പടിഞ്ഞാറൻ ഓസ്ട്രേലിയയിൽ കാലാവസ്ഥാ മുന്നറിയിപ്പ് തുടരുന്നു. വാരാന്ത്യത്തിൽ അനുഭവപ്പെട്ടതിനു സമാനമായ ശക്തമായ കാറ്റും ഉയർന്ന തിരമാലകളും തിങ്കളാഴ്ചയും തുടരുന്നതിനാൽ പടിഞ്ഞാറൻ ഓസ്‌ട്രേലിയക്കാർക്ക് തീരദേശ അപകട മുന്നറിയിപ്പ് നൽകി. ജൂറിയൻ ബേയ്ക്കും ബൺബറിക്കും ഇടയിലുള്ള തീരത്ത് ശക്തമായ തെക്ക്-പടിഞ്ഞാറൻ കാറ്റും ശക്തമായ തിരമാലകളും അനുഭവപ്പെടും.
Read More: കനത്ത കാറ്റും മഴയും, പെർത്ത് ഉൾപ്പെടെയുള്ള ഇടങ്ങളിൽ മുന്നറിയിപ്പ്
തീരദേശ മണ്ണൊലിപ്പിനും മറ്റു നാശനഷ്ടങ്ങൾക്കും സാധ്യതയുള്ളതിനാൽ പ്രതിരോധ നടപടികൾ സ്വീകരിക്കാൻ കാലാവസ്ഥാ നിരീക്ഷണ ബ്യൂറോ താമസക്കാർക്ക് മുന്നറിയിപ്പ് നൽകിയിട്ടുണ്ട്. "ഈ പ്രദേശങ്ങളിലെ കടൽത്തീര സാഹചര്യങ്ങൾ അപകടകരമാണ്, ആളുകൾ ഈ പ്രദേശങ്ങളിൽ നിന്ന് വളരെ മാറിനിൽക്കണമെന്നാണ് അറിയിപ്പിൽ പറയുന്നത്. വെസ്റ്റേൺ ഓസ്ട്രേലിയ നിവാസികൾക്ക് വാരാന്ത്യത്തിൽ ശക്തമായ കൊടുങ്കാറ്റ് അനുഭവപ്പെട്ടതിനെ തുടർന്നാണ് അപകട മുന്നറിയിപ്പ് നൽകിയിരിക്കുന്നത്, ഇവിടങ്ങളിൽ മണിക്കൂറിൽ 100 കിലോമീറ്ററിൽ കൂടുതൽ വേഗതയിൽ കാറ്റ് വീശുന്നു.
നേരത്തെ ശക്തമായ കാറ്റും മഴയും അടക്കമുള്ള കാലാവസ്ഥ വൈദ്യുതി ലൈനുകൾക്ക് കേടുപാടുകൾ വരുത്തിയതിനാൽ പെർത്തിലെ ഏകദേശം 20,000 വീടുകൾക്ക് ഞായറാഴ്ച രാവിലെ മുഴുവൻ വൈദ്യുതി മുടങ്ങിയിരുന്നു. പെർത്തിന്റെ ഇന്നലൂവിലുള്ള ഐകെഇഎ ലൊക്കേഷൻ ഞായറാഴ്ച ഷോപ്പർമാർക്ക് അടച്ചിരുന്നു, കനത്ത മഴയിൽ മേൽക്കൂരയ്ക്ക് സാരമായ കേടുപാടുകൾ സംഭവിച്ചു. പെർത്തിന്റെ തെക്ക് ഭാഗത്തുള്ള മണ്ടുറ ഫോറം ഷോപ്പിംഗ് സെന്ററും വെസ്റ്റേൺ പവർ തടസ്സം കാരണം ഞായറാഴ്ച താൽക്കാലികമായി അടയ്ക്കുകയും ചെയ്തു.
കാലാവസ്ഥയിൽ എന്തെങ്കിലും മാറ്റങ്ങൾ ഉണ്ടാകുമോ എന്ന് അറിയാൻ ഫയർ ആൻഡ് എമർജൻസി സർവീസസ് വകുപ്പുമായി ബന്ധപ്പെടാനും പ്രദേശത്തെ താമസക്കാർക്ക് നിർദ്ദേശമുണ്ട്.
തീരദേശ പ്രദേശങ്ങളിലെ താമസക്കാർക്കുള്ള നിർദ്ദേശങ്ങൾ
- ബോട്ടിംഗ്, നീന്തൽ അല്ലെങ്കിൽ സർഫിംഗ് എന്നിവ ഒഴിവാക്കുക
- ബീച്ചുകൾ, വേലിയേറ്റ നദികൾ, അരുവികൾ, പാറക്കെട്ടുകൾ, മണൽക്കൂനകൾ എന്നിവയുൾപ്പെടെയുള്ള തീരദേശ പ്രദേശങ്ങളിൽ നിന്ന് അകലം പാലിക്കുക.
- ബീച്ചുകൾ അടച്ചിടൽ ഉണ്ടായേക്കാം. പ്രാദേശിക അധികാരികളുടെ നിർദ്ദേശങ്ങള്‍ പാലിക്കുക.
- വെള്ളപ്പൊക്കമുള്ള അഴുക്കുചാലുകളിൽ നിന്ന് അകലം പാലിക്കുക.
- ആഴവും ഒഴുക്കും ഉള്ള വെള്ളത്തിലേക്ക് വാഹനമോടിക്കരുത്.
- നിങ്ങൾ അപകടസാധ്യതയുള്ള പ്രദേശത്ത് താമസിക്കുന്നുണ്ടെങ്കിൽ, സുരക്ഷിതമായ സ്ഥലത്തേക്ക് മാറാൻ തയ്യാറാകുക.
- വെള്ളം കയറാതിരിക്കാൻ ഫർണിച്ചറുകളും മറ്റ് വസ്തുക്കളും മുകളിലേക്ക് നീക്കുക, ശക്തമായ കാറ്റിൽ നീക്കാൻ സാധ്യതയുള്ള അയഞ്ഞ വസ്തുക്കൾ സൂക്ഷിക്കുകയോ കെട്ടിയിടുകയോ ചെയ്യുക.