മെൽബൺ: ഓസ്ട്രേലിയൻ സംഗീതലോകത്തെ ഇതിഹാസ ഗായകൻ ജോൺ ഫാർനമിന് ആദരവുമായി മെൽബണിൽ സംഗീതവിരുന്ന്. തല-കഴുത്ത് കാൻസറിനെക്കുറിച്ച് ബോധവത്കരണം നടത്തുന്നതിനും ചികിത്സയ്ക്കായി ധനസമാഹരണം നടത്തുന്നതിനുമായി സംഘടിപ്പിച്ച പരിപാടിയിൽ ഓസ്ട്രേലിയൻ, രാജ്യാന്തര താരങ്ങൾ അണിനിരന്നു. റോഡ് ലേവർ അരീനയിൽ നടന്ന പരിപാടിയുടെ ടിക്കറ്റ് പൂർണമായും വിറ്റുപോയിരുന്നു. രാജ്യത്തുടനീളമുള്ള പ്രേക്ഷകർക്കായി തിരഞ്ഞെടുത്ത സിനിമാ തിയേറ്ററുകളിലും പരിപാടി തത്സമയം പ്രദർശിപ്പിച്ചു. അടുത്ത ഒരു വർഷത്തിനിടെ ഹെഡ് ആൻഡ് നെക്ക് കാൻസർ ഓസ്ട്രേലിയയ്ക്കായി 10 ലക്ഷം ഓസ്ട്രേലിയൻ ഡോളർ സമാഹരിക്കുകയെന്ന ലക്ഷ്യത്തോടെ ആരംഭിച്ച ‘Lend Your Voice’ ക്യാംപയിന്റെ ഭാഗമായാണ് സംഗീതവിരുന്ന് സംഘടിപ്പിച്ചത്.
2022ൽ വായിലെ കാൻസർ ബാധിച്ച ട്യൂമർ നീക്കം ചെയ്യുന്നതിനായി ജോൺ ഫാർനമിന് ദീർഘമായ ശസ്ത്രക്രിയ നടത്തിയിരുന്നു. 2023ൽ പരിശോധനകൾക്ക് ശേഷം കാൻസർ വിമുക്തനായതായി ഡോക്ടർമാർ സ്ഥിരീകരിച്ചിരുന്നു. എന്നാൽ അടുത്തിടെ അദ്ദേഹത്തിന്റെ ആരോഗ്യനില മോശമായതിനെ തുടർന്ന് പരിപാടിയിൽ പങ്കെടുക്കാൻ കഴിഞ്ഞില്ല. 77കാരനായ ഫാർനമിന് ഇപ്പോൾ തുടർച്ചയായ ഓക്സിജൻ സഹായം ആവശ്യമായി വരുന്നതായും സഞ്ചാരത്തിനായി വീൽചെയർ ഉപയോഗിക്കുന്നതായും കുടുംബം അറിയിച്ചു. വീട്ടിൽ 24 മണിക്കൂർ നഴ്സിങ് പരിചരണവും ആവശ്യമായി വന്നിട്ടുണ്ടെന്നും കുടുംബം പ്രസ്താവനയിൽ വ്യക്തമാക്കി.
പരിപാടിയുടെ അവതാരകനായ റിച്ചാർഡ് വിൽക്കിൻസ്, ഫാർനമിന്റെ കരിയറിലെ റോഡ് ലേവർ അരീനയിലെ 94 ഹൗസ്ഫുൾ ഷോകൾ അനുസ്മരിച്ചു. ഇതോടെ വേദിയിലെ അദ്ദേഹത്തിന്റെ 95-ാമത്തെ നിറഞ്ഞ പരിപാടിയാണിതെന്നും വിൽക്കിൻസ് പറഞ്ഞു. ഫാർനമിന് വേദിയിലെത്താൻ കഴിഞ്ഞില്ലെങ്കിലും അദ്ദേഹത്തിന്റെ പഴയ സംഗീതപരിപാടികളുടെ ദൃശ്യങ്ങൾ വലിയ സ്ക്രീനുകളിൽ പ്രദർശിപ്പിച്ചു. ജെസിക്ക മൗബോയ്, ജോൺ സ്റ്റീവൻസ്, ജാക്ക് ജോൺസ്, മഹാലിയ ബാർൺസ്, ഹ്യൂമൻ നേച്ചർ എന്നിവർ ഫാർനമിന്റെ പ്രശസ്ത ഗാനങ്ങൾ ആലപിച്ചുകൊണ്ടാണ് പരിപാടിക്ക് തുടക്കമിട്ടത്.
