മെൽബൺ: ഓസ്ട്രേലിയയിൽ പലിശനിരക്ക് തുടർച്ചയായി വർദ്ധിക്കുന്ന സാഹചര്യത്തിൽ രാജ്യത്തെ ഭവന വായ്പാ (Mortgage) വിപണിയിൽ വലിയ പരിഷ്കാരങ്ങൾ വേണമെന്ന ആവശ്യം ശക്തമാകുന്നു. അമേരിക്ക, കാനഡ, ഡെൻമാർക്ക് തുടങ്ങിയ രാജ്യങ്ങളിൽ 30 മുതൽ 50 വർഷം വരെ കാലാവധിയുള്ള ഫിക്സഡ് റേറ്റ് വായ്പകൾ ലഭ്യമാണെങ്കിലും ഓസ്ട്രേലിയയിൽ ഇതിന് സൗകര്യമില്ലെന്ന് കൺസ്യൂമർ പോളിസി റിസർച്ച് സെന്റർ (CPRC) ചൂണ്ടിക്കാട്ടുന്നു.
ഓസ്ട്രേലിയയിലെ ഭൂരിഭാഗം വായ്പകളും വേരിയബിൾ റേറ്റ് (Variable Rate) വിഭാഗത്തിലുള്ളതാണ്. ഇതിനർത്ഥം റിസർവ് ബാങ്ക് പലിശ വർദ്ധിപ്പിക്കുമ്പോൾ സാധാരണക്കാരായ വായ്പക്കാർ ഓരോ മാസവും നൂറുകണക്കിന് ഡോളർ അധികമായി നൽകേണ്ടി വരുന്നു എന്നാണ്. സാമ്പത്തിക വ്യവസ്ഥയിലെ ആഘാതങ്ങൾ താങ്ങേണ്ടി വരുന്ന 'ഷോക്ക് അബ്സോർബറുകളായി' ഓസ്ട്രേലിയൻ വായ്പക്കാർ മാറുന്നുവെന്ന് റിപ്പോർട്ട് കുറ്റപ്പെടുത്തുന്നു.
പ്രധാന നിർദ്ദേശങ്ങൾ:
ദീർഘകാല ഫിക്സഡ് വായ്പകൾ: 20 അല്ലെങ്കിൽ 30 വർഷത്തേക്ക് ഒരേ പലിശനിരക്ക് ഉറപ്പാക്കുന്ന വായ്പകൾ അവതരിപ്പിക്കുക.
ട്രാക്കർ മോർട്ട്ഗേജുകൾ: റിസർവ് ബാങ്കിന്റെ നിരക്ക് മാറ്റങ്ങൾക്കനുസരിച്ച് സുതാര്യമായി മാറുന്ന വായ്പകൾ.
ഫിക്സഡ് പേയ്മെന്റ് ലോണുകൾ: പലിശ മാറിയാലും പ്രതിമാസ തിരിച്ചടവ് തുകയിൽ മാറ്റം വരാത്ത രീതി.
LMI പരിഷ്കാരം: വായ്പക്കാർക്ക് അധിക ബാധ്യതയാകുന്ന ലെൻഡേഴ്സ് മോർട്ട്ഗേജ് ഇൻഷുറൻസ് (LMI) നിർത്തലാക്കുകയോ പരിഷ്കരിക്കുകയോ ചെയ്യുക.
നിലവിൽ ഓസ്ട്രേലിയയിൽ 97 ശതമാനം വായ്പകളും വേരിയബിൾ നിരക്കിലാണ്. ഇത് മാറണമെന്നും വായ്പക്കാർക്ക് കൂടുതൽ സുരക്ഷിതത്വവും സാമ്പത്തിക സ്ഥിരതയും നൽകുന്ന ഉൽപ്പന്നങ്ങൾ ബാങ്കുകൾ നൽകണമെന്നും വിദഗ്ധർ ആവശ്യപ്പെടുന്നു.
