പെർത്തിലുള്ള ഒരു ശിശുരോഗ വിദഗ്ധനെതിരെ കുട്ടികൾക്കെതിരായ ലൈംഗിക അതിക്രമവുമായി ബന്ധപ്പെട്ട 31 അധിക കുറ്റങ്ങൾ കൂടി ചുമത്തിയതായി വെസ്റ്റേൺ ഓസ്ട്രേലിയ പോലീസ് അറിയിച്ചു. കുട്ടികളുടെ പെരുമാറ്റ പ്രശ്നങ്ങളിലും വികസന സംബന്ധമായ വിഷയങ്ങളിലും വിദഗ്ധനായ 41-കാരൻ മിഡ്ലാൻഡിലും നെഡ്ലാൻഡ്സിലുമാണ് സേവനം നൽകിയിരുന്നത്. മേയിൽ, 16 വയസ്സിന് താഴെയുള്ള ഒരു കുട്ടിയെ ആക്രമിച്ചതിനും കുട്ടികളുടെ ചൂഷണ ദൃശ്യങ്ങൾ കൈവശം വച്ചതിനും ഇയാൾക്കെതിരെ ആദ്യമായി കേസെടുത്തിരുന്നു.
തുടർന്നുള്ള അന്വേഷണത്തിൽ ഒമ്പത് പുതിയ ഇരകളെ പോലീസ് തിരിച്ചറിഞ്ഞതോടെയാണ് ഇയാൾക്കെതിരെ കൂടുതൽ ഗുരുതരമായ കുറ്റങ്ങൾ ചുമത്തിയത്. 13 മുതൽ 16 വയസ് വരെയുള്ള കുട്ടികളുമായി ലൈംഗിക ബന്ധത്തിൽ ഏർപ്പെട്ടുവെന്ന കുറ്റവും പുതിയ കേസുകളിൽ ഉൾപ്പെടുന്നു."മേയിൽ ആരംഭിച്ച വിപുലമായ അന്വേഷണത്തിന്റെ ഭാഗമായി പ്രതിയായ ശിശുരോഗ വിദഗ്ധൻ ലൈംഗികമായി പീഡിപ്പിച്ചെന്ന് ആരോപിക്കപ്പെടുന്ന ഒമ്പത് അധിക ഇരകളെ കണ്ടെത്തിയിരിക്കുന്നത്," എന്ന് വെസ്റ്റേൺ ഓസ്ട്രേലിയ പോലീസ് പ്രസ്താവനയിൽ അറിയിച്ചു.
മേയിൽ അറസ്റ്റിലായ ശേഷം പ്രതി ജാമ്യാപേക്ഷ പരിഗണിക്കുന്നതുവരെ കസ്റ്റഡിയിലാണ്. വെള്ളിയാഴ്ച ഇയാളെ വീണ്ടും കോടതിയിൽ ഹാജരാക്കും. കേസിലെ അന്വേഷണം തുടരുകയാണെന്നും ഇതുമായി ബന്ധപ്പെട്ട വിവരങ്ങൾ നൽകാൻ കഴിയുന്നവർ മുന്നോട്ട് വരണമെന്നും പോലീസ് അഭ്യർഥിച്ചു. അതേസമയം ലൈംഗികാതിക്രമത്തിന്റെയോ കുടുംബാതിക്രമത്തിന്റെയോ ഇരകൾക്ക് 1800RESPECT (1800 737 732) എന്ന ദേശീയ കൗൺസിലിംഗ് സേവനത്തിലൂടെ സഹായം ലഭ്യമാണെന്നും അധികൃതർ അറിയിച്ചു.