ഹോബാർട്ട്: ബാസ് സ്ട്രെയിറ്റിലെ കോമൺവെൽത്ത് സമുദ്രമേഖലയിൽ തുറന്ന കടലിൽ മത്സ്യകൃഷി വ്യാപിപ്പിക്കുന്നതിന്റെ ഭാഗമായി 15,000 യെല്ലോടൈൽ കിംഗ്ഫിഷുകളെ ടാസ്മേനിയയിലെത്തിച്ചു. ഓസ്ട്രേലിയയിൽ ഫെഡറൽ സമുദ്രപരിധിയിൽ കിംഗ്ഫിഷ് ഇനത്തെ പരീക്ഷണാടിസ്ഥാനത്തിൽ വളർത്തുന്നത് ഇതാദ്യമായാണ്. വെസ്റ്റേൺ ഓസ്ട്രേലിയയിലെ സർക്കാർ ഹാച്ചറിയിൽ നിന്ന് വിമാനമാർഗ്ഗവും ട്രക്കിലുമായാണ് വെറും ഒരു ഗ്രാം മാത്രം ഭാരമുള്ള കുഞ്ഞുങ്ങളെ ഹോബാർട്ടിലെ ഇൻസ്റ്റിറ്റ്യൂട്ട് ഫോർ മറൈൻ ആൻഡ് അന്റാർട്ടിക് സ്റ്റഡീസിൽ (IMAS) എത്തിച്ചത്.
ബ്ലൂ ഇക്കോണമി സിആർസിയുടെ (Blue Economy CRC) നേതൃത്വത്തിൽ നടക്കുന്ന മൂന്ന് വർഷത്തെ ഗവേഷണ പദ്ധതിയാണിത്. ബെർണി തീരത്തുനിന്ന് 12.5 കിലോമീറ്റർ അകലെയുള്ള ബ്ലൂ ഇക്കോണമി സോണിൽ ഡിസംബർ മുതൽ 14 മാസക്കാലം കടലിൽ ഇവയെ വളർത്തും. നാല് കിലോഗ്രാം വരെ വളർച്ചയാണ് പ്രതീക്ഷിക്കുന്നത്. ആദ്യ വർഷം അറ്റ്ലാന്റിക് സാൽമൺ മത്സ്യങ്ങളെ വിജയകരമായി വളർത്തിയ ശേഷമാണ് ഇപ്പോൾ രണ്ടാമത്തെ ഇനമായി കിംഗ്ഫിഷിനെ ഉൾപ്പെടുത്തി പരീക്ഷണം വിപുലീകരിക്കുന്നത്.
