മഴക്കാടുകളിലും ജീവിച്ചിരുന്ന ഹോമോ ഇറക്ടസ്; പുതിയ ഫോസിൽ കണ്ടെത്തൽ

ചൈനയിൽ ഇതുവരെ കണ്ടെത്തിയിരുന്ന ഏറ്റവും പുതിയ ഹോമോ ഇറക്ടസ് ഫോസിലിന് ഏകദേശം നാല് ലക്ഷം വർഷം പഴക്കമുണ്ടായിരുന്നു.
മഴക്കാടുകളിലും ജീവിച്ചിരുന്ന ഹോമോ ഇറക്ടസ്; പുതിയ ഫോസിൽ കണ്ടെത്തൽ
(Supplied: Kira Westaway)
Published on: 

പുരാതന ചൈനയിലെ രണ്ട് ഗുഹകളിൽ നിന്ന് കണ്ടെത്തിയ ഫോസിലായ പല്ലുകൾ, മഴക്കാടുകളുമായി പൊരുത്തപ്പെട്ട് ജീവിക്കാൻ ആധുനിക മനുഷ്യർക്ക് മാത്രമല്ല, ഹോമോ ഇറക്ടസിനും കഴിഞ്ഞിരുന്നുവെന്ന് വ്യക്തമാക്കുന്നു. ഏകദേശം 3.24 ലക്ഷം മുതൽ 1.84 ലക്ഷം വർഷം വരെ പഴക്കമുള്ള പല്ലുകളാണ് തെക്കൻ ചൈനയിൽ നിന്ന് കണ്ടെത്തിയത്. ഓസ്‌ട്രേലിയ, ചൈന, യൂറോപ്പ് എന്നിവിടങ്ങളിൽ നിന്നുള്ള ഗവേഷകർ നടത്തിയ രണ്ട് പഠനങ്ങളാണ് Nature ജേണലിൽ പ്രസിദ്ധീകരിച്ചത്. ഇതിലൂടെ ഹോമോ ഇറക്ടസ് ഏഷ്യൻ ഭൂഖണ്ഡത്തിൽ മുമ്പ് കരുതിയിരുന്നതിലും കൂടുതൽ കാലം ജീവിച്ചിരുന്നുവെന്നും മഴക്കാടുകളിൽ അതിജീവിക്കാനുള്ള കഴിവുണ്ടായിരുന്നുവെന്നും കണ്ടെത്തി.

മനുഷ്യന്റെ പുരാതന പൂർവികരിൽപ്പെട്ട ഹോമോ ഇറക്ടസ് ഏകദേശം 20 ലക്ഷം വർഷങ്ങൾക്ക് മുമ്പ് ജീവിച്ചുതുടങ്ങിയവരാണ്. ആഫ്രിക്കയിൽ നിന്ന് ഏകദേശം 18 ലക്ഷം വർഷങ്ങൾക്ക് മുമ്പ് യൂറോപ്പിലേക്കും ഏഷ്യയിലേക്കും ഇവർ കുടിയേറി. ചൈനയിൽ ഇതുവരെ കണ്ടെത്തിയിരുന്ന ഏറ്റവും പുതിയ ഹോമോ ഇറക്ടസ് ഫോസിലിന് ഏകദേശം നാല് ലക്ഷം വർഷം പഴക്കമുണ്ടായിരുന്നു. പുൽമേടുകളും തുറന്ന വനപ്രദേശങ്ങളുമായിരുന്നു ഹോമോ ഇറക്ടസിന്റെ പ്രധാന ആവാസകേന്ദ്രങ്ങളെന്നാണ് ഇതുവരെ കരുതിയിരുന്നത്. ഈ പ്രദേശങ്ങൾ മഴക്കാടുകളായി മാറിയതോടെ ഇവർ വംശനാശം സംഭവിച്ചുവെന്നായിരുന്നു മുൻനിഗമനം. എന്നാൽ തെക്കൻ ചൈനയിലെ രണ്ട് ഗുഹകളിൽ നിന്നുള്ള പുതിയ കണ്ടെത്തലുകൾ ഈ ധാരണയെ ചോദ്യം ചെയ്യുന്നതായി മക്വാരി സർവകലാശാലയിലെ ജിയോ ക്രോണോളജിസ്റ്റ് കിറ വെസ്റ്റവേ പറഞ്ഞു.

