണശുദ്ധീകരണശാലകൾക്കുനേരെ നടത്തുന്ന ആക്രമണങ്ങളാണ് അമേരിക്കയിൽ ഡീസൽ വില ഉയരാൻ കാരണമെന്നാരോപിച്ച് ട്രംപ് സമീപ ദിവസങ്ങളിൽ സെലൻസ്കിക്കെതിരായ വിമർശനം ശക്തമാക്കിയിരുന്നു. ഇറാൻ യുദ്ധവും ഉയർന്ന ഊർജവിലയും കൈകാര്യം ചെയ്യുന്ന രീതിയിൽ ആഭ്യന്തര സമ്മർദം നേരിടുന്നതിനിടെ, റഷ്യൻ ഇന്ധനത്തിനുമേലുള്ള അമേരിക്കൻ ഉപരോധങ്ങൾ താൽക്കാലികമായി നീക്കുന്നതായും ട്രംപ് പ്രഖ്യാപിച്ചിരുന്നു.
അമേരിക്കൻ ബ്രോഡ്കാസ്റ്റിങ് കമ്പനിയുമായുള്ള (എബിസി) ടെലിവിഷൻ അഭിമുഖത്തിലാണ് സെലൻസ്കി നിലപാട് വ്യക്തമാക്കിയത്. യുക്രെയ്‌നിൽ ആരാണ് നേതാവാകേണ്ടതെന്ന് തീരുമാനിക്കേണ്ടത് അവിടുത്തെ ജനങ്ങളാണെന്ന് അദ്ദേഹം പറഞ്ഞു. “പ്രസിഡന്റ് ട്രംപിനോട് എല്ലാ ബഹുമാനത്തോടെയും പറയട്ടെ, ഏത് നേതാവിനെ തിരഞ്ഞെടുക്കണമെന്ന് തീരുമാനിക്കേണ്ടത് ഞങ്ങളുടെ സമൂഹവും ജനങ്ങളുമാണ്,” സെലൻസ്കി വ്യക്തമാക്കി.
യുക്രെയ്‌നിൽ തിരഞ്ഞെടുപ്പ് നടത്തണമെന്നാണ് അമേരിക്ക ആഗ്രഹിക്കുന്നതെങ്കിൽ റഷ്യൻ പ്രസിഡന്റ് വ്ലാഡിമിർ പുടിനോട് രണ്ട് മാസത്തേക്ക്, അതായത് 60 ദിവസത്തേക്ക്, പൂർണ വെടിനിർത്തലിന് സമ്മതിക്കാൻ ആവശ്യപ്പെടണമെന്ന് ട്രംപിന്റെ സംഘത്തോട് താൻ പറഞ്ഞതായും സെലൻസ്കി വെളിപ്പെടുത്തി. വെടിനിർത്തൽ ഉറപ്പായാൽ തിരഞ്ഞെടുപ്പ് സംഘടിപ്പിക്കാമെന്നും അദ്ദേഹം പറഞ്ഞു.
സെലൻസ്കിക്ക് പിന്തുണയുമായി യൂറോപ്യൻ നേതാക്കൾ
റഷ്യയുമായി ട്രംപ് നടത്തുന്ന ചർച്ചകളും യുക്രെയ്‌നിനെതിരായ വിമർശനങ്ങളും ശക്തമായതോടെ യൂറോപ്യൻ നേതാക്കൾ സെലൻസ്കിക്ക് പിന്തുണയുമായി രംഗത്തെത്തി. റഷ്യ സമാധാന ചർച്ചകളിലേക്ക് മടങ്ങിയെത്താൻ കൂടുതൽ സമ്മർദം ചെലുത്തണമെന്ന് ജർമൻ വിദേശകാര്യ മന്ത്രി യോഹാൻ വാഡെഫുൾ ആവശ്യപ്പെട്ടു. പുടിനെ ചർച്ചയ്ക്ക് തയ്യാറാക്കാൻ സമ്മർദം കുറയ്ക്കുകയല്ല, വർധിപ്പിക്കുകയാണ് വേണ്ടതെന്ന് അദ്ദേഹം പറഞ്ഞു. യുക്രെയ്‌നിന് പിന്തുണ തുടരുമെന്നും റഷ്യയ്ക്കെതിരായ ഉപരോധങ്ങൾ കൂടുതൽ ശക്തമാക്കുമെന്നും ബ്രിട്ടീഷ് പ്രധാനമന്ത്രി ആൻഡി ബേൺഹാം സെലൻസ്കിയുമായുള്ള ശനിയാഴ്ചത്തെ സംഭാഷണത്തിൽ അറിയിച്ചതായി ഡൗണിങ് സ്ട്രീറ്റ് വക്താവ് പറഞ്ഞു.
Reuters/AFP