ഓസ്‌ട്രേലിയയിലെ പിൽബറ മേഖലയിലെ ഇരുമ്പയിര് ഖനന പ്രവർത്തനങ്ങളിൽനിന്ന് 300 തസ്തികകൾ വെട്ടിക്കുറയ്ക്കുമെന്ന് ഖനന ഭീമനായ ബിഎച്ച്പി സ്ഥിരീകരിച്ചു. പടിഞ്ഞാറൻ ഓസ്‌ട്രേലിയയിലെ നാല് ഖനന കേന്ദ്രങ്ങളെയാണ് തീരുമാനം ബാധിക്കുക. സൗത്ത് ഫ്ലാങ്ക്, മൈനിങ് ഏരിയ സി, ന്യൂമാൻ, ജിംബിൾബാർ എന്നീ ഖനന കേന്ദ്രങ്ങളിലാണ് തൊഴിൽ വെട്ടിക്കുറയ്ക്കൽ നടപ്പാക്കുന്നത്. ബാധിക്കപ്പെടുന്ന ജീവനക്കാരുമായും ബന്ധപ്പെട്ട തൊഴിലാളി യൂണിയനുകളുമായും ഒക്ടോബർ അഞ്ചുമുതൽ ചർച്ചകൾ നടക്കുന്നുണ്ടെന്ന് കമ്പനി അറിയിച്ചു. നടപടിയുടെ വിശദാംശങ്ങൾ അന്തിമമാക്കുന്നതിനുള്ള പ്രവർത്തനങ്ങൾ തുടരുകയാണെന്നും ബിഎച്ച്പി വ്യക്തമാക്കി.
സുരക്ഷിതമായും കാര്യക്ഷമമായും ഉൽപ്പാദനക്ഷമമായും പ്രവർത്തിക്കാൻ ബിസിനസ് നടപടികൾ പതിവായി വിലയിരുത്തുന്നതിന്റെ ഭാഗമായാണ് മാറ്റങ്ങളെന്ന് കമ്പനി വക്താവ് പറഞ്ഞു. പിൽബറ മേഖലയിലും പടിഞ്ഞാറൻ ഓസ്‌ട്രേലിയയിലും സാമ്പത്തിക സംഭാവന തുടരുന്നതിനൊപ്പം സംസ്ഥാനത്തെ പ്രധാന തൊഴിൽദാതാവായി നിലനിൽക്കാനും ഈ മാറ്റങ്ങൾ സഹായിക്കുമെന്നാണ് കമ്പനിയുടെ വിശദീകരണം. ജോലി നഷ്ടപ്പെടാൻ സാധ്യതയുള്ള ജീവനക്കാരെ സാധ്യമായിടത്തോളം കമ്പനിയിലെ മറ്റ് തസ്തികകളിലേക്ക് പുനർനിയമിക്കാൻ ശ്രമിക്കുമെന്നും ബിഎച്ച്പി അറിയിച്ചു.
അതേസമയം, നിർബന്ധിത പിരിച്ചുവിടലുകളുടെ എണ്ണം കുറയ്ക്കാനുള്ള നടപടികൾക്കായി തൊഴിലാളി യൂണിയനുകൾ രംഗത്തെത്തി. ഓസ്‌ട്രേലിയൻ വർക്കേഴ്സ് യൂണിയനും മൈനിങ് ആൻഡ് എനർജി യൂണിയനും ഉൾപ്പെടുന്ന വെസ്റ്റേൺ മൈൻ വർക്കേഴ്സ് അലയൻസ് വ്യാഴാഴ്ച ബിഎച്ച്പി അധികൃതരുമായി കൂടിക്കാഴ്ച നടത്തും. എത്ര തസ്തികകളെയാണ് ബാധിക്കുക, നടപടികൾ പൂർത്തിയാക്കാൻ എത്ര സമയമെടുക്കും തുടങ്ങിയ കാര്യങ്ങളിൽ വ്യക്തത തേടുമെന്ന് സഖ്യം അറിയിച്ചു. നിർബന്ധിത പിരിച്ചുവിടലുകൾ കുറയ്ക്കാനും തൊഴിലാളികൾക്കുണ്ടാകുന്ന ആഘാതം ലഘൂകരിക്കാനുമുള്ള മാർഗങ്ങൾ ചർച്ച ചെയ്യുമെന്നും യൂണിയൻ വ്യക്തമാക്കി.