ദേശീയതലത്തിൽ തോക്ക് നിയമങ്ങൾ പരിഷ്കരിക്കുന്നതിനുള്ള സമയപരിധി അടുത്തിരിക്കെ, ടാസ്മാനിയൻ സർക്കാർ ഒമ്പതംഗ പുതിയ തോക്ക് കൺസൾട്ടേറ്റീവ് കമ്മിറ്റിയെ (Firearms Consultative Committee) നിയമിച്ചു. തോക്ക് കൈവശം വയ്ക്കുന്നതിൽ നിയന്ത്രണങ്ങൾ കൊണ്ടുവരുന്നതിനും നിയമങ്ങൾ കർശനമാക്കുന്നതിനും സർക്കാരിനെ ഉപദേശിക്കുകയാണ് ഈ സമിതിയുടെ ലക്ഷ്യം.
കർഷകർ, സ്പോർട്സ് ഷൂട്ടർമാർ, തോക്ക് വ്യാപാരികൾ എന്നിവർക്കൊപ്പം തോക്ക് നിയന്ത്രണത്തിനായി വാദിക്കുന്ന 'അലന്ന ആൻഡ് മാഡലിൻ ഫൗണ്ടേഷൻ', 'മെഡിക്സ് ഫോർ ഗൺ കൺട്രോൾ' തുടങ്ങിയ സംഘടനകളിലെ പ്രതിനിധികളും സമിതിയിലുണ്ട്. സമൂഹത്തിന്റെ സുരക്ഷയും ഉത്തരവാദിത്തമുള്ള തോക്ക് ഉടമകളുടെ താൽപ്പര്യങ്ങളും തമ്മിൽ സന്തുലിതാവസ്ഥ ഉറപ്പാക്കുമെന്ന് പോലീസ് മന്ത്രി ഫെലിക്സ് എലിസ് പറഞ്ഞു.
തോക്കുകളുടെ എണ്ണം പരിമിതപ്പെടുത്തുന്നതിനും തോക്കുകളുടെ വർഗ്ഗീകരണത്തിൽ കർശനമായ മാറ്റങ്ങൾ വരുത്തുന്നതിനുമുള്ള നിർദ്ദേശങ്ങൾ കേന്ദ്ര സർക്കാർ മുന്നോട്ടുവെച്ചിട്ടുണ്ട്. ഇതുമായി ബന്ധപ്പെട്ട തീരുമാനങ്ങൾ കൈക്കൊള്ളുന്നതിനായി ഫെബ്രുവരി അവസാനത്തിന് മുൻപ് സമിതി ആദ്യ യോഗം ചേരും. എന്നാൽ തോക്ക് നിയന്ത്രണ നിയമങ്ങൾ നടപ്പിലാക്കുന്നതിൽ ടാസ്മാനിയൻ സർക്കാർ മനഃപൂർവം കാലതാമസം വരുത്തുകയാണെന്ന് ഗ്രീൻസ് പാർട്ടി ആരോപിച്ചു.
