മെൽബൺ: ഐഎസിനോട് കൂറ് പ്രഖ്യാപിക്കുകയും ഓൺലൈൻ പ്രചാരകനായി പ്രവർത്തിച്ച് ഏകദേശം 10,000 ഭീകരവാദ അനുകൂല ഫയലുകൾ കൈമാറുകയും ചെയ്തെന്നാരോപിച്ച് 65കാരനെ ഓസ്ട്രേലിയൻ ഫെഡറൽ പൊലീസ് അറസ്റ്റ് ചെയ്തു. കാർൾട്ടണിലെ വീട്ടിൽ ബുധനാഴ്ച നടത്തിയ പരിശോധനയ്ക്ക് പിന്നാലെയാണ് ഇയാളെ അറസ്റ്റ് ചെയ്തത്. ഭീകരസംഘടനയായ ഐഎസിൽ അംഗത്വം, അക്രമാസക്ത തീവ്രവാദ ഉള്ളടക്കവുമായി ബന്ധപ്പെട്ട കുറ്റങ്ങൾ എന്നിവ ഇയാൾക്കെതിരെ ചുമത്തുമെന്നാണ് പൊലീസ് അറിയിച്ചത്.
ഐഎസ് നിയന്ത്രണത്തിലുള്ള പ്രദേശങ്ങളിലേക്ക് ഇയാൾ യാത്ര ചെയ്തിട്ടില്ല. എന്നാൽ സംഘടനയോട് കൂറ് പ്രഖ്യാപിക്കുകയും ഓൺലൈൻ പ്രചാരകനായി പ്രവർത്തിക്കുകയും ചെയ്തെന്നാണ് ആരോപണം. വധശിക്ഷ, പീഡനം തുടങ്ങിയവ ഉൾപ്പെടുന്ന വീഡിയോകൾ, ചിത്രങ്ങൾ, ഓഡിയോ ഫയലുകൾ, രേഖകൾ, സന്ദേശങ്ങൾ എന്നിവ ഉൾപ്പെടുന്ന ഏകദേശം 10,000 തീവ്രവാദ അനുകൂല ഫയലുകൾ ഇയാൾ പങ്കുവെച്ചതായി പൊലീസ് ആരോപിച്ചു.
അധികൃതരുടെ ശ്രദ്ധയിൽപ്പെടുന്നത് ഒഴിവാക്കാനുള്ള മാർഗങ്ങളെക്കുറിച്ചുള്ള വിവരങ്ങളും കൂട്ടമരണത്തിന് ഇടയാക്കുന്ന ആക്രമണങ്ങൾ ആസൂത്രണം ചെയ്ത് നടപ്പാക്കുന്നതിനുള്ള നിർദേശങ്ങളും ഇയാൾ പങ്കുവെച്ചതായും പൊലീസ് ആരോപിച്ചു.