ഫാർനമിന്റെ മകൻ റോബ് ഫാർനം ‘Love To Shine’ എന്ന ഗാനം ആലപിച്ചു. പരിപാടിയിൽ പങ്കെടുക്കാനെത്തിയ വൻ ജനക്കൂട്ടം തന്റെ പിതാവിനെ ഏറെ സന്തോഷിപ്പിക്കുമായിരുന്നുവെന്ന് അദ്ദേഹം പറഞ്ഞു. ഫാർനമിന്റെ നാടകവേദിയിലെ കരിയറിനും സംഗീതവിരുന്നിൽ ആദരമർപ്പിച്ചു. 1992ലെ ‘Jesus Christ Superstar’ എന്ന സംഗീതനാടകത്തിലെ സഹതാരങ്ങളായ കേറ്റ് സെബറാനോയും ജോൺ സ്റ്റീവൻസും ‘Everything’s Alright’ അവതരിപ്പിച്ചു. നാഷ്വില്ലിൽ നിന്ന് എത്തിയ കെയ്ത്ത് അർബൻ ‘Burn For You’ ആലപിച്ചു. ഫ്രാൻസിൽ നിന്ന് വീഡിയോ സിമുൽക്കാസ്റ്റിലൂടെ പങ്കെടുത്ത സെലിൻ ഡിയോൺ ഫാർനമിനോടുള്ള ആദരം പ്രകടിപ്പിച്ച് ‘You’re The Voice’ ആലപിച്ചു. ഫാർനമിനൊപ്പം മുമ്പ് ഈ ഗാനം അവതരിപ്പിച്ച അനുഭവവും ഡിയോൺ അനുസ്മരിച്ചു.
ജിമ്മി ബാർൺസും മകൾ മഹാലിയ ബാർൺസും ചേർന്ന് ‘When Something Is Wrong with My Baby’ അവതരിപ്പിച്ചു. നടൻ ഹ്യൂ ജാക്ക്മാനും സിമുൽക്കാസ്റ്റിലൂടെ പരിപാടിയുടെ ഭാഗമായി. യുവാവായിരിക്കുമ്പോൾ ഫാർനമിന്റെ പ്രകടനങ്ങൾ നേരിൽ കണ്ട അനുഭവങ്ങൾ പങ്കുവെച്ച ജാക്ക്മാൻ, തന്റെ സ്റ്റേജ് പ്രകടനശൈലിയിൽ ഫാർനമിന് വലിയ സ്വാധീനമുണ്ടെന്ന് പറഞ്ഞു. അവസാനത്തിൽ പരിപാടിയിൽ പങ്കെടുത്ത താരങ്ങളെല്ലാം വീണ്ടും വേദിയിലെത്തി ‘You’re The Voice’ ആലപിച്ചു. 24 ബാഗ്പൈപ്പർമാരും ഗാനത്തിന് അകമ്പടിയായി.
രാജ്യത്തിന്റെ വിവിധ ഭാഗങ്ങളിൽനിന്നാണ് ഫാർനമിന്റെ ആരാധകർ പരിപാടിക്കായി മെൽബണിലെത്തിയത്. ടാസ്മാനിയയിൽ നിന്ന് എത്തിയ ലിയാൻ ഫാർനമിന്റെ സംഗീതം തന്റെ ആരോഗ്യപ്രശ്നകാലത്ത് കുടുംബത്തിന് ആശ്വാസമായിരുന്നുവെന്ന് പറഞ്ഞു. ജീലോങ്ങിൽ നിന്നെത്തിയ ചില ആരാധകർ ഫാർനമിന്റെ പഴയകാല രൂപത്തെ അനുസ്മരിപ്പിക്കുന്ന മൾലെറ്റ് ഹെയർസ്റ്റൈലും ഡബിൾ ഡെനിം വസ്ത്രങ്ങളും ധരിച്ചാണ് പരിപാടിയിൽ പങ്കെടുത്തത്.
പരിപാടിക്കിടെ തല-കഴുത്ത് കാൻസറിനെക്കുറിച്ചുള്ള ബോധവത്കരണത്തിനും പ്രാധാന്യം നൽകി. റോഡ് ലേവർ അരീനയിൽ വായിലെ കാൻസറിന്റെ ലക്ഷണങ്ങൾ പരിശോധിക്കുന്നതിനായി പ്രത്യേക പരിശോധനാ കേന്ദ്രങ്ങളും ഒരുക്കിയിരുന്നു. ഹെഡ് ആൻഡ് നെക്ക് കാൻസർ ഓസ്ട്രേലിയ ചീഫ് എക്സിക്യൂട്ടീവ് നാദിയ റോസിൻ, ഫാർനമും കുടുംബവും രോഗത്തെക്കുറിച്ച് പൊതുജനശ്രദ്ധ ഉയർത്തുന്നതിൽ നൽകിയ പിന്തുണയെ പ്രശംസിച്ചു. നേരത്തെ മെൽബണിൽ നടത്തിയ സമാന ബോധവത്കരണ പരിപാടിയിൽ ഒരു മണിക്കൂറിനിടെ ഏകദേശം 300 പേരെ പരിശോധിച്ചെന്നും അവരിൽ ആറ് പേരെ കൂടുതൽ പരിശോധനയ്ക്കായി റഫർ ചെയ്തെന്നും അവർ പറഞ്ഞു.
ഓസ്ട്രേലിയയിൽ പ്രതിദിനം ഏകദേശം 14 പേർക്ക് തല-കഴുത്ത് കാൻസർ കണ്ടെത്തുന്ന സാഹചര്യത്തിൽ, രോഗത്തിന്റെ ലക്ഷണങ്ങളെക്കുറിച്ച് കൂടുതൽ അവബോധം സൃഷ്ടിക്കാൻ സംഗീതവിരുന്ന് സഹായിക്കുമെന്ന് സംഘാടകർ വ്യക്തമാക്കി.