2,615 പ്രകാശവർഷം അകലെയുള്ള കെപ്ലർ-51 സിസ്റ്റം എന്ന നക്ഷത്രസമൂഹത്തിൽ കണ്ടെത്തിയ മൂന്ന് 'സൂപ്പർ-പഫ്' ഗ്രഹങ്ങളെ കുറിച്ച് അതിശയകരമായ വിവരങ്ങൾ. വലുപ്പത്തിൽ ശനിയുടെ പോലെയെങ്കിലും ഇവയുടെ ഭാരം അതിശയകരമായ വിധത്തിൽ കുറഞ്ഞതാണ് എന്നാണ് റിപ്പോർട്ടുകൾ. കെപ്ലർ-51 ബി, സി, ഡി എന്നീ ഗ്രഹങ്ങൾ ഭൂമിയുടെ ഏഴ് മുതൽ 10 മടങ്ങ് വരെ വലുപ്പമുള്ളവയാണ്. എന്നാൽ ഇവയുടെ ഭാരം ഭൂമിയുടെ 3.7 മുതൽ 5.6 മടങ്ങ് മാത്രമാണ്. ഇതുമായി താരതമ്യം ചെയ്യുമ്പോൾ, സമാന വലുപ്പമുള്ള ശനി ഗ്രഹത്തിന്റെ ഭാരം ഭൂമിയുടെ 95 മടങ്ങാണ്. പക്ഷേ ഈ ഗ്രഹങ്ങളുടെ സാന്ദ്രത വളരെ കുറഞ്ഞതാണ്. ഈ പ്രത്യേകത കാരണം ഇവയെ 'സൂപ്പർ-പഫ്' ഗ്രഹങ്ങൾ എന്ന് വിളിക്കുന്നു.
ഗ്രഹ രൂപീകരണ സിദ്ധാന്തങ്ങൾ പ്രകാരം, വലിയ ഗ്രഹങ്ങൾ ആദ്യം ദൃഢമായ ഒരു കോർ രൂപീകരിക്കുകയും പിന്നീട് ചുറ്റുമുള്ള വാതകങ്ങളെ ആകർഷിച്ച് വലിയ അന്തരീക്ഷം ഉണ്ടാക്കുകയും ചെയ്യുന്നു. എന്നാൽ കെപ്ലർ-51 സിസ്റ്റത്തിലെ ഈ ഗ്രഹങ്ങൾക്കുള്ള കോർ വളരെ ചെറിയതും അന്തരീക്ഷം വളരെ വലുതുമായതിനാൽ, നിലവിലുള്ള സിദ്ധാന്തങ്ങൾ കൊണ്ട് ഇത് വിശദീകരിക്കാൻ ഗവേഷകർക്ക് കഴിയുന്നില്ല. കൂടാതെ ഇവ നമ്മുടെ സൗരയൂഥത്തിലെ ശുക്രനേക്കാൾ അടുത്തുകൂടിയാണ് അവരുടെ നക്ഷത്രത്തെ ചുറ്റുന്നത്. ഇത് ഇവയുടെ സ്വഭാവത്തെ കൂടുതൽ വിചിത്രമാക്കുന്നു എന്നും ഗവേഷകർ പറയുന്നു. നാസയുടെ കെപ്ലർ സ്പേസ് ടെലസ്കോപ്പ് ഉപയോഗിച്ചാണ് ഇവ ആദ്യം കണ്ടെത്തിയത്.