വാഷിംഗ്ടണ്: നാസയുടെ ട്രാൻസിറ്റിംഗ് എക്സോപ്ലാനറ്റ് സർവേ സാറ്റലൈറ്റ് (TESS) എട്ട് വർഷത്തെ നിരന്തര നിരീക്ഷണങ്ങൾക്ക് ശേഷം രാത്രി ആകാശത്തിന്റെ ഏറ്റവും വിശദമായ ഭൂപടങ്ങളിലൊന്ന് പുറത്തുവിട്ടു. 2018 ഏപ്രിൽ മുതൽ 2025 സെപ്റ്റംബർ വരെ ശേഖരിച്ച 96 മേഖലകളിലെ ചിത്രങ്ങൾ കൂട്ടിച്ചേർത്താണ് ഈ വിസ്മയകരമായ ദൃശ്യരൂപം തയ്യാറാക്കിയിരിക്കുന്നത്. ഭൂപടത്തിൽ കാണപ്പെടുന്ന 6,000-ത്തിലധികമുള്ള വർണബിന്ദുക്കളിൽ പലതും നക്ഷത്രങ്ങളെ ചുറ്റി സഞ്ചരിക്കുന്ന അറിയപ്പെടുന്നതോ അല്ലെങ്കിൽ സംശയിക്കുന്ന ഗ്രഹങ്ങളുടെ സാന്നിധ്യത്തെ സൂചിപ്പിക്കുന്നവയാണ്.
നാസയുടെ വിശദീകരണമനുസരിച്ച് ട്രാൻസിറ്റ് മെത്തഡ് എന്ന സാങ്കേതികവിദ്യ ഉപയോഗിച്ചാണ് ഗ്രഹങ്ങളെ കണ്ടെത്തുന്നത്. ആയിരക്കണക്കിന് നക്ഷത്രങ്ങളുടെ പ്രകാശത്തിൽ ഉണ്ടാകുന്ന അതിസൂക്ഷ്മമായ മാറ്റങ്ങൾ നിരീക്ഷിച്ചാണ് ഈ കണ്ടെത്തലുകൾ. ഒരു ഗ്രഹം തന്റെ നക്ഷത്രത്തിന്റെ മുന്നിലൂടെ കടന്നുപോകുമ്പോൾ നക്ഷത്രത്തിന്റെ പ്രകാശത്തിൽ ചെറിയ കുറവ് സംഭവിക്കും. ഈ വ്യത്യാസങ്ങളാണ് ഗ്രഹങ്ങളുടെ സാന്നിധ്യം തിരിച്ചറിയാൻ ശാസ്ത്രജ്ഞരെ സഹായിക്കുന്നത്. ടെസ് ഉപഗ്രഹത്തിലെ നാല് വിശാല കാഴ്ചപരിധിയുള്ള ക്യാമറകൾ ഓരോ ആകാശമേഖലയും ഏകദേശം ഒരു മാസം വീതം നിരീക്ഷിക്കുന്നു. തുടർന്ന് ഉപഗ്രഹം അടുത്ത മേഖലയിലേക്ക് നീങ്ങും. ഇത്തരത്തിലുള്ള ദീർഘകാല നിരീക്ഷണങ്ങളിലൂടെ ആയിരക്കണക്കിന് ഗ്രഹസമൂഹങ്ങളെക്കുറിച്ചുള്ള വിവരങ്ങൾ ശേഖരിക്കാൻ നാസയ്ക്ക് സാധിച്ചു. ഇതിനൊപ്പം ഭൂമിക്ക് സമീപമുള്ള ഗ്രഹശകലങ്ങൾ, പുതുതായി രൂപംകൊള്ളുന്ന നക്ഷത്രസമൂഹങ്ങൾ, ദൂരസ്ഥ ഗാലക്സികളുടെ കേന്ദ്രങ്ങളിലെ ശക്തമായ പ്രവർത്തനങ്ങൾ തുടങ്ങിയവയും കണ്ടെത്താൻ കഴിഞ്ഞു. 2025 സെപ്റ്റംബർ വരെയുള്ള കണക്കുകൾ പ്രകാരം ടെസ് ഇതിനകം 679 എക്സോപ്ലാനറ്റുകൾ സ്ഥിരീകരിച്ചിട്ടുണ്ട്. കൂടാതെ 5,165 സാധ്യതാ ഗ്രഹങ്ങൾ കൂടുതൽ പരിശോധനയ്ക്കായി പട്ടികപ്പെടുത്തിയിട്ടുണ്ട്.