ഗുഹകളിൽ കണ്ടെത്തിയത് എന്തെല്ലാം?

ചൈനയിലെ ചോങ്‌സുവോ നഗരത്തിന് ഏകദേശം 20 കിലോമീറ്റർ വടക്കുള്ള ബാക്സിയൻ, നാക്സിയൻ ഗുഹകളിൽ നിന്നായി ഒമ്പത് പുരാതന മനുഷ്യപ്പല്ലുകളാണ് കണ്ടെത്തിയത്. ഇതിൽ എട്ടെണ്ണം ഹോമോ ഇറക്ടസിന്റേതാണെന്ന് തിരിച്ചറിഞ്ഞു. ഒൻപതാമത്തെ പല്ല് മറ്റൊരു പുരാതന മനുഷ്യവർഗത്തിൽപ്പെട്ടതാണെങ്കിലും കൃത്യമായി തിരിച്ചറിയാനായിട്ടില്ല. ആനകൾ, കരടികൾ, നായവർഗത്തിൽപ്പെട്ട മൃഗങ്ങൾ, പന്നികൾ, കാണ്ടാമൃഗങ്ങൾ, കുരങ്ങുകൾ എന്നിവയുടെ ഫോസിലുകളും ഗുഹകളിൽ നിന്ന് കണ്ടെത്തി. പല്ലുകൾ പ്രധാനമായും പുരാതന മുള്ളൻപന്നികളാണ് ഗുഹകളിൽ ശേഖരിച്ചതെന്നാണ് ഗവേഷകരുടെ നിഗമനം. എല്ലുകളും പല്ലുകളും ശേഖരിച്ച് അവ കടിച്ചുകൊണ്ട് മുൻപല്ലുകൾ മൂർച്ചപ്പെടുത്തുന്ന സ്വഭാവം മുള്ളൻപന്നികൾക്കുണ്ടെന്ന് പഠനത്തിന്റെ സഹരചയിതാവും ചൈനീസ് അക്കാദമി ഓഫ് സയൻസസിലെ ഗവേഷകനുമായ യിങ്‌കി ഷാങ് പറഞ്ഞു. പല്ലുകൾ ശരീരത്തിലെ ഏറ്റവും കട്ടിയുള്ള കലകളിലൊന്നായതിനാൽ അവ ഗുഹകളിൽ അവശേഷിച്ചിരിക്കാമെന്നും അദ്ദേഹം വ്യക്തമാക്കി.

മഴക്കാടുകളിലും ജീവിച്ചിരുന്ന ഹോമോ ഇറക്ടസ്; പുതിയ ഫോസിൽ കണ്ടെത്തൽ
(Supplied: Yingqi Zhang/IVPP-CAS)

