ഹോബാർട്ട്: വടക്കുപടിഞ്ഞാറൻ ടാസ്മാനിയയിലെ വൈൻയാർഡിലുള്ള ടാസ് പെട്രോളിയം സർവീസ് സ്റ്റേഷനിൽ ബോംബ് ഭീതി. തിങ്കളാഴ്ച രാവിലെ 11 മണിയോടെ ഇന്ധനം നിറയ്ക്കുന്ന പമ്പിന് മുകളിൽ ഉപേക്ഷിക്കപ്പെട്ട നിലയിൽ ഒരു പെട്ടി കണ്ടെത്തുകയായിരുന്നു. ഇതിൽ 'റേഡിയോ ആക്ടീവ്' (Radioactive) സ്റ്റിക്കർ പതിപ്പിച്ചിരുന്നതാണ് ആശങ്ക വർദ്ധിപ്പിച്ചത്. സുരക്ഷാ മുൻകരുതലിന്റെ ഭാഗമായി പോലീസ് ഉടൻ തന്നെ പമ്പ് അടപ്പിക്കുകയും പ്രദേശം വളയുകയും ചെയ്തു.
സംഭവം ഗൗരവകരമാണെന്ന് കണ്ടതിനെത്തുടർന്ന് പോലീസ് ബോംബ് സ്ക്വാഡിന്റെ സഹായം തേടി. അവധിയിലായിരുന്ന ഉദ്യോഗസ്ഥരെ ഉൾപ്പെടെ തിരിച്ചുവിളിച്ചാണ് പരിശോധനകൾ നടത്തിയത്. സ്ക്വാഡ് എത്തി പാക്കേജ് പരിശോധിച്ച് സുരക്ഷിതമാണെന്ന് ഉറപ്പുവരുത്തുന്നത് വരെ പ്രദേശം അടച്ചിടുമെന്ന് ടാസ് പെട്രോളിയം ജനറൽ മാനേജർ നഥാൻ തർലോ പറഞ്ഞു. വൈൻയാർഡ് മേഖലയിലെ വാണിജ്യ-ചില്ലറ വ്യാപാരത്തെ ഈ പെട്ടെന്നുള്ള അടച്ചിടൽ ബാധിക്കുമെന്ന് അദ്ദേഹം ആശങ്ക പ്രകടിപ്പിച്ചു.
അതേസമയം, പോലീസിന്റെ നടപടിയോട് സമ്മിശ്ര പ്രതികരണമാണ് ഉടമകളിൽ നിന്നുണ്ടായത്. അടുത്തിടെ ഹോബാർട്ടിൽ നിന്ന് ഒരു ലക്ഷം ഡോളറിന്റെ ഡീസൽ മോഷണം പോയപ്പോൾ കാര്യമായ അന്വേഷണം നടത്താത്ത പോലീസ്, ഇപ്പോൾ ഇത്തരമൊരു സംഭവത്തിന് വലിയ രീതിയിൽ നികുതിപ്പണം ചിലവാക്കുന്നതിനെ നഥാൻ തർലോ വിമർശിച്ചു. വൈൻയാർഡ് ഇംഗ്ലിസ് സ്ട്രീറ്റ് വഴി യാത്ര ചെയ്യുന്നവർ പ്രദേശം ഒഴിവാക്കണമെന്ന് പോലീസ് നിർദ്ദേശം നൽകിയിട്ടുണ്ട്.