ക്വീൻസ്‌ലൻഡിന്റെ തെക്കുകിഴക്കൻ മേഖലയിൽ ബോക്‌സിങ് മത്സരം നടക്കുന്ന വേദിക്കു പുറത്ത് വാഹനത്തിലെത്തിയ സംഘം നടത്തിയ വെടിവെപ്പിൽ 19 വയസ്സുകാരിക്ക് ഗുരുതരമായി പരിക്കേറ്റു. തലയ്ക്ക് വെടിയേറ്റ യുവതി ജീവൻ നിലനിർത്താൻ പോരാടുകയാണ്. സംഭവത്തിൽ പരിക്കേറ്റ മറ്റു മൂന്നുപേരും ആശുപത്രിയിൽ ചികിത്സയിലാണ്. ലോഗൻഹോമിലെ ഫിറ്റ്‌സി (Fitzy’s Loganholme) വേദിയിൽ ഞായറാഴ്ച രാത്രി 8.15ഓടെയാണ് വെടിവെപ്പുണ്ടായത്. ബോക്‌സിങ് പരിപാടിക്കിടെ വാഹനത്തിലെത്തിയവർ വെടിയുതിർത്തതായുള്ള വിവരത്തെത്തുടർന്നാണ് പൊലീസ് സ്ഥലത്തെത്തിയത്. 19കാരിയുടെ നില അതീവ ഗുരുതരമാണെന്നും 27, 37, 38 വയസ്സുള്ള മൂന്ന് പുരുഷന്മാർ ഗുരുതരമായെങ്കിലും നിലവിൽ സ്ഥിരതയുള്ള നിലയിലാണെന്നും പൊലീസ് അറിയിച്ചു.
സംഭവസ്ഥലം ഞെട്ടിക്കുന്നതായിരുന്നുവെന്ന് ക്വീൻസ്‌ലൻഡ് പൊലീസ് ഡെപ്യൂട്ടി കമാൻഡർ ക്രിസ് സ്ട്രീം പറഞ്ഞു. നിരവധി പേർക്ക് വെടിയേറ്റ മുറിവുകളുണ്ടായിരുന്നുവെന്നും അദ്ദേഹം വ്യക്തമാക്കി. സംഭവത്തിൽ ഹോമിസൈഡ് വിഭാഗം അന്വേഷണം ആരംഭിച്ചിട്ടുണ്ട്. പരിപാടിക്ക് മുമ്പ് സുരക്ഷാ ഭീഷണികളൊന്നും കണ്ടെത്തിയിരുന്നില്ലെന്നാണ് പൊലീസിന്റെ പ്രാഥമിക വിവരം. സംഭവം ലോഗൻ നഗരത്തിലെ ജനങ്ങൾക്കിടയിൽ വലിയ ഭീതിയുണ്ടാക്കിയതായി മേയർ ജോൺ റേവൻ പറഞ്ഞു. നഗരത്തിൽ ഇതുപോലൊരു സംഭവം മുമ്പ് ഉണ്ടായിട്ടില്ലെന്നും വെടിവെപ്പ് സമൂഹത്തെ ഞെട്ടിച്ചെന്നും അദ്ദേഹം പ്രതികരിച്ചു. കുടുംബങ്ങൾക്കും കുട്ടികൾക്കും പങ്കെടുക്കാൻ കഴിയുന്ന പരിപാടിയായിരുന്നു ഇതെന്നും അദ്ദേഹം കൂട്ടിച്ചേർത്തു.
വെടിയൊച്ച കേട്ടപ്പോൾ കുട്ടികൾ ബോക്‌സിങ് റിങ്ങിനടിയിൽ ഒളിക്കുന്നതായി കാണിക്കുന്ന ദൃശ്യങ്ങൾ സമൂഹമാധ്യമങ്ങളിൽ പ്രചരിക്കുന്നുണ്ട്. സംഭവത്തിൽ പങ്കെടുത്ത കുട്ടികൾക്കും കുടുംബങ്ങൾക്കും ഇത് ദീർഘകാല മാനസിക ആഘാതമുണ്ടാക്കാൻ സാധ്യതയുണ്ടെന്നും മേയർ പറഞ്ഞു. യുവാക്കളെ അക്രമത്തിൽ നിന്നും കുറ്റകൃത്യങ്ങളിൽ നിന്നും അകറ്റിനിർത്തുന്നതിനുള്ള മാർഗമായി ബോക്‌സിങ്ങിനെ ഉപയോഗിക്കുകയായിരുന്നു പരിപാടിയുടെ സംഘാടകരുടെ ലക്ഷ്യമെന്നും റേവൻ വ്യക്തമാക്കി. പരിപാടി സംഘടിപ്പിച്ച ലോഗൻ സിറ്റി ടൈറ്റിൽസ് സംഭവത്തിൽ ദുഃഖം രേഖപ്പെടുത്തി. പ്രാദേശിക പ്രതിഭകൾക്ക് അവസരം നൽകുന്നതിനും സമൂഹത്തെ ഒന്നിപ്പിക്കുന്നതിനുമായി നടത്തിയ കുടുംബസൗഹൃദ പരിപാടിയായിരുന്നു ഇതെന്നും അക്രമത്തിന് ബോക്‌സിങ് സമൂഹത്തിലോ പൊതുസമൂഹത്തിലോ സ്ഥാനമില്ലെന്നും സംഘാടകർ പ്രസ്താവനയിൽ പറഞ്ഞു.
വെടിവെപ്പ് ഭയപ്പെടുത്തുന്നതാണെന്ന് നാഷണൽസ് എംപി ഡേവിഡ് ലിറ്റിൽപ്രൗഡ് പ്രതികരിച്ചു. ആളുകളെ ഉപദ്രവിക്കാനും കൊല്ലാനുമുള്ള ഉദ്ദേശ്യത്തോടെ വാഹനത്തിലെത്തി വെടിയുതിർക്കുന്നത് ആശങ്കാജനകമാണെന്നും ആളുകൾക്ക് ഇഷ്ടമുള്ള കാര്യങ്ങൾ സുരക്ഷിതമായി ആസ്വദിക്കാൻ കഴിയാത്ത സാഹചര്യം ദുഃഖകരമാണെന്നും അദ്ദേഹം പറഞ്ഞു. അതേസമയം തുടർച്ചയായി ഉച്ചത്തിലുള്ള ശബ്ദങ്ങൾ കേട്ടതിനു പിന്നാലെ സ്ഥലത്ത് ആംബുലൻസുകളും പൊലീസും എത്തിയതായി ദൃക്സാക്ഷി ടൈലർ ഫ്ലോറൻസ് പറഞ്ഞു. വെടിവെപ്പിന് പിന്നാലെ അക്രമികൾ സഞ്ചരിച്ച കാർ സ്ഥലത്തുനിന്ന് രക്ഷപ്പെട്ടതായാണ് വിവരം. കാറിന്റെ വിവരണവുമായി പൊരുത്തപ്പെടുന്ന ഒരു വാഹനം പിന്നീട് വാട്ടർഫോർഡ് വെസ്റ്റിലെ തെരുവിൽ കത്തിക്കരിഞ്ഞ നിലയിൽ കണ്ടെത്തി. പ്രതിയെ ഇതുവരെ പിടികൂടിയിട്ടില്ല. അതേസമയം, പൊതുജനങ്ങൾക്ക് നിലവിൽ തുടർഭീഷണിയുണ്ടെന്ന് കരുതുന്നില്ലെന്ന് പൊലീസ് അറിയിച്ചു.