മെൽബണിൽ 15 വയസ്സുകാരനെ കുത്തിക്കൊലപ്പെടുത്തിയ കേസിൽ മൂന്നാമത്തെ കൗമാരക്കാരനെ കൂടി പൊലീസ് അറസ്റ്റ് ചെയ്ത് കൊലക്കുറ്റം ചുമത്തി. ബുധനാഴ്ച രാത്രി 7.50ഓടെ ക്രെയ്ഗിബേൺ കമ്മ്യൂണിറ്റി ആശുപത്രിയുടെ കാർ പാർക്കിൽ കുത്തേറ്റ നിലയിൽ കണ്ടെത്തിയ മൗണ്ട് റിഡ്ലി കോളേജ് വിദ്യാർത്ഥിയായ ദർവീഷ് മുഹമ്മദ് ആശുപത്രി ജീവനക്കാരന്റെ രക്ഷാപ്രവർത്തനങ്ങൾക്കിടയിലും മരണത്തിന് കീഴടങ്ങുകയായിരുന്നു.
സംഭവത്തിന് ഏകദേശം ഒമ്പത് മണിക്കൂറുകൾക്ക് ശേഷം പാസ്കോ വെയിൽ മേഖലയിൽ നിന്ന് 16 വയസ്സുകാരനെയും 20 വയസ്സുള്ള ഒരാളെയും പൊലീസ് അറസ്റ്റ് ചെയ്തു. 16 വയസ്സുകാരനെതിരെ കൊലക്കുറ്റം ചുമത്തി. തുടർന്ന് വെള്ളിയാഴ്ച രാവിലെ 15 വയസ്സുള്ള മറ്റൊരു ബാലനെയും കൊലക്കുറ്റം ചുമത്തി അറസ്റ്റ് ചെയ്തു. വെള്ളിയാഴ്ച രാത്രി ഹ്യൂം മേഖലയിലെ 14 വയസ്സുകാരനെയും പൊലീസ് അറസ്റ്റ് ചെയ്ത് കൊലക്കുറ്റം ചുമത്തി. മൂന്ന് കൗമാരക്കാരും കുട്ടികളുടെ കോടതിയിൽ ഹാജരാക്കും.
അതേസമയം, 20 വയസ്സുള്ള ബെവറിഡ്ജ് സ്വദേശിക്കെതിരെ തീ വെച്ച് സ്വത്ത് നശിപ്പിച്ചതിന് കേസെടുത്തു. ഇയാളെ പിന്നീട് ജാമ്യത്തിൽ വിട്ടു. 15 വയസ്സുള്ള ഒരു പെൺകുട്ടിയെയും പൊലീസ് അറസ്റ്റ് ചെയ്തു. കൂട്ടമായി അക്രമം നടത്തിയതിനും വാഹനം മോഷ്ടിച്ചതിനുമാണ് ഇവർക്കെതിരെ കുറ്റം ചുമത്തിയത്. ഇവരെയും പിന്നീട് ജാമ്യത്തിൽ വിട്ടു. കേസുമായി ബന്ധപ്പെട്ട അന്വേഷണം തുടരുകയാണ്. സംഭവത്തിന് പിന്നാലെ വ്യാഴാഴ്ച രാവിലെ പൊലീസ് ആശുപത്രിക്ക് സമീപമുള്ള പ്രദേശത്ത് തെളിവുകൾ ശേഖരിച്ചു. സംഭവവുമായി ബന്ധപ്പെട്ടതാണെന്ന് കരുതുന്ന കത്തിക്കരിഞ്ഞ കാർ ഫോറൻസിക് വിദഗ്ധർ പരിശോധിക്കുകയും ചെയ്തു.
ദർവീഷ് മുഹമ്മദിന്റെ അപ്രതീക്ഷിത മരണത്തിൽ കുടുംബാംഗങ്ങളും സുഹൃത്തുക്കളും കടുത്ത ദുഃഖത്തിലാണ്. നിരവധി സുഹൃത്തുക്കൾ സമൂഹമാധ്യമങ്ങളിലൂടെ ആദരാഞ്ജലികൾ അർപ്പിച്ചപ്പോൾ, സംഭവസ്ഥലത്ത് അനുസ്മരണസ്മാരകവും ഉയർന്നു. സംഭവത്തെ തുടർന്ന് പ്രതികരിച്ച പ്രതിപക്ഷ നേതാവ് ജെസ് വിൽസൺ, "ഒരു അമ്മയ്ക്ക് ജീവിതത്തിലെ ഏറ്റവും ദാരുണമായ വാർത്തയോടെയാണ് ഇന്നത്തെ പ്രഭാതം ആരംഭിച്ചത്. വിക്ടോറിയയിൽ യുവാക്കളുടെ ജീവൻ ദിവസേന അപകടത്തിലാകുകയാണ്," എന്ന് പറഞ്ഞു. സംഭവവുമായി ബന്ധപ്പെട്ട വിവരങ്ങളോ ദൃശ്യങ്ങളോ കൈവശമുള്ളവർ ക്രൈം സ്റ്റോപ്പേഴ്സിനെ ബന്ധപ്പെടണമെന്ന് പൊലീസ് അഭ്യർഥിച്ചു.