ഇറാനിലെ ആണവ കേന്ദ്രങ്ങൾ തകർക്കാൻ അമേരിക്കൻ പ്രസിഡന്റ് ഡൊണാൾഡ് ട്രംപ് ഉത്തരവിട്ട സൈനിക നടപടിക്ക് കാനഡ പൂർണ്ണ പിന്തുണ പ്രഖ്യാപിച്ചു. ഇറാൻ ആണവായുധം നിർമ്മിക്കുന്നത് തടയാനും അന്താരാഷ്ട്ര സമാധാനത്തിന് ഭീഷണിയാകുന്ന നീക്കങ്ങൾ അവസാനിപ്പിക്കാനുമുള്ള അമേരിക്കയുടെ നടപടിയെ അനുകൂലിക്കുന്നതായി കനേഡിയൻ പ്രധാനമന്ത്രി മാർക്ക് കാർണിയും വിദേശകാര്യ മന്ത്രി അനിത ആനന്ദും സംയുക്ത പ്രസ്താവനയിൽ അറിയിച്ചു.
'ഓപ്പറേഷൻ എപ്പിക് ഫ്യൂറി' എന്ന് പേരിട്ടിരിക്കുന്ന ഈ സൈനിക നീക്കം ഇറാന്റെ മിസൈൽ വ്യവസായത്തെയും നാവികസേനയെയും തകർക്കാൻ ലക്ഷ്യമിട്ടുള്ളതാണെന്ന് ട്രംപ് വ്യക്തമാക്കി. ഇറാൻ പരമോന്നത നേതാവ് ആയത്തുള്ള അലി ഖമേനിയുടെ ഓഫീസിന് സമീപം ഉൾപ്പെടെ ശനിയാഴ്ച പുലർച്ചെ ശക്തമായ സ്ഫോടനങ്ങൾ നടന്നു. ഇസ്ഫഹാൻ, ഷിറാസ്, തബ്രിസ് തുടങ്ങിയ പ്രധാന നഗരങ്ങളിലും ആക്രമണമുണ്ടായതായാണ് റിപ്പോർട്ട്.
ഇറാൻ ഭരണകൂടം ഭീകരവാദത്തിന്റെ ഉറവിടമാണെന്നും ആണവായുധങ്ങൾ വികസിപ്പിക്കാൻ അവരെ അനുവദിക്കില്ലെന്നും കാനഡ വ്യക്തമാക്കി. മേഖലയിലുള്ള കനേഡിയൻ പൗരന്മാരുടെ സുരക്ഷ ഉറപ്പാക്കാൻ ആവശ്യമായ നടപടികൾ സ്വീകരിക്കുമെന്നും പ്രധാനമന്ത്രി അറിയിച്ചു. അതേസമയം, ഇറാനിലെ ജനങ്ങൾ ഈ അവസരം ഉപയോഗപ്പെടുത്തി ഭരണമാറ്റത്തിന് തയ്യാറാകണമെന്ന് ട്രംപ് ആഹ്വാനം ചെയ്തു.