വംശനാശ ഭീഷണി നേരിടുന്ന പത്ത് ജീവിവർഗങ്ങളെ സംരക്ഷിച്ച് അവയുടെ എണ്ണം വർധിപ്പിക്കാൻ ഓസ്‌ട്രേലിയയിൽ നടത്തിയ പത്ത് വർഷത്തെ പ്രവർത്തനങ്ങൾ ഡോക്യുമെന്ററിയായി. ഓസ്‌ട്രേലിയൻ വൈൽഡ്‌ലൈഫ് കൺസർവൻസി (AWC) ഫോട്ടോഗ്രാഫറും വീഡിയോഗ്രാഫറുമായ ബ്രാഡ് ല്യൂ ചിത്രീകരിച്ച ബാക്ക് ടു ദ ബുഷ് എന്ന ഡോക്യുമെന്ററി രാജ്യാന്തര വൈൽഡ്‌ലൈഫ് കൺസർവേഷൻ ഫിലിം ഫെസ്റ്റിവലിലേക്ക് തിരഞ്ഞെടുക്കപ്പെട്ടു. പടിഞ്ഞാറൻ ഓസ്‌ട്രേലിയയിലെ പെർത്തിൽ നിന്ന് 360 കിലോമീറ്റർ വടക്കുകിഴക്കുള്ള മൗണ്ട് ഗിബ്സൺ വന്യജീവി സങ്കേതത്തിൽ നടത്തിയ സംരക്ഷണ പ്രവർത്തനങ്ങളാണ് ഡോക്യുമെന്ററിയുടെ പ്രമേയം. വേട്ടയാടുന്ന വന്യമൃഗങ്ങളുടെ കടന്നുകയറ്റം തടയാൻ വേലികെട്ടിയ സംരക്ഷിത മേഖല ഒരുക്കിയാണ് പത്ത് ജീവിവർഗങ്ങളെ വംശനാശത്തിന്റെ വക്കിൽനിന്ന് തിരിച്ചുകൊണ്ടുവരാനുള്ള ശ്രമം നടത്തിയത്.
ഓസ്‌ട്രേലിയയിലെ ഏറ്റവും വലിയ ജീവിവർഗ പുനരവതരണ പദ്ധതികളിലൊന്ന് ആഗോള പ്രേക്ഷകരിലേക്ക് എത്തിക്കാൻ കഴിഞ്ഞത് വലിയ നേട്ടമാണെന്ന് ബ്രാഡ് ല്യൂ പറഞ്ഞു. പത്ത് വർഷത്തിനിടെ നൂറുകണക്കിന് മണിക്കൂർ ദൈർഘ്യമുള്ള ദൃശ്യങ്ങളാണ് അദ്ദേഹം പകർത്തിയത്. മണ്ണിൽ മാളങ്ങളും കുഴികളും നിർമിക്കുന്ന ജീവികൾ ആവാസവ്യവസ്ഥയെ മാറ്റിമറിക്കുന്നവയാണെന്ന് ല്യൂ ചൂണ്ടിക്കാട്ടി. അവയുടെ പ്രവർത്തനഫലമായി പ്രദേശം മുഴുവൻ കുഴികളും മാളങ്ങളും നിറഞ്ഞ നിലയിലായി. വിദേശത്തുനിന്നെത്തിയ വേട്ടക്കാരായ ജീവികൾ തദ്ദേശീയ വന്യജീവികൾക്ക് ഭീഷണിയാകുന്നതിന് മുമ്പുള്ള ഓസ്‌ട്രേലിയൻ പ്രകൃതിയുടെ രൂപം തിരിച്ചുവരുന്നതുപോലെയാണ് ഇപ്പോൾ പ്രദേശമെന്നും അദ്ദേഹം പറഞ്ഞു.
