ഓസ്ട്രേലിയ / പരവൂർ (കൊല്ലം): സിവിൽ എഞ്ചിനീയറിംഗിലെ രാജ്യത്തെ ഏറ്റവും ഉയർന്ന ബഹുമതികളിലൊന്നായ എഞ്ചിനീയേഴ്‌സ് ഓസ്ട്രേലിയ, 2025 ലെ സർ ജോൺ ഹോളണ്ട് സിവിൽ എഞ്ചിനീയർ ഓഫ് ദി ഇയർ ആയി കൊല്ലം പരവൂരിൽ നിന്നുള്ള ഇന്ത്യൻ വംശജനായ സിവിൽ, പരിസ്ഥിതി എഞ്ചിനീയറായ ഡോ. രാജേന്ദ്ര കുറുപ്പിനെ തിരഞ്ഞെടുത്തു. മികച്ച നേതൃത്വം, innovation, എഞ്ചിനീയറിംഗ് പ്രൊഫഷനും സമൂഹത്തിനും നൽകിയ സേവനം എന്നിവയ്ക്കാണ് ദേശീയ അവാർഡ്. ഈ അവാർഡ് ലഭിച്ച ആദ്യത്തെ ഇന്ത്യൻ വംശജനായ എഞ്ചിനീയറാണ് ഡോ. രാജ് കുറുപ്പ്.
അതേസമയം കൊല്ലം പരവൂരിൽ ഗംഗാധരൻ പിള്ളയുടെയും തങ്കമ്മ അമ്മയുടെയും (ഇരുവരും മരിച്ചു) മകനായി ജനിച്ച രാജ് കുറുപ്പ്, പത്താം ക്ലാസ് വരെ സർക്കാർ, സർക്കാർ എയ്ഡഡ് സ്‌കൂളുകളിൽ പഠിച്ചു. ഫാത്തിമ മാതാ നാഷണൽ കോളേജിൽ നിന്ന് പ്രീ-ഡിഗ്രി പൂർത്തിയാക്കി, തിരുവനന്തപുരം കോളേജ് ഓഫ് എഞ്ചിനീയറിംഗിൽ നിന്ന് സിവിൽ എഞ്ചിനീയറിംഗിൽ ബി.ടെക് നേടി. ടാറ്റ എനർജി റിസർച്ച് ഇൻസ്റ്റിറ്റ്യൂട്ടിൽ (TERI) തന്റെ കരിയർ ആരംഭിച്ച അദ്ദേഹം നെതർലാൻഡിൽ ബിരുദാനന്തര ബിരുദം നേടുന്നതിന് സ്കോളർഷിപ്പ് നേടി. തുടർന്നുള്ള ഗവേഷണ സ്കോളർഷിപ്പ് അദ്ദേഹത്തെ വെസ്റ്റേൺ ഓസ്ട്രേലിയ സർവകലാശാലയിൽ (UWA) എത്തിച്ചു. അദ്ദേഹം പടിഞ്ഞാറൻ ഓസ്‌ട്രേലിയയിലെ പെർത്തിലാണ് സ്ഥിരതാമസമാക്കിയിരിക്കുന്നത്.
പെർത്തിലെ എൻവയോൺമെന്റൽ എഞ്ചിനീയേഴ്‌സ് ഇന്റർനാഷണലിന്റെ (ഇഇഐ) സ്ഥാപകനും സിഇഒയുമാണ് ഡോ. കുറുപ്പ്. വ്യാവസായിക മലിനജല സംസ്കരണം, വിഭവ വീണ്ടെടുക്കൽ, നയ/നിയന്ത്രണ ഉപദേശം എന്നിവയിൽ അദ്ദേഹത്തിന്റെ പ്രവർത്തനങ്ങൾ വ്യാപിക്കുന്നു, കാർബൺ എമിഷൻ കുറയ്ക്കുന്നതിലും ലാൻഡ്‌ഫില്ലുകളിൽ നിന്ന് മാലിന്യങ്ങൾ വഴിതിരിച്ചുവിടുന്നതിലും സ്ഥിരമായ ശ്രദ്ധ നൽകുന്നയാളാണ്. ബിസിനസിനോടൊപ്പം, അദ്ദേഹം ഒരു പ്രൊഫസറായും യുവഎഞ്ചിനീയർമാരെ മെന്റർ ചെയ്യുന്നതിലും സജീവമാണ്.