റിസർവ് ബാങ്ക് ഓഫ് ഓസ്ട്രേലിയയുടെ അടുത്ത യോഗത്തിന് ദിവസങ്ങൾ മാത്രം ശേഷിക്കെ രാജ്യത്തെ പ്രമുഖ ബാങ്കുകളായ ANZയും NABയും ഫിക്സഡ് ഭവനവായ്പ പലിശനിരക്കുകൾ ഉയർത്തി. ING ബുധനാഴ്ച നിരക്ക് വർധിപ്പിച്ചതിന് പിന്നാലെയാണ് രണ്ട് ബാങ്കുകളും വ്യാഴാഴ്ച ഫിക്സഡ് നിരക്കിൽ 0.2 ശതമാനം വർധന വരുത്തിയത്. ഇതോടെ ANZ, NAB എന്നിവയിലെ ഏറ്റവും കുറഞ്ഞ പരസ്യപ്പെടുത്തിയ ഫിക്സഡ് പലിശനിരക്ക് 6.49 ശതമാനമായി. ഉടമസ്ഥാവകാശ ഭവനവായ്പകൾക്കും നിക്ഷേപകർക്കുള്ള ഹോം ലോണുകൾക്കുമുള്ള INGയുടെ ഫിക്സഡ് നിരക്കിലും ബുധനാഴ്ച 0.2 ശതമാനം വർധന വരുത്തിയിരുന്നു.
അടുത്ത RBA യോഗത്തിന് മുന്നോടിയായി ഇതുവരെ ഒമ്പത് വായ്പാദാതാക്കൾ പലിശനിരക്ക് ഉയർത്തിയതായി Canstar അറിയിച്ചു. മുൻകാല നിരക്ക് മാറ്റങ്ങളുമായി താരതമ്യം ചെയ്യുമ്പോൾ എണ്ണം കുറവാണെങ്കിലും അടുത്തിടെയുണ്ടായ വർധന ശ്രദ്ധേയമാണെന്ന് Canstar വ്യക്തമാക്കി. കഴിഞ്ഞ മേയിൽ RBA ക്യാഷ് നിരക്ക് ഉയർത്തുന്നതിന് മുന്നോടിയായുള്ള മാസത്തിൽ 60 ബാങ്കുകൾ ഫിക്സഡ് നിരക്ക് വർധിപ്പിച്ചിരുന്നു. RBA വീണ്ടും പലിശനിരക്ക് ഉയർത്തുമോ എന്നതല്ല, എപ്പോഴാണ് വർധിപ്പിക്കുക എന്നതാണ് ഇപ്പോഴത്തെ പ്രധാന ചോദ്യം എന്ന് Canstar ഡാറ്റ ഇൻസൈറ്റ്സ് ഡയറക്ടർ സാലി ടിൻഡൽ പറഞ്ഞു.
അടുത്ത നിരക്ക് വർധനയ്ക്കായി വായ്പയെടുത്തവർ ഇപ്പോൾ തന്നെ തയ്യാറെടുപ്പ് ആരംഭിക്കണമെന്നും അവർ നിർദേശിച്ചു. അതേസമയം, സെപ്റ്റംബർ അവസാനം നടക്കുന്ന RBA യോഗത്തിന് പിന്നാലെയാണ് ഏറ്റവും പുതിയ പണപ്പെരുപ്പ കണക്കുകൾ പുറത്തുവരുന്നത് എന്നതിനാൽ നവംബർ യോഗം വരെ RBA കാത്തിരിക്കാനും സാധ്യതയുണ്ടെന്ന് ടിൻഡൽ പറഞ്ഞു. നിലവിൽ ഉടമസ്ഥാവകാശ ഭവനവായ്പകൾക്ക് ആറ് ശതമാനത്തിൽ താഴെ വേരിയബിൾ പലിശനിരക്ക് വാഗ്ദാനം ചെയ്യുന്ന 50 വായ്പാദാതാക്കൾ ഉണ്ടെന്നും അവർ ചൂണ്ടിക്കാട്ടി. ബാങ്കുകൾ വിപണി സാഹചര്യങ്ങൾ മുൻകൂട്ടി വിലയിരുത്തിയാണ് ഫിക്സഡ് പലിശനിരക്കുകൾ ക്രമീകരിക്കുന്നതെന്ന് Finder