പല്ലുകൾ വെളിപ്പെടുത്തിയ ജീവിതരീതി

പല്ലിന്റെ ഇനാമലിൽ കാണപ്പെടുന്ന സ്ട്രോൺഷ്യം ഉൾപ്പെടെയുള്ള രാസമൂലകങ്ങൾ പരിശോധിച്ചാണ് ഹോമോ ഇറക്ടസിന്റെയും മറ്റ് മൃഗങ്ങളുടെയും ഭക്ഷണരീതിയും ആവാസവ്യവസ്ഥയും ഗവേഷകർ പഠിച്ചത്. സാന്ദ്രമായ മഴക്കാടുകളിൽ ഭക്ഷ്യശൃംഖലയുടെ മുകളിലായിരുന്നു ഹോമോ ഇറക്ടസിന്റെ സ്ഥാനമെന്നാണ് പഠനത്തിൽ പങ്കെടുത്ത സതേൺ ക്രോസ് സർവകലാശാലയിലെ ജിയോ ക്രോണോളജിസ്റ്റ് റെനോഡ് ജോവാൻസ്-ബോയു പറഞ്ഞത്. പല്ലിന്റെ ഇനാമലിലെ വളർച്ചയുടെ പാളികൾ പരിശോധിച്ചതിലൂടെ ജീവിതത്തിന്റെ വിവിധ ഘട്ടങ്ങളിൽ ഇവർ എന്താണ് ഭക്ഷിച്ചിരുന്നതെന്നും എവിടെയായിരുന്നു ജീവിച്ചിരുന്നതെന്നും കണ്ടെത്താൻ ഗവേഷകർക്ക് കഴിഞ്ഞു. ജീവിതത്തിന്റെ ആദ്യഘട്ടത്തിൽ ഇന്നത്തെ വിയറ്റ്നാമിൽ നിന്ന് ഏകദേശം 250 കിലോമീറ്റർ അകലെയുള്ള പ്രദേശത്തെ ഭക്ഷണം ഇവർ കഴിച്ചിരുന്നതായും തെളിവുകൾ സൂചിപ്പിക്കുന്നു. ഇത് ഹോമോ ഇറക്ടസ് ദീർഘദൂരം സഞ്ചരിക്കുകയും വ്യത്യസ്ത പരിസ്ഥിതികളുമായി പൊരുത്തപ്പെടുകയും ചെയ്തിരുന്നുവെന്ന് വ്യക്തമാക്കുന്നു. ഇത്തരം കഴിവുകൾ ഹോമോ സാപിയൻസിന് മാത്രമാണ് ഉണ്ടായിരുന്നതെന്നാണ് മുമ്പ് കരുതിയിരുന്നതെന്നും ഗവേഷകർ ചൂണ്ടിക്കാട്ടി.

വംശനാശത്തിന് പിന്നിലെ കാരണമെന്ത്?

ഹോമോ ഇറക്ടസിന്റെ വംശനാശത്തിന് പിന്നിലെ കാരണങ്ങൾ ഇപ്പോഴും വ്യക്തമല്ല. ചൈനയിൽ നിന്ന് കണ്ടെത്തിയ തിരിച്ചറിയാത്ത ഒൻപതാമത്തെ പല്ല് ഡെനിസോവൻ മനുഷ്യന്റേതാകാമെന്നും അല്ലെങ്കിൽ മറ്റൊരു പുതിയ മനുഷ്യവർഗത്തിന്റേതാകാമെന്നും ഗവേഷകർ സംശയിക്കുന്നു. ചൈനയിൽ കണ്ടെത്തിയ ഏറ്റവും പഴക്കമുള്ള ഹോമോ സാപിയൻസ് പല്ലുകൾക്ക് 1.20 ലക്ഷം മുതൽ 80,000 വർഷം വരെ പഴക്കമുണ്ട്. അതിനാൽ ഹോമോ ഇറക്ടസ്, ഡെനിസോവൻ, ആധുനിക മനുഷ്യർ എന്നീ മൂന്ന് മനുഷ്യവർഗങ്ങളും ഏതാണ്ട് ഒരേ കാലഘട്ടത്തിൽ ജീവിച്ചിരുന്നിരിക്കാമെന്നാണ് പഠനങ്ങൾ സൂചിപ്പിക്കുന്നത്.

ഹോമോ ഇറക്ടസ് അവസാനകാലത്ത് ഡെനിസോവൻ, നിയാണ്ടർത്താൽ, ആധുനിക മനുഷ്യർ എന്നിവരുമായി സമ്പർക്കത്തിലായിരിക്കാമെന്ന് ലാ ട്രോബ് സർവകലാശാലയിലെ പുരാവസ്തു ഗവേഷകൻ ജെസ്സി മാർട്ടിൻ പറഞ്ഞു. വിഭവങ്ങൾക്കായുള്ള മത്സരം വർധിച്ചത് ഇവരുടെ വംശനാശത്തിന് കാരണമായിരിക്കാമെന്നും അദ്ദേഹം വിലയിരുത്തി.

കാലാവസ്ഥാ വ്യതിയാനത്തിന്റെ പ്രത്യാഘാതങ്ങളിൽ നിന്ന് മനുഷ്യവർഗം ഒരിക്കലും പൂർണമായി സുരക്ഷിതരായിരുന്നിട്ടില്ലെന്ന കാര്യവും ഹോമോ ഇറക്ടസിന്റെ ഉയർച്ചയും തകർച്ചയും ഓർമിപ്പിക്കുന്നതായി ഗവേഷകർ ചൂണ്ടിക്കാട്ടുന്നു.