ബ്രിസ്ബേൻ: പസഫിക് സമുദ്രത്തിൽ രൂപപ്പെട്ട 'മൈല' (Maila) ചുഴലിക്കാറ്റ് അതിശക്തമായ കാറ്റായി മാറി ഓസ്ട്രേലിയൻ തീരത്തേക്ക് നീങ്ങുന്നു. നിലവിൽ സോളമൻ കടലിൽ (Solomon Sea) സ്ഥിതി ചെയ്യുന്ന മൈല കാറ്റഗറി 4 വിഭാഗത്തിലുള്ള അതിതീവ്ര ചുഴലിക്കാറ്റായാണ് ശക്തി പ്രാപിച്ചിരിക്കുന്നത്. അടുത്ത ആഴ്ചയുടെ തുടക്കത്തിൽ ക്വീൻസ്ലൻഡിന്റെ വടക്കൻ മേഖലകളിൽ കാറ്റ് ആഞ്ഞടിക്കുമെന്ന് ഓസ്ട്രേലിയൻ കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നൽകി.
മൈല ചുഴലിക്കാറ്റിന്റെ കേന്ദ്രഭാഗത്ത് മണിക്കൂറിൽ 165 കിലോമീറ്റർ വേഗതയിലും ഇടയ്ക്ക് 230 കിലോമീറ്റർ വേഗതയിലുമാണ് കാറ്റ് വീശുന്നത്. നിലവിൽ പടിഞ്ഞാറ് ദിശയിലേക്ക് നീങ്ങുന്ന കാറ്റ്, ഞായറാഴ്ചയോടെ പാപുവ ന്യൂ ഗിനിയയുടെ തെക്കുകിഴക്കൻ ഭാഗങ്ങളിലൂടെ കടന്ന് കോറൽ സീയിലേക്ക് (Coral Sea) പ്രവേശിക്കും. വരും ദിവസങ്ങളിൽ കാറ്റിന്റെ വേഗത കുറയാൻ സാധ്യതയുണ്ടെങ്കിലും ക്വീൻസ്ലൻഡിലെ കേപ് യോർക്ക് പെനിൻസുലയിൽ (Cape York Peninsula) ഇത് കനത്ത നാശനഷ്ടങ്ങൾ വരുത്തിയേക്കുമെന്ന് അധികൃതർ ഭയപ്പെടുന്നു.
മൈലയ്ക്ക് പുറമെ 'വയാനു' (Vaianu) എന്ന മറ്റൊരു അതിശക്തമായ ചുഴലിക്കാറ്റ് ന്യൂസിലാന്റിന് ഭീഷണിയാകുന്നുണ്ട്. വയാനു ഞായറാഴ്ച ഉച്ചയോടെ ന്യൂസിലാന്റിന്റെ വടക്കുകിഴക്കൻ തീരത്ത് ആഞ്ഞടിക്കുമെന്നാണ് പ്രവചനം. പാപുവ ന്യൂ ഗിനിയയിലെ മിൽനെ ബേ, വുഡ്ലാർക്ക്, ബൊഗെയ്ൻവിൽ തുടങ്ങിയ ദ്വീപുകളിൽ ഇതിനോടകം തന്നെ അതീവ ജാഗ്രതാനിർദ്ദേശം നൽകിയിട്ടുണ്ട്. ഈ സീസണിൽ ഓസ്ട്രേലിയൻ മേഖലയിൽ രൂപപ്പെടുന്ന ഏഴാമത്തെ തീവ്ര ചുഴലിക്കാറ്റാണ് മൈല.