വാഷിംഗ്ടൺ: ഹോർമുസ് കടലിടുക്ക് തുറന്നു കൊടുക്കാമെന്ന വാഗ്ദാനം ഇറാൻ ലംഘിച്ചെന്ന് ആരോപിച്ച് കടലിടുക്കിൽ ശക്തമായ നാവിക ഉപരോധം ഏർപ്പെടുത്താൻ യുഎസ് പ്രസിഡന്റ് ഡോണൾഡ് ട്രംപ് ഉത്തരവിട്ടു. ഇസ്ലാമാബാദിൽ വെച്ച് അമേരിക്കയും ഇറാനും തമ്മിൽ നടത്തിയ സമാധാന ചർച്ചകൾ പരാജയപ്പെട്ടതിന് പിന്നാലെയാണ് ട്രംപിന്റെ ഈ നിർണ്ണായക നീക്കം. ഇറാന്റെ നടപടികളെ "ആഗോള പിടിച്ചുപറി" (World Extortion) എന്നാണ് ട്രംപ് വിശേഷിപ്പിച്ചത്.
കടലിടുക്കിൽ ഇറാൻ സ്ഥാപിച്ചിട്ടുള്ള മൈനുകൾ യുഎസ് നാവികസേന നീക്കം ചെയ്യുമെന്നും അമേരിക്കൻ കപ്പലുകൾക്ക് നേരെയോ മറ്റ് വ്യാപാര കപ്പലുകൾക്ക് നേരെയോ ആക്രമണമുണ്ടായാൽ കടുത്ത പ്രത്യാഘാതങ്ങൾ നേരിടേണ്ടി വരുമെന്നും ട്രംപ് മുന്നറിയിപ്പ് നൽകി. ഇറാന് നികുതി നൽകി കടന്നുപോകുന്ന കപ്പലുകളെ അന്താരാഷ്ട്ര സമുദ്രപരിധിയിൽ വെച്ച് തടയാനും അദ്ദേഹം നാവികസേനയ്ക്ക് നിർദ്ദേശം നൽകിയിട്ടുണ്ട്. ഒന്നുകിൽ എല്ലാ കപ്പലുകൾക്കും സുരക്ഷിത പാത അനുവദിക്കുക, അല്ലെങ്കിൽ ആരെയും കടത്തിവിടില്ല എന്ന 'ഓൾ ഓർ നൺ' (All or None) നയമാണ് ട്രംപ് പ്രഖ്യാപിച്ചത്.
ഇറാൻ തങ്ങളുടെ ആണവ പദ്ധതി ഉപേക്ഷിക്കാൻ തയ്യാറാകാത്തതാണ് ചർച്ചകൾ പരാജയപ്പെടാൻ കാരണമെന്ന് ട്രംപ് വ്യക്തമാക്കി. ആണവായുധം നിർമ്മിക്കാനുള്ള ഇറാന്റെ ശ്രമങ്ങൾ ലോകത്തിന് വലിയ ഭീഷണിയാണെന്നും മറ്റ് വിഷയങ്ങളിലെ ധാരണകളേക്കാൾ ഉപരിയായി ആണവ പദ്ധതിയോടുള്ള ഇറാന്റെ നിലപാടാണ് പ്രധാനമെന്നും അദ്ദേഹം കൂട്ടിച്ചേർത്തു. നേരത്തെ വെനിസ്വേലയിൽ നടപ്പിലാക്കിയതിന് സമാനമായ ഉപരോധമായിരിക്കും ഹോർമുസിലും ഉണ്ടാവുക. ലോകത്തിലെ എണ്ണ വിതരണത്തിന്റെ അഞ്ചിലൊന്ന് കടന്നുപോകുന്ന ഹോർമുസ് കടലിടുക്കിലെ ഈ പുതിയ നിയന്ത്രണങ്ങൾ ആഗോള വിപണിയെ വീണ്ടും കടുത്ത പ്രതിസന്ധിയിലേക്ക് നയിക്കും.