കാരക്കാസ്: വെനിസ്വേലയിൽ ബുധനാഴ്ചയുണ്ടായ വിനാശകരമായ ഇരട്ട ഭൂകമ്പത്തിൽ മരിച്ചവരുടെ എണ്ണം കുത്തനെ ഉയരുന്നു. ഏറ്റവും പുതിയ ഔദ്യോഗിക കണക്കുകൾ പ്രകാരം മരണസംഖ്യ 920 കടന്നതായി നാഷണൽ അസംബ്ലി പ്രസിഡന്റ് ജോർജ് റോഡ്രിഗസ് അറിയിച്ചു. മൂവായിരത്തിലധികം ആളുകൾക്ക് പരിക്കേറ്റിട്ടുണ്ട്. അവശിഷ്ടങ്ങൾക്കിടയിൽ കുടുങ്ങിക്കിടക്കുന്നവർക്കായി തെരച്ചിൽ തുടരുന്നതിനാൽ മരണസംഖ്യ ഇനിയും ഉയരാൻ സാധ്യതയുണ്ടെന്നാണ് അധികൃതർ നൽകുന്ന സൂചന.
ദുരന്തത്തിൽ 50,000-ലധികം ആളുകളെ കാണാതായിട്ടുണ്ടെന്ന് ഐക്യരാഷ്ട്ര സംഘടനയുടെ ദുരിതാശ്വാസ വിഭാഗം മേധാവി ടോം ഫ്ലെച്ചർ വ്യക്തമാക്കി. കെട്ടിടാവശിഷ്ടങ്ങൾക്കിടയിൽ കുടുങ്ങിക്കിടക്കുന്നവരെ ജീവനോടെ പുറത്തെടുക്കാനുള്ള സമയം അതിവേഗം കുറഞ്ഞുവരുന്നത് ആശങ്ക വർദ്ധിപ്പിക്കുന്നുണ്ട്. ഏറ്റവും കൂടുതൽ നാശനഷ്ടം നേരിട്ട തീരദേശ മേഖലയായ ലാ ഗ്വൈറയിൽ രക്ഷാപ്രവർത്തനം കാര്യക്ഷമമാക്കുന്നതിനായി സൈന്യത്തെ വിന്യസിച്ചിട്ടുണ്ട്. തകർന്നുവീണ ബഹുനില കെട്ടിടങ്ങൾക്കിടയിൽ കുടുങ്ങിയവരുടെ നിലവിളികൾ തിരിച്ചറിയാൻ ജെസിബികളും സ്ലെഡ്ജ് ഹാമറുകളും ഉപയോഗിച്ചുള്ള രക്ഷാപ്രവർത്തനത്തിനിടയിൽ കമാൻഡർമാർ ഇടയ്ക്കിടെ പൂർണ്ണ നിശബ്ദത പാലിക്കാൻ നിർദ്ദേശം നൽകുന്നുണ്ട്.
അന്താരാഷ്ട്ര സഹായം എത്തിത്തുടങ്ങി; ഇളവുകളുമായി യുഎസ്:
വെനിസ്വേലൻ സർക്കാരുമായി രാഷ്ട്രീയപരമായ ഭിന്നതകൾ നിലനിൽക്കുന്ന രാജ്യങ്ങൾ പോലും ദുരന്തമുഖത്ത് സഹായവുമായി എത്തിയിട്ടുണ്ട്. യുഎൻ ഏകോപനത്തിൽ ഇന്ത്യ, യുഎസ്, സ്പെയിൻ, മെക്സിക്കോ ഉൾപ്പെടെ 17 രാജ്യങ്ങളിൽ നിന്നുള്ള അന്താരാഷ്ട്ര ദുരന്ത നിവാരണ-മെഡിക്കൽ സംഘങ്ങൾ വെനിസ്വേലയിൽ എത്തിക്കഴിഞ്ഞു. അടിയന്തര രക്ഷാപ്രവർത്തനങ്ങൾ തടസ്സമില്ലാതെ നടത്തുന്നതിനായി അമേരിക്കൻ സർക്കാർ വെനിസ്വേലയ്ക്ക് മേലുണ്ടായിരുന്ന കടുത്ത സാമ്പത്തിക ഉപരോധങ്ങളിൽ താൽക്കാലിക ഇളവുകൾ പ്രഖ്യാപിച്ചിട്ടുണ്ട്. കൂടാതെ, ഇലോൺ മസ്കിന്റെ സ്റ്റാർലിങ്ക് ദുരന്തബാധിത പ്രദേശങ്ങളിൽ കണക്റ്റിവിറ്റി പുനഃസ്ഥാപിക്കുന്നതിനായി ഒരു മാസത്തേക്ക് സൗജന്യ സാറ്റലൈറ്റ് ഇന്റർനെറ്റ് സേവനവും വാഗ്ദാനം ചെയ്തിട്ടുണ്ട്.രാജ്യത്തെ പ്രധാന വിമാനത്താവളമായ സിമോൺ ബൊളിവർ ഇന്റർനാഷണൽ എയർപോർട്ട് തകർന്നതിനാലും, പവർ ഗ്രിഡുകൾ തകരാറിലായതിനാലും രാത്രികാലങ്ങളിലെ തെരച്ചിൽ കടുത്ത പ്രതിസന്ധിയിലാണ്. അതേസമയം, ഒപെക് അംഗമായ വെനിസ്വേലയുടെ പ്രധാന വരുമാന മാർഗ്ഗമായ എണ്ണ ശുദ്ധീകരണ ശാലകൾക്കും പൈപ്പ് ലൈനുകൾക്കും വലിയ നാശനഷ്ടങ്ങൾ സംഭവിച്ചിട്ടില്ലെന്നാണ് വിദേശ ഊർജ്ജ കമ്പനികൾ വ്യക്തമാക്കുന്നത്. 1900-ന് ശേഷം വെനിസ്വേല സാക്ഷ്യം വഹിച്ച ഏറ്റവും ശക്തമായ ഭൂകമ്പമാണിത്
