അഡിലെയ്ഡ്: ദക്ഷിണ ഓസ്ട്രേലിയയിലെ ക്ലെയർ പട്ടണത്തിൽ അറസ്റ്റിനിടെ 44-കാരൻ മരിച്ചതിനെ തുടർന്ന് പൊലീസ് അന്വേഷണം ആരംഭിച്ചു. ഞായറാഴ്ച ഉച്ചയോടെയാണ് സംഭവം. ഒപി സ്ട്രീറ്റിൽ ഒരു വ്യക്തി ഇരുമ്പ് ദണ്ഡുമായി അക്രമാസക്തമായി പെരുമാറുകയും സ്വത്ത് നശിപ്പിക്കുകയും ചെയ്യുന്നുവെന്ന വിവരത്തെ തുടർന്ന് പൊലീസിനെ വിളിക്കുകയായിരുന്നു. സ്ഥലത്തെത്തിയ ഉദ്യോഗസ്ഥരെ ഇയാൾ ഭീഷണിപ്പെടുത്തിയതായും പൊലീസ് അറിയിച്ചു.
ഇയാളെ നിയന്ത്രണത്തിലാക്കാൻ പൊലീസ് ടേസർ ഉപയോഗിച്ചെങ്കിലും അത് ഫലപ്രദമായില്ല. തുടർന്ന് അറസ്റ്റ് ചെയ്യുന്നതിനിടെ ഇയാൾ ബോധരഹിതനായി വീണു. പൊലീസ് ഉടൻ പ്രഥമ ശുശ്രൂഷ നൽകിയെങ്കിലും ആംബുലൻസ് സംഘം എത്തിയ ശേഷം ഇയാളെ മരിച്ചതായി അറിയിച്ചു. അതേസമയം സംഭവത്തിൽ പങ്കെടുത്ത ഉദ്യോഗസ്ഥർക്ക് പരിക്കുകളൊന്നും ഉണ്ടായിട്ടില്ല. ഉദ്യോഗസ്ഥർ ധരിച്ചിരുന്ന ബോഡി ക്യാമറകളിലെ ദൃശ്യങ്ങൾ അന്വേഷണത്തിന്റെ ഭാഗമായി പരിശോധിക്കുമെന്ന് അധികൃതർ അറിയിച്ചു. സംഭവത്തെക്കുറിച്ച് മേജർ ക്രൈം വിഭാഗവും എതിക്കൽ ആൻഡ് പ്രൊഫഷണൽ സ്റ്റാൻഡേർഡ്സ് വിഭാഗവും അന്വേഷണം നടത്തുകയാണ്. മരണവുമായി ബന്ധപ്പെട്ട റിപ്പോർട്ട് കൊറോണറിന് സമർപ്പിക്കുമെന്നും പൊലീസ് വ്യക്തമാക്കി.