രാത്രികാല ചിത്രീകരണം വെല്ലുവിളിയായി
ചെറുതും രാത്രിയിൽ സജീവവുമായ ജീവികളുടെ സ്വാഭാവിക പെരുമാറ്റം ചിത്രീകരിക്കുക വലിയ വെല്ലുവിളിയായിരുന്നുവെന്ന് ല്യൂ പറഞ്ഞു. ഇതിനായി സ്വയം പ്രവർത്തിക്കുന്ന ക്യാമറ ട്രാപ്പുകൾ ഉപയോഗിക്കുകയും രാത്രിയിൽ മണിക്കൂറുകളോളം കാത്തിരുന്ന് ദൃശ്യങ്ങൾ പകർത്തുകയും ചെയ്തു. അപൂർവമായി മാത്രം കാണപ്പെടുന്ന ജീവികളെ ചിത്രീകരിക്കാൻ അവയുടെ സ്വഭാവം മനസ്സിലാക്കി അതിനനുസരിച്ച് പ്രവർത്തിക്കേണ്ടിവരുമെന്നും അദ്ദേഹം പറഞ്ഞു. വന്യജീവികളെ ഏറെ ഇഷ്ടപ്പെടുന്ന ഒരാൾക്ക് മൗണ്ട് ഗിബ്സൺ പറുദീസ പോലെയാണെന്നും ല്യൂ കൂട്ടിച്ചേർത്തു. സംരക്ഷിത മേഖലയിൽ ജീവികളെ തുറന്നുവിടുമ്പോൾ കൂട്ടിൽനിന്ന് പുറത്തേക്ക് ചാടിയെത്തുന്ന ചില ജീവികൾ ചെറിയ പരിക്കുകൾക്കും ഇടയാക്കിയിട്ടുണ്ട്. പ്രത്യേകിച്ച് വോയ്ലി എന്ന ചെറിയ സഞ്ചിമൃഗത്തിന് കാലുകൾ സ്പ്രിങ് പോലെയാണെന്നും ഒന്നുമുതൽ രണ്ട് മീറ്റർ വരെ ഉയരത്തിൽ ചാടാൻ ഇവയ്ക്ക് കഴിയുമെന്നും അദ്ദേഹം പറഞ്ഞു.
എട്ട് ജീവിവർഗങ്ങൾ സങ്കേതത്തിൽ തുടരുന്നു
പദ്ധതിയുടെ തുടക്കം മുതൽ ഭാഗമായിരുന്ന AWC സീനിയർ വന്യജീവി പരിസ്ഥിതിശാസ്ത്രജ്ഞ ബ്രയോണി പാമർ, ദീർഘകാല സംരക്ഷണ പ്രവർത്തനങ്ങളുടെ ഫലം നേരിൽ കാണുന്നത് അതിശയകരമാണെന്ന് പറഞ്ഞു. ദൈനംദിന ജോലികൾക്കിടയിൽ പദ്ധതിയുടെ വലിയ ലക്ഷ്യവും നേട്ടങ്ങളും ചിലപ്പോൾ ശ്രദ്ധയിൽപ്പെടാതെ പോകാം. എന്നാൽ വിവിധ ജീവിവർഗങ്ങൾക്ക് ലഭിച്ച വ്യക്തമായ സംരക്ഷണ നേട്ടങ്ങൾ കാണുന്നത് ഏറെ സംതൃപ്തി നൽകുന്നുവെന്നും അവർ പറഞ്ഞു. പത്ത് ജീവിവർഗങ്ങളിൽ എട്ടെണ്ണം ഇപ്പോൾ സങ്കേതത്തിലുണ്ടെന്നും അവയിൽ മിക്കതിന്റെയും എണ്ണം ഗണ്യമായി വർധിച്ചിട്ടുണ്ടെന്നും പാമർ വ്യക്തമാക്കി. ജീവികളുടെ കാൽപ്പാടുകളും മണ്ണിലെ കുഴികളും മാളങ്ങളും എല്ലായിടത്തും കാണാനാകുന്നുവെന്നും പ്രകൃതി അതിന്റെ പഴയ നിലയിലേക്ക് മടങ്ങുന്നതുപോലെയാണ് അനുഭവപ്പെടുന്നതെന്നും അവർ പറഞ്ഞു. വേട്ടക്കാരായ ജീവികൾക്ക് കടന്നുകയറാനാകാത്ത സംരക്ഷിത അതിർത്തിക്ക് പുറത്തും ചില ജീവിവർഗങ്ങളെ പുനരധിവസിപ്പിക്കുകയാണ് അടുത്ത ലക്ഷ്യമെന്ന് പാമർ അറിയിച്ചു. സംരക്ഷണ പ്രവർത്തനങ്ങൾ ഒരിക്കലും അവസാനിക്കുന്നില്ലെന്നും അവർ കൂട്ടിച്ചേർത്തു.