മണി ആൻഡ് ഹോം ലോൺസ് വിദഗ്ധൻ റിച്ചാർഡ് വിറ്റൻ പറഞ്ഞു. പലിശനിരക്ക് കുറയുമെന്ന് പ്രതീക്ഷിക്കുമ്പോൾ ഫിക്സഡ് നിരക്കുകൾ കുറയ്ക്കുകയും വർധന പ്രതീക്ഷിക്കുമ്പോൾ ഉയർത്തുകയുമാണ് സാധാരണ രീതിയെന്നും അദ്ദേഹം പറഞ്ഞു. INGയുടെ നിരക്ക് വർധനയ്ക്ക് പിന്നാലെ മറ്റ് ബാങ്കുകളും സമാനമായ നടപടികൾ സ്വീകരിക്കുമെന്ന് പ്രതീക്ഷിക്കുന്നതായും വിറ്റൻ നേരത്തെ പറഞ്ഞിരുന്നു. ആഭ്യന്തര, ആഗോള വിപണികളിലെ പുതിയ സാഹചര്യങ്ങളാണ് നിരക്ക് മാറ്റത്തിന് കാരണമെന്ന് ING വ്യക്തമാക്കി. ഹോം ലെൻഡിങ് പോർട്ട്ഫോളിയോ അവലോകനം ചെയ്ത ശേഷമാണ് ഫിക്സഡ് ഭവനവായ്പ നിരക്കുകളിൽ മാറ്റം വരുത്തിയതെന്നും ബാങ്ക് അറിയിച്ചു.
RBAയുടെ അടുത്ത യോഗം സെപ്റ്റംബർ 28, 29 തീയതികളിലാണ്. കഴിഞ്ഞ രണ്ട് യോഗങ്ങളിലും ക്യാഷ് നിരക്ക് 4.35 ശതമാനത്തിൽ നിലനിർത്തിയിരുന്നു. വർഷത്തിന്റെ തുടക്കത്തിൽ തുടർച്ചയായി മൂന്ന് തവണ നിരക്ക് ഉയർത്തിയതിന് ശേഷമായിരുന്നു ഇത്. എന്നാൽ പണപ്പെരുപ്പം നിയന്ത്രിക്കുന്നതിലെ വെല്ലുവിളികൾ തുടരുന്നതിനാൽ വീണ്ടും നിരക്ക് ഉയർത്താനുള്ള സാധ്യതയെക്കുറിച്ചുള്ള പ്രവചനങ്ങൾ ശക്തമാണ്. Citi 2026ൽ രണ്ട് നിരക്ക് വർധനകൾ കൂടി ഉണ്ടാകുമെന്ന് പ്രവചിച്ചിട്ടുണ്ട്. ഇതോടെ നിരക്ക് 4.85 ശതമാനം വരെ ഉയർന്നേക്കാമെന്നും പിന്നീട് കുറയുമെന്നുമാണ് Citiയുടെ വിലയിരുത്തൽ. AI മേഖലയിലെ നിക്ഷേപ കുതിപ്പ്, തൊഴിൽ വിപണിയിലെ സമ്മർദം, കുറഞ്ഞ ഉൽപ്പാദനക്ഷമത, ഉയർന്ന എണ്ണവില തുടങ്ങിയ ഘടകങ്ങൾ പണപ്പെരുപ്പം ഉയർന്ന നിലയിൽ തുടരാൻ കാരണമാകുമെന്നാണ് Citi സീനിയർ ഇക്കണോമിസ്റ്റ് ഫറാസ് സയീദിന്റെ വിലയിരുത്തൽ. Macquarie Bankും അടുത്ത RBA യോഗത്തിൽ ക്യാഷ് നിരക്ക് വർധിപ്പിക്കുമെന്ന് പ്രവചിച്ചിട്ടുണ്ട്. RBA ഗവർണർ മിഷേൽ ബുള്ളോക്കും പണപ്പെരുപ്പം നിയന്ത്രിക്കുന്നതിനുള്ള ശ്രമങ്ങൾ തുടരുന്നതിനിടെ കൂടുതൽ നിരക്ക് വർധനയ്ക്കുള്ള സാധ്യത നിലനിൽക്കുന്നുവെന്ന് വ്യക്തമാക്കിയിരുന്നു.