ബ്രിസ്ബേൻ: ക്വീൻസ്ലൻഡിന്റെ സാംസ്കാരിക മാമാങ്കമായ ബ്രിസ്ബേൻ ഫെസ്റ്റിവലിന് തുടക്കം കുറിച്ച് ആകാശവിസ്മയം തീർക്കുന്ന 'റിവർഫയർ 2026' (Riverfire) ശനിയാഴ്ച നടക്കും. ബ്രിസ്ബേൻ നദിക്കരയിലെ സൗത്ത് ബാങ്ക്, കംഗാരു പോയിന്റ്, ക്വീൻസ് വാർഫ് തുടങ്ങിയ പ്രധാന കേന്ദ്രങ്ങളിലായി അഞ്ച് ലക്ഷത്തോളം ആളുകൾ ആഘോഷങ്ങളിൽ പങ്കുചേരുമെന്നാണ് പ്രതീക്ഷിക്കുന്നത്. വൈകുന്നേരം 4:52 മുതൽ റോയൽ ഓസ്ട്രേലിയൻ എയർഫോഴ്സിന്റെ സി-17എ ഗ്ലോബ്മാസ്റ്റർ, എഫ്/എ-18എഫ് സൂപ്പർ ഹോർണറ്റ് വിമാനങ്ങളുടെ അഭ്യാസപ്രകടനങ്ങളും, രാത്രി 7 മണിക്ക് വൻ കരിമരുന്ന് പ്രയോഗവും അരങ്ങേറും.
നദിയിലെ ആറ് ബാർജുകളിൽ നിന്നും മേൽക്കൂരകളിൽ നിന്നും സ്റ്റോറി ബ്രിഡ്ജ് ഉൾപ്പെടെയുള്ള പ്രധാന പാലങ്ങളിൽ നിന്നുമാണ് ഇത്തവണത്തെ വെടിക്കെട്ട് ഒരുക്കിയിരിക്കുന്നത്. ഫെറി തൊഴിലാളികളുടെ പണിമുടക്ക് കാരണം സിറ്റികാറ്റുകളും ഫെറികളും സർവീസ് നടത്തില്ലെന്നതിനാൽ പൊതുജനങ്ങൾ ട്രെയിൻ, ബസ് സർവീസുകൾ ഉപയോഗിക്കണമെന്ന് അധികൃതർ നിർദ്ദേശിച്ചു. നഗരത്തിൽ വൻതോതിൽ റോഡ്-പാലം നിയന്ത്രണങ്ങൾ ഏർപ്പെടുത്തിയിട്ടുണ്ട്. സൗത്ത് ബാങ്ക് പ്രവേശന കവാടങ്ങളിൽ കർശന പരിശോധന ഉണ്ടായിരിക്കും. ശനിയാഴ്ച ബ്രിസ്ബേനിലെ താപനില 32 ഡിഗ്രി സെൽഷ്യസ് വരെ ഉയരാൻ സാധ്യതയുള്ളതിനാൽ ആവശ്യമായ മുൻകരുതലുകൾ സ്വീകരിക്കാനും നിർദ്ദേശമുണ്ട്.
