പിന്നറൂ (സൗത്ത് ഓസ്‌ട്രേലിയ): സൗത്ത് ഓസ്‌ട്രേലിയയിലെ മുറെ മല്ലീ മേഖലയിലുള്ള പിന്നറൂ ടൗൺഷിപ്പിൽ കാട്ടുപ്രാവുകളുടെ എണ്ണം അനിയന്ത്രിതമായി പെരുകുന്നത് ജനജീവിതത്തെയും വ്യാപാര സ്ഥാപനങ്ങളെയും സാരമായി ബാധിക്കുന്നു. ടൗണിന്റെ ഇരുവശങ്ങളിലുമുള്ള ധാന്യ സംഭരണശാലകളിൽ (Grain silos) നിന്ന് സമൃദ്ധമായി തീറ്റ ലഭിക്കുന്നതാണ് പ്രാവുകൾ പെരുകാൻ കാരണം. പ്രാവുകളുടെ കാഷ്ഠം അടിഞ്ഞുകൂടി മെഷിനറികളുടെ പെയിന്റുകൾ നശിക്കുന്നതും മേൽക്കൂരകളിലെ ഡ്രെയിനേജ് പൈപ്പുകൾ അടഞ്ഞുപോകുന്നതും മൂലം ആഴ്ചതോറും നൂറുകണക്കിന് ഡോളറാണ് ശുചീകരണത്തിനായി ചെലവിടേണ്ടി വരുന്നതെന്ന് വ്യാപാരികൾ വ്യക്തമാക്കുന്നു.
പ്രാവുകളുടെ കാഷ്ഠം മഴവെള്ള സംഭരണികളിലേക്കും കുടിവെള്ള പൈപ്പുകളിലേക്കും കലർന്നതിനെത്തുടർന്ന് പ്രദേശത്തെ പ്രൈമറി സ്കൂളിൽ വലിയ കുടിവെള്ള പ്രതിസന്ധിയുണ്ടായി. വാട്ടർ ടാങ്കുകൾ വിച്ഛേദിക്കേണ്ടി വന്നതോടെ കഴിഞ്ഞ വർഷങ്ങളിൽ എജ്യുക്കേഷൻ ഡിപ്പാർട്ട്‌മെന്റിന് സ്കൂളിലേക്ക് പുറത്തുനിന്ന് കുടിവെള്ളം ടാങ്കറുകളിൽ എത്തിക്കേണ്ട സാഹചര്യമുണ്ടായി. ഒരു വർഷത്തിൽ ഒൻപത് തവണ വരെ പ്രജനനം നടത്തുന്ന ഈ പക്ഷികൾ വളരെ വേഗത്തിലാണ് പെരുകുന്നത്. സാധാരണ തുരത്തൽ വിദ്യകൾ ഫലിക്കാത്തതിനാൽ വെടിവെപ്പിലൂടെയും കെണികളിലൂടെയും ഇവയെ നിർമ്മാർജ്ജനം ചെയ്യുക മാത്രമാണ് ശാശ്വത പരിഹാരമെന്ന് വിദഗ്ദ്ധർ ചൂണ്ടിക്കാട്ടുന്നു. വിളവെടുപ്പ് കാലം അടുത്തതോടെ പ്രാദേശിക കൗൺസിലിന്റെ നേതൃത്വത്തിൽ കരാറുകാരെ നിയോഗിച്ച് പ്രാവുകളെ തുരത്താനുള്ള പ്രത്യേക ദൗത്യം പുരോഗമിക്കുകയാണെന്ന് സതേൺ മല്ലീ കൗൺസിൽ ചീഫ് എക്സിക്യൂട്ടീവ് ജേസൺ ബീറ്റൺ വ്യക്തമാക